Josué 24

14 «Yindiɛ, bláà ɲì sɔ̃ Fɩraa-Dũnnũw nã nǝ̃ ɲí ba ɲì ce mããcemmã ɲì hã-yǝ sũɔ̃lɩmmã nã nǝ̃ yalntasǝrɩ nã. Ɲì tǝvũnvãnããbà yáá bà ce mããcemmã bà hã gùú dũnnũbaa mãã Efratɩ lwaa'n maalɩ nã nǝ̃ Misɩra yiɛgɩ nã, gúulà bà nã nǝ̃ ɲí ba ɲì ce mããcemmã ɲì hã Fɩraa-Dũnnũw.

15 Nǝ̃ ɲi-ń ba ɲì ne wà gɩ sáa saa ɲí ba ɲì ce mããcemmã ɲì hã Fɩraa-Dũnnũw, níyà ɲí hiil jimããgu ɲi mãã ɲì caa ɲí ba gùú tii'n mããcemmã nã: yindagǝ nã ɲì tǝvũnvãnããbà yáá bà ce mããcemmã bà hã gùú dũnnũbaa mãã Efratɩ lwaa'n maalɩ nã dàa Amoritɩ nũɔ̃ntaaba dũnnũba-i, ɲi mãã ɲì jã́nnã́ bàá mãã bà yiɛgu. Nǝ̃ mǝ̃n-lǝ nǝ̃ mǝ̃̀ suɔntaaba, yi ji ba yì ce mããcemmã yì hã Fɩraa-Dũnnũ-i.»

16 Isɩrayɛl bluubá fǝ̃ǝ̃ ǹ-siɛ-yǝ wà: «Dɩ̀ káaláa wà dɩ sǝ yì yunɲã nã ǹ-nǝ̃nǝ̃ǝ̃ Fɩraa-Dũnnũw nã nã̀ã ba yì ce mããcemmã yì hã dũnnũdaba.

17 Sulammã nã, Fɩraa-Dũnnũw-i hãmĩĩ Dũnnũw. Wù-lǝ wùú híilá-yáà nǝ̃ yì tǝba Misɩra yiɛgu, wasǝ'n suɔgɩ nã. Wù-lǝ wùú cíé cɔ̃nnurom mã́ã̀ yì yinɲã nã nã̀ã cii yì nã nã̀ã cii yì nã waal'n hlũũgɩ nã min nã yi tíɛ́ ǹ-hlǝ gùú coplaaga min mãã gà sǝ̃ǝ̃nã.

18 Wù ɲǝ̃́ǝ̃lã́ ǹ-tĩɛ̃ coplaaga min yì yiga nã halle Amoritɩ nũɔ̃ntaabaa mãã bà yáá dìɛ lǝ díɛ́ nã. Hãmĩĩ yo, yi ji ba yì ce mããcemmã yì hã Fɩraa-Dũnnũw, nã̀ã wa wù-lǝ wɩ̀-i yì Dũnnũw.»