Josué 6

Seriko lǝ'n fierɩ̀ yáá dìi suu, nǝ̃ ɲinɲã́ paa ǹ-cii-dǝ nǝ̃ Isɩrayɛl bluuba. Curo'n sáá wù jãn, curo'n sáá wù hlǝ dɩ̀ kusuugɩ nã.

2 Fɩraa-Dũnnũẃ fǝ̃ǝ̃ ǹ-waa nǝ̃ Sosuwew wà: «Ne, mǝ̃̀ dii Seriko lǝri nǝ̃ dɩ̀ yuuntigǝ̃ngãw ǹ nãkrɔnɲã nã, nǝ̃ dɩ̀ sɩrǝǝsɩba kũnkonbliɛ yo.

3 Yíì, nǝ̃ ǹ sɩrǝǝsɩba min, ɲi ji finǝ̃ǝ̃ ǹ-caliɛ lǝ díɛ́ nã. Ɲi ji ba ɲì finǝ̃ǝ̃ ɲì caliɛ dɩ̀ nã nnĩĩ-i yuu wo yuu yindiin, bãn nãndien kusuugɩ nã.

4 Puruɔntaa nɩrhǝ̃ǝ̃lẁ ji kã ɲí ba ɲì wáà ɲì min, bà ji ba ba-ń ce bá tuu gballiɛ nɩrhǝ̃ǝ̃lw ǹ-ba bà bu-ba Dũnnũ kuruu'n yigagɩ nã. Bãn nɩrhǝ̃ǝ̃lnã yugu, ɲi ji finǝ̃ǝ̃ ǹ-caliɛ lǝ díɛ́ nã yinnɩrhǝ̃ǝ̃l, nǝ̃ puruɔntaabá ba bà bu gballiɛba.

5 Ba-ń ji ba bà bu gballaw, nǝ̃ ɲi ba ɲì nɔ̃ gballa'n dullɩ nã, ɲì bluuba min bà ji ba bà kaasǝraa bolbol. Gɩ̀-lǝ gɩ̀ nã, lǝ'n dofũũlɩ̀ ji duruu, ɲì bluubá fǝ̃ǝ̃ yugo ǹ-jãn ǹ-du-ba, curo wo curo wú vĩĩ wù yiganãyiɛgu.»

6 Nũnɩ bíɛ́ Sosuweẃ fǝ̃ǝ̃ ǹ-be puruɔntaaba ǹ-juo waa nǝ̃-ba wà: «Túulà twanɲũɔ̃kuruugu nǝ̃ puruɔntaa nɩrhǝ̃ǝ̃lẃ tuu gballiɛ nɩrhǝ̃ǝ̃lw ǹ-ta Fɩraa-Dũnnũ kuruu'n yigagɩ nã.»

7 Nã̀ã fǝ̃ǝ̃ ǹ-waa nǝ̃ Isɩrayɛl bluuba wà: «Bláà ɲì wáà ɲì finǝ̃ǝ̃ ɲì caliɛ lǝ díɛ́ nã, nǝ̃ sɩrǝǝsɩbaa mãã nǝ̃ byarceɲinɲã, bá ta Fɩraa-Dũnnũ kuruu'n yigagɩ nã.»

8 Sosuweẁ gáa wanãã ǹ-tã nǝ̃ Isɩrayɛl bluuba, puruɔntaa nɩrhǝ̃ǝ̃lw mãã bà yáá nǝ̃ gballiɛ nɩrhǝ̃ǝ̃lw Fɩraa-Dũnnũ yigagɩ nã, bá du waalɩ nã, nã̀ã ba bà bu-ba. Dũnnũ kuruugɩ́ fǝ̃ǝ̃ ǹ-ba gɩ̀ duu bà nã.

9 Sɩrǝǝsɩba nǝ̃n yáá nǝ̃ byarceɲinɲã, bá ba puruɔntaaba nǝ̃n yáá nǝ̃ gballiɛba bà yigagɩ nã, nǝ̃ furũnbɩgaabá ba bà duu Dũnnũ kuruugɩ nã. Ǹ-ya bá ba waalɩ nã, bá ba bà bu gballiɛba.

10 Sosuweẁ yáá wùu hã-ba nǝ̃ díɛ̀-i wà: «Ɲi síì kaasǝraa, ɲi síì ya bá nɔ̃ ɲì yaliɛga nã, cãwandɩ̀ síì hlǝ curo'n nũɔ̃ nã fuwɔ gùú yuuguu mãã mǝ̃-ń ji waa nǝ̃-ɲã́ã̀ wà ɲi ba ɲì kaasǝraa! Gɩ̀-lǝ gɩ̀ nã, ɲi ji ba ɲì kaasǝraa.»

11 Fɩraa-Dũnnũ kuruugɩ́ fǝ̃ǝ̃ ǹ-finǝ̃ǝ̃ ǹ-caliɛ lǝrɩ nã. Gɩ̀ fínǝ̃́ǝ̃ ǹ-caliɛ dɩ̀ nã yindiin, nǝ̃ bá fǝ̃ǝ̃ ǹ-ta ǹ-maar bà kuɔyaga nã ǹ-kãã cɔ.

12 Sosuweẃ kãã curuɔ ǹ-suro nǝ̃ puruɔntaabá ver ǹ-tuu Fɩraa-Dũnnũ kuruugu.

13 Puruɔntaa nɩrhǝ̃ǝ̃lw mãã bà yáá bàa tuu gballiɛ nɩrhǝ̃ǝ̃l wáà, Fɩraa-Dũnnũ kuruu'n yigagɩ nã, bá du waalɩ nã, nã̀ã ba bà bu gballiɛba. Sɩrǝǝsɩbaa mãã bà yáá nǝ̃ byarceɲinɲã, bá ta bà yigagɩ nã, nǝ̃ bàá mãã furũntaaba, bà-lǝ bá ba bà duu Fɩraa-Dũnnũ kuruugɩ nã. Ǹ-ya bá ba waalɩ nã, bá ba bà bu gballiɛba.

14 Bá finǝ̃ǝ̃ ǹ-caliɛ lǝrɩ nã bãnɲã hǝ̃ǝ̃lnã yuugu, nã̀ã ver ǹ-kũũ bà kuɔyaga nã. Bá ce gùú dɩdiindi bãn nãndien kusuugɩ nã.

15 Bãn nɩrhǝ̃ǝ̃lnã yuugu, bá curuɔ ǹ-suro taajãlũũ'n nũɔ̃gɩ nã, ǹ-ce gùú tammã dɩnmã-i ǹ-finǝ̃ǝ̃ ǹ-caliɛ lǝrɩ nã yin nɩrhǝ̃ǝ̃lw. Gɩ̀-lǝ gùú yuugu dɩndɩn-i bà fínǝ̃́ǝ̃ ǹ-caliɛ lǝrɩ yin nɩrhǝ̃ǝ̃lw.

16 Yin nɩrhǝ̃ǝ̃lnã, puruɔntaabà mãã bà yáá bà bu gballiɛba, Sosuweẃ fǝ̃ǝ̃ ǹ-waa nǝ̃ Isɩrayɛl bluuba wà: «Bláà ɲì kaasǝraa, nã̀ã wa Fɩraa-Dũnnũẁ díilá lǝ díɛ̀ ɲì nãkruɔgɩ nã.

17 Lǝ díɛ̀, nǝ̃ dɩ̀ kusunã ɲinɲã min ɲã̀ ji dii ɲì hla ǹ-hã Fɩraa-Dũnnũ. Nǝ̃ Arhabɩ-lǝ, cijalw mãã wù suur wù hla wù hã bibyanããba, nǝ̃ bà minw mãã bà ga ba nǝ̃-yǝ wù duugɩ nã yi ji ya bá ba nũmǝ̃nãw, nã̀ã wa wùú ŋmǝ̃́ǝ̃rǝ̃́ǝ̃ tĩɛ̃taaba nã mãã yi yáá yìi tĩɛ̃ bá kã.

18 Mǝ̃́garà ɲí blǝ ɲì hla nãw dɩn-i, ɲi báa jĩɛ̃ kuu wo kuu nã mãã gɩ̀ ji ba bǝ̃ǝ̃lǝ̃m'n kuugu. Sulammã nã, gùú mãã ɲi kárrá gɩ̀ nã, wà gɩ saa nǝ̃ bǝ̃ǝ̃lǝ̃m-i, ɲi-ń tuu-gǝ, ɲi dii Isɩrayɛl bluu'n kuɔyaga min-i bǝ̃ǝ̃lǝ̃m'n hlũũgɩ nã, ɲi ga jo nǝ̃ yublaagu.

19 Jinɲã min, sãnã min, kwabyãr wariɛga min, nǝ̃ kwawariɛga min, ɲã̀ ji kra ǹ-hã Fɩraa-Dũnnũ-i, ɲã̀ ji jãn wù suɔ'n gbaasǝ'n ɲinɲã sǝ̃ǝ̃nã.»

20 Isɩrayɛl bluubá fǝ̃ǝ̃ ǹ-kaasǝraa nǝ̃ puruɔntaabá bu gballiɛba. Isɩrayɛl bluubà gáa nɔ̃ gballiɛ'n yallɩ nã, bá mǝ̃gaa ǹ-kaasǝraa bolbol, gɩ̀-i, lǝ'n dofũũlɩ́ fǝ̃ǝ̃ ǹ-duruu. Bá yugo ǹ-jãn lǝ'n kusuugu, curo wo curo wú vĩĩ wù yiganãyiɛgu. Bá fǝ̃ǝ̃ ǹ-ɲǝ̃ǝ̃ ǹ-hũɔ̃ lǝ díɛ̀,

21 ǹ-ba bà bǝ̃ǝ̃lǝ̃ǝ̃ dɩ̀ nã, kuu wo kuu mãã gɩ̀ yáá dɩ̀ kusunã, dãngunã nũɔ̃gɩ̀ híí-gǝ, bibyanãã, canãã, tãnkuuraa, vũnvãnãã, fuwɔ ǹ-ga hi ninɲã, tũmba, nǝ̃ kǝkũmnããba.

22 Sosuweẃ fǝ̃ǝ̃ ǹ-waa nǝ̃ bibyanããba hǝ̃ǝ̃lbaa nǝ̃n yáá bàa kãã ŋmã ǹ-dǝ̃ǝ̃ lǝri wà: «Jã́nnã̀ cijalw mãã wù suur wù hla wù hã bibyanããba, wù duugɩ nã, cíyà wú hlǝ nǝ̃ wù bluuba min nã́ã́ ɲi yáá ɲĩ̀ĩ waasǝ-dǝ nĩĩguu mãã.»

23 Ŋmãndǝ̃ǝ̃taaba hǝ̃ǝ̃l báàbá jãn Arhabɩ kuugɩ nã, ǹ-kãã hiil Arhabɩw, wù tǝw, wù ɲũw, wù tǝ̃ǝ̃ba nǝ̃ wù bluuba min. Bá kãã hiil wù suɔntaaba min, ǹ-kãã ɲãl-ba sɔhuhorgǝdagǝ nã, Isɩrayɛl bluu'n kuɔya'n taasǝ̃ǝ̃nǝ̃ǝ̃gu.

24 Bá fǝ̃ǝ̃ ǹ-tii lǝ díɛ̀ nǝ̃ dɩ̀ kusunã ɲinɲã min. Nã̀ã fǝ̃ǝ̃ ǹ-tuu jinɲã, sãnãw, nǝ̃ kwabyãr'n wariɛga ǹ-dii-ɲã Fɩraa-Dũnnũ suɔ'n gbaasǝ'n ɲinɲã sǝ̃ǝ̃nã

25 Sosuweẃ fǝ̃ǝ̃ ǹ-ya Arhabɩw, cijalw mãã wù suur wù hla wù bibyanããba wú ba nũmǝ̃nãw bá nǝ̃ wù suɔntaaba nǝ̃ wù bluuba min. Wù bla dàa Isɩrayɛl bluuba sǝ̃ǝ̃nã-i fuwɔ ǹ-ji hi jimããnããw, nã̀ã wa wù ŋmǝ̃́ǝ̃rǝ̃́ǝ̃ tĩɛ̃taabaa mãã Sosuweẁ yáá wùu tĩɛ̃ bá kã bà ga ŋmã ǹ-dǝ̃ǝ̃ Seriko lǝri.

26 Dɩ̀ cíé Sosuweẃ fǝ̃ǝ̃ ǹ-waasǝ wà: «Fɩraa-Dũnnũ yigagɩ nã, gùú bibiɛw mãã wù ji suro wà wu ver ǹ-mã Seriko lǝ díɛ́, wù cɔ̃mmã̀ bǝ̃́ǝ̃lǝ̃́ǝ̃! Wù byadĩɛ̃l'n yuugɩ̀ ji guu nã dɩ̀ dofũũl'n krammã nã, nǝ̃ wù byasaal'n yuugɩ́ guu nã lǝ'n dũndɔ̃lĩɛ̃'n fla'n diimã nã.»

27 Fɩraa-Dũnnũẃ ba nǝ̃ Sosuwew, bá ba bà waa wù cɔ̃mmã yiɛ gúɔ̀gɩ min nã.