Samiyɛl sɛbɛdĩɛ̃lw (1 Samuel) 24

Dawudaẃ hlǝ gɩ̀ sùɔ́gɩ nã ǹ-ta Ãngedi tãnũnɲã nã, ǹ-kãã ba dàa.

2 Sayulẁ gáa ɲǝ̃ǝ̃ ǹ-duu Filisɩ yiɛntaaba nã ǹ-ga ver ǹ-jo, bá juo waa nǝ̃-yǝ wà: «Dawudaẃ nàa Ãngedi jerkwaarɩ nã.»

3 Sayulẃ ne ǹ-hiil Isɩrayɛl yiɛgɩ min nã, bibyanããbaa mãã bà nãkrɔnɲã̀ dwal, cotonnũɔ̃sɔ̃ trãngwaahǝ̃ǝ̃l bà siɛl (3 000), ǹ-tuu-ba ǹ-ta Dawudaba nǝ̃ wù nãbɩgaa'n caamã. Bà yáá dàa fuwɔ jer'n siibonãã'n tãnũn'n yigagɩ nã.

4 Sayulbá kãã hi tũm'n gballiɛnãã'n sùɔ́gu hlũũ'n nũɔ̃gɩ nã. Gɩ̀ sùɔ́gɩ nã, tãnferdaarɩ̀ yáá dàa, Sayulẃ jãn dɩ̀ kusunã wù ga fa wù hla nã. Dawudaẁ yáá dàa bá nǝ̃ wù bluuba kusun-kusun yiɛgu.

5 Dawuda bluubá waa nǝ̃-yǝ wà: «Gùú yuuguu mãã Fɩraa-Dũnnũ wáalá-n wà: “Mǝ̃̀ dii ǹ ɲããtiiw ǹ nãkrɔnɲã nã; ce-yǝ nǝ̃ dìí mãã dɩ̀ dwal ǹ nã.” Gɩ̀-lǝ gùú yuugɩ-i nnĩĩ nã.» Dawudaẃ fǝ̃ǝ̃ ǹ-suro, ǹ-ŋmã ǹ-bǝr Sayul kuulaadiiyǝpɩpuɔlayǝ'n nũɔ̃gu.

6 Gɩ̀ furũũgɩ nã, wù mãã wù yáá wùu bǝr Sayul kuulaadiiyǝpɩpuɔlayǝ'n nũɔ̃gu, wù hiɛgá juo ba gà car-yǝ.

7 Wú fǝ̃ǝ̃ ǹ-waa nǝ̃ wù bluuba wà: «Fɩraa-Dũnnũw báa ya mǝ̃́ ce díɛ̀ mǝ̃̀ tii yuunã, wùú mãã Fɩraa-Dũnnũẁ níé ǹ-hiil-yǝ ǹ-ce wú ba yuuntigǝ̃ngãw! Wú báa ya mǝ̃́ haar mǝ̃̀ nãkruɔgu wù yuunã, nã̀ã wa, wù-lǝ wɩ̀-i wùú mãã Fɩraa-Dũnnũẁ níé ǹ-hiil-yǝ ǹ-ce wú ba yuuntigǝ̃ngãw.»

8 Dawuda cãwanĩɛ̃ gáàgá cii wù bluuba, bà sáa duruu Sayulw drɔ. Sayulẃ ga fǝ̃ǝ̃ ǹ-suro ǹ-hlǝ tãnfierɩ nã, ǹ-car nǝ̃ wù hlũũgu.

9 Fiyãã gɩ̀ furũũgɩ nã, Dawudaẃ suro ǹ-hlǝ tãnfierɩ nã, nã̀ã ba wù kaasǝ Sayul yiɛgu wà: «Yuuntigǝ̃ngã, mǝ̃̀ tii!» Sayulẃ cĩɛ̃ ǹ-ne wù furũnyiɛgu, ǹ-da Dawudaw wùu fiɛriɛ ǹ-curǝǝ wù yigagɩ nã ɲũũrũũgu ǹ-bũũ-yǝ.

10 Dawudaẃ waa nǝ̃ Sayulw wà: «Danii ń ba ǹ nɔ̃ bàá bà ne wà mǝ̃́ caa-n nǝ̃ diibɩblar-i bà yalli?

11 Ǹ díɛ́ kuɔkuɔgu nǝ̃ ǹ hla'n yinɲã wà Fɩraa-Dũnnũw díilá-n mǝ̃̀ nãkrɔnɲã nã jimããgu, tãnfieri kusunã. Bà yáá bà wa mǝ̃́ ko-n, mǝ̃́ hla nã̀ã ya ń tar ǹ-hlǝ dɩ̀ nã, nã̀ã waa wà: “Mǝ̃̀ síì haar mǝ̃̀ nãkruɔgu mǝ̃̀ tii yuunã, nã̀ã wa wù-lǝ wɩ̀-i wùú mãã Fɩraa-Dũnnũẁ níé ǹ-hiil-yǝ ǹ-ce wú ba yuuntigǝ̃ngãw.”

12 Ne, tɩtii, ne ǹ kuulaadiiyǝpɩpuɔlayǝ'n yiɛguu mãã mǝ̃̀ nãkruɔgɩ nã. Mǝ̃̀ bǝ́rrá-gǝ nǝ̃ mǝ̃̀ sáa ko-n. Gɩ̀ sùɔ́gɩ nã, fǝ̃ǝ̃ nǝ̃ ń hũɔ̃-dǝ wà diibɩblaari yindagǝ nã hla-n-hlanãw sǝ mǝ̃̀ nã, nǝ̃ mǝ̃̀ sáa ce-n nǝ̃ diicĩɛ̃rǝ yo. Nã̀ã da, ń nìɛ ǹ paa jarnjãnããba ǹ cii-m ǹ-da ko-m!

13 Fɩraa-Dũnnũẃ jar yì sugolli! Wú hiil mǝ̃̀ mããjaamã ǹ nã! Nǝ̃ mǝ̃̀ síì haar mǝ̃̀ nãkruɔgu ǹ yuunã.

14 Vũnvãnãã'n cãwaadũũm mã́ã̀ mã-ń ce mã́ waa dɩ̀-i wà: “Blasǝrɩ̀ hlǝ cobɩbliɛba nã-i”, mã́ã yo, mǝ̃̀ síì haar mǝ̃̀ nãkruɔgu ǹ yuunã.

15 Isɩrayɛl yuuntigǝ̃ngãẁ sórrá ǹ-tuu hlũũgu halii yuunã-ì? Ǹ ɲǝ̃ǝ̃ ǹ duu halǝmblǝ nã-ì? Mǝ̃n-lǝ vakulǝyǝ-i, kɩrǝ̃mgbaalkɩka-i nǝ̃-m!

16 Fɩraa-Dũnnũẁ ji jar hãmĩĩ sugolli, nã̀ã waa wù mãã dìí mãã dɩ̀ saa dɩ́ hi-yáà. Wù ji blǝ cɔ̃m mã́ã̀ ǹ-ne, nã̀ã hũɔ̃ mǝ̃̀ nũɔ̃gu, wù ji hã-m nǝ̃ diidwaldǝdi ǹ-hiil-m ǹ nãkruɔgɩ nã.»

17 Dawudaẁ gáa waa cãwanĩɛ̃ gáà nǝ̃ Sayulw ǹ-tã, Sayulẃ waa wà: «Mã́ã bíɛ́ Dawuda, nã́ã́ yíi yal-i sulammã nã-i?» Sayulw nã̀ã du nã, ǹ-ba wù kaal wù higinãã.

18 Wú waa nǝ̃ Dawudaw wà: «Ǹ sṹɔ̃lã́ ǹ-maa mã́ã̀, nã̀ã wa ǹ cíé-m nǝ̃ diifɩnfaari, nǝ̃ mǝ̃n ce-n nǝ̃ diibɩblaari.

19 Ǹ mãã nã̀ã blǝ-m nǝ̃ gùú kusufɩnfaaguu mãã, ǹ pɩ́gará-m nǝ̃-gǝ jimããgu, nã̀ã wa Fɩraa-Dũnnũẁ yáá wùu dii-m ǹ nãkruɔgɩ nã, nǝ̃ ǹ sáa ko-m.

20 Curow-ń jal nǝ̃ wù ɲããtiiw, nã́ã́ wu ya wú fũrũɔ̃ nǝ̃ wù hlũũgu ciyɛ̃-i? Ǹ cíé dìí mãã ǹ hã-m jimããgu, Fɩraa-Dũnnũẃ pã-n nǝ̃-dǝ!

21 Yindiɛ, mǝ̃̀ fǝ̃́ǝ̃lã́-dǝ, dɩ̀ káalá wà n ji ba yuuntigǝ̃ngãw, nǝ̃ Isɩrayɛl yiɛgɩ ji ba nǝ̃ kɩkǝmmã ǹ nãkrɔnɲã nã.

22 Gɩ̀ sùɔ́gɩ nã, waasǝ Fɩraa-Dũnnũ yiirɩ nã, wà mǝ̃̀ kúú furũũgɩ nã, n síì guu mǝ̃̀ furũntaaba nã, nǝ̃ n síì hu ǹ-guu mǝ̃̀ yiirɩ nã mǝ̃̀ suɔgu.»

23 Dawudaẃ fǝ̃ǝ̃ ǹ-waasǝ wù nũɔ̃gu ǹ-hã Sayulw. Sayulẃ ver ǹ-ta wù kũũ, nǝ̃ Dawuda yo, wú ver ǹ-ta wù wanŋmǝ̃ǝ̃rǝ̃m'n sùɔ́gɩ nã, tãnũnɲã nã, bá nǝ̃ wù nãbɩgaaba.