Samiyɛl sɛbɛdĩɛ̃lw (1 Samuel) 8

4 Isɩrayɛl bluu'n vũnvãnããba min, bá kãã tɩgii bà ɲĩɛ̃, ǹ-kã Samiyɛlw nãã, Arɩmã lǝri.

5 Bá waa nǝ̃-yǝ wà: «Ne, ǹ jáa vǝ̃ǝ̃, nǝ̃ ǹ byanããbà sǝ bàa tuu ǹ nǝ̃ǝ̃li. Yindiɛ, kra yuuntigǝ̃ngãdiɛ nã yì yuugɩ nã, wú ba wù jar yì sugoyaga, nã́ã́ yi mãã yì da-dǝ coplaaga min sǝ̃ǝ̃nã nĩĩgu mãã.»

6 Bà gáa waa nǝ̃ Samiyɛl wà wú hã-ba nǝ̃ yuuntigǝ̃ngãdiɛ, wú ba wù jar bà sugoyaga, gɩ̀-lǝ gɩ̀ sáa dwal wù nã, wú cirǝ̃ǝ̃ Fɩraa-Dũnnũw nã.

7 Fɩraa-Dũnnũẃ fǝ̃ǝ̃ ǹ-waa nǝ̃ Samiyɛl wà: «Cwaabà mãã bà ji waa kuu wo kuu nǝ̃-n, hũɔ̃ bà yalli, nã̀ã wa bà sǝ̃n hla yíi sǝ, bà hla mã́ã-i, mǝ̃̀ yuuntasǝrɩ báa ji da ǹ-ba bà drɔ hlo.

8 Bà ce-n nã́ã́ bà mãã bà ce-dǝ nĩĩguu mãã, ǹ-tuu gùú nã mãã mǝ̃̀ híilá-ba Misɩra yiɛgu ǹ-ji vaa nǝ̃ jimããgu dìi: bà nǝ̃́nǝ̃́ǝ̃ mǝ̃̀ nã, ǹ-da ǹ-ba bà ce mããcemmã bà hã dũnnũdaba.

9 Gɩ̀ sùɔ́gɩ nã, hũɔ̃ bà yalli, nǝ̃ gbǝ bà nã! Yuuntigǝ̃ngãw mãã wù ji ba bà yuugɩ nã, wù mãã wù saa nǝ̃ dìi, pɩgaa bá fǝ̃ǝ̃-dǝ.»