Isɩrayɛl Bluu'n Waali (Exode) 32

Sãnã nǝ̃ǝ̃blɩ'n cɔ̃mmã

Isɩrayɛl bluubà gáa da Musaw yà ga hǝ̃ǝ̃sǝ, tãnũũgɩ nã wù sǝ nǝ̃ wù gǝǝ wù jo, bá juo tɩgii ǹ-cal Arɩnãw nã, nã̀ã waa nǝ̃-yǝ wà: «Suro n ga ce dũnnũdiɛ ń hã-yáà, wùú mãã wù ji ba wù ta yì yigagɩ nã, nã̀ã wa biɛ wáà mãã wù híilá-yáà Misɩra yiɛgu, wà Musa-i dàa bingǝ-i? Yí sǝ yìi fǝ̃ǝ̃ dìí nǝ̃n gáa hi-yǝ.»

2 Arɩnãẃ fǝ̃ǝ̃ ǹ-waa nǝ̃-ba wà: «Híilà gùú sãnã tũɔ̃nɩɲinɲãã mãã ɲì canããba, nǝ̃ ɲì bisii'n tɔ̃nɲã nã, nǝ̃ ɲì byanãã'n tɔ̃nɲã nã ɲi ji hã-m nǝ̃-ɲã.»

3 Isɩrayɛl bluubá ta ǹ-kãã hiil bà canããba nǝ̃ bà bisiiba nǝ̃ bà byanãã'n tũɔ̃nɩɲinɲã, ǹ-juo hã Arɩnãw.

4 Wú hũɔ̃ sãnã wáà bà saa ǹ-hãnãã wù nã, nã̀ã tuu kwabǝrkuugu ǹ-mã nǝ̃ǝ̃blɩw nǝ̃-yǝ. Isɩrayɛl bluubá ba bà waa huu, wà: «Yì dũnnũ wɩ̀-i nnĩĩ, wù-lǝ wùú híilá-yáà Misɩra yiɛgu.»

5 Arɩnãẁ gáa da-dǝ nnĩĩ nã, wú fǝ̃ǝ̃ ǹ-mã siijãnkuugu nǝ̃ǝ̃blɩ'n yigagɩ nã, nã̀ã hiil wù yalli ǹ-ba waa fãngããgɩ nã wà: «Cicuɔgu, yi ji ce paaruudagǝ ǹ-hã Fɩraa-Dũnnũw.»

6 Gɩ̀ taakaalciibǝǝgu, bá curo ǹ-suro ǹ-jãn siimãã mãã bà ye-mã nǝ̃ yellɩ nã, nã̀ã jãn paaruu'n siimã. Cwaabá jiraa ǹ-wuu wuuri, nã̀ã ɲũɔ̃ ɲããɲũɔ̃nɲã, nã̀ã suro ǹ-ba bà sa.

7 Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Hɩr ń kã ǹ bluubaa mãã ń híllá-ba Misɩra yiɛgu bà nãã, bà cíé diicĩɛ̃rǝbɩblar.

8 Bà páalá ǹ-nǝ̃nǝ̃ǝ̃ hlũũguu mãã mǝ̃̀ kárrá gɩ̀ nã ǹ-hã-ba, nã̀ã ce sãnã nǝ̃ǝ̃blɩw ǹ-kuulǝǝ wù yigagɩ nã ǹ-bũũ-yǝ, nã̀ã jãn siimãã ǹ-hã-yǝ, nã̀ã waa wà Isɩrayɛl bluu'n dũnnũ-i nǝ̃-yǝ, wà wùú híilá-ba Misɩra yiɛgu.»

9 Fɩraa-Dũnnũẃ ver ǹ-waa nǝ̃ Musaw hlo wà: «Mǝ̃̀ fǝ̃ǝ̃ bluu báà, bà tɔ̃nɲã̀ gbǝ̃ǝ̃.

10 Yindiɛ, ya mǝ̃́ ce-ba nǝ̃ mǝ̃̀ tammã. Mǝ̃̀ ji kã bà nãã nǝ̃ mǝ̃̀ hyadũũgu min ǹ-kãã guu bà nã, nã̀ã ce ǹ tãnkuuraa'n tãnkuuraabá ɲũrũɔ̃ ǹ-ce codũlli ǹ-hã-n.»

11 Nǝ̃ Musaẃ ver ǹ-ba wù jiɛriɛ nǝ̃ Fɩraa-Dũnnũw wà: «Fɩraa-Dũnnũ, hamã nã-i ń ba ǹ ji piɛ ǹ hyadũũgu ǹ bluuba drɔ? Nã̀ã ba nã̀ã ce ǹ nãkruɔ'n fãngããgu, nǝ̃ ǹ dũnnũsǝ'n fãngããgɩ́ hiil-ba Misɩra yiɛgu.

12 Nǝ̃-ń ce dɩ̀-lǝ, Misɩra yiɛntaabà ji ba bà waa wà Fɩraa-Dũnnũw cíé kusubɩblaa-i nã̀ã hiil Isɩrayɛl bluuba bà yiɛgu, ǹ-kãã ko-ba, tãnũnɲã nã, ǹ-guu bà nã cuu nã. Sɩrĩɛ̃ ǹ hiɛga nã, báa ce ǹ bluuba nǝ̃ diibɩblaari.

13 Kãnãã ǹ mããcieraabaa mãã Ibramãba nǝ̃ Isiyagaw, nǝ̃ Yakuba bà cɔ̃mmã nã ń ne, ǹ sáa waasǝ ǹ hla nǝ̃ bàá sǝ wà n ji ce bà furũntaabá ɲũrũɔ̃ nã́ã́ drɔŋmĩɛ̃-ì? Nã̀ã hã-ba nǝ̃ gùú yiɛguu mãã ǹ yáá nã̀ã pã ǹ nũɔ̃gu wà ń ji hã-ba nǝ̃-gǝ, gɩ̀ min gɩ́ ba bà furũntaa'n kuugu fɩraa.»

14 Gɩ̀-i, Fɩraa-Dũnnũẁ yáá wùu wa wú ce gùú diibɩblaarii mãã wù bluuba nã, wú fǝ̃ǝ̃ ǹ-hiil-dǝ wù kusuugɩ nã.

15 Musaẃ ver ǹ-hɩr tãnũũgɩ nã, nǝ̃ tɩntãnyanɲã hǝ̃ǝ̃lɲã Dũnnũ hlũũ'n nǝ̃ǝ̃yagàa yal ɲã̀ drɔ, yalɩmmã̀ yáá ɲã̀ yigasǝri nǝ̃ ɲã̀ furũsǝrɩ nã.

16 Tɩntãnyan ɲã́ã̀, Dũnnũ mããcem yáá, Dũnnũ nãkruɔgu nǝ̃ gɩ̀ hla, gùú yáá gùu yal ɲã̀ drɔ.

17 Sosuweẃ nɔ̃ kaasuudagɩ nã kuɔyaga nã, wú waa nǝ̃ Musaw wà: «Byar'n kaasuudaagɩ́ nàa kuɔyaga nã.»

18 Musaẃ ver ǹ-siɛ-yǝ wà: «Nǝ̃ gɩ̀ sǝ wà cwaa kã́ã́ ǹ-ga ce byaari nã̀ã gbǝ̃ǝ̃ bà ɲããtaaba nã, nã̀ã ba bà kaasǝraa bà jo, nǝ̃ gɩ̀ sǝ kwarɩm'n kaasuu. Mǝ̃n nɔ̃ paaruu'n hlãn-i.»

19 Bà mãã bà bla bà kuganãã kuɔya'n nũɔ̃gɩ nã, bá da kwal'n nǝ̃ǝ̃blɩw, nǝ̃ cwaabà sa. Musa hiɛgá dũ fuwɔ wú nǝ̃ǝ̃ ǹ-tĩɛ̃ tɩntãnyan ɲã́ã̀, ǹ-karaa ɲã̀ nã tãnũũ'n nĩɛ̃l nã.

20 Wú kãã tuu nǝ̃ǝ̃blɩ wáà, ǹ-kãã hyã-yǝ, nã̀ã tuu wù dɩgaliɛw ǹ-kãã jasǝ-yǝ ǹ-mɛ̃sã wù cuugu hũmmã nã, nã̀ã ce Isɩrayɛl bluubá ɲũɔ̃-mã.

21 Musaẃ nã̀ã fǝ̃ǝ̃ ǹ-waa nǝ̃ Arɩnãw wà: «Bluu báàbà cíé-n nǝ̃ bii nǝ̃-n suro ǹ-piɛ diicĩɛ̃rǝ díɛ́ dulli bà drɔ?»

22 Arɩnãẃ siɛ-yǝ wà: «Mǝ̃̀ yuuntii, báa ya ǹ hiɛgá dũ! Yíi yo ǹ fǝ̃́ǝ̃lã́ wà bluu báà nǝ̃ bàa hiraa diibɩblaarɩ nã-i.

23 Bà sórrá ǹ-ji waa nǝ̃-m wà mǝ̃́ suro ǹ-ce dũnnũw mãã wù ji ta bà yigagɩ nã, nã̀ã wa gùú biɛ mãã wù híilá-ba Misɩra yiɛgu, bà wáalá Musa-i dàa binɲin, bá sáa fǝ̃ǝ̃ dìí nǝ̃n gáa hi-yǝ.

24 Gɩ̀-i, mǝ̃́ fǝ̃ǝ̃ ǹ-waa nǝ̃-ba mǝ̃́ wa wùú nǝ̃n ba nǝ̃ sãnãw, wú kãã tuu ǹ-jo nǝ̃-yǝ, bá kãã jo nǝ̃-yǝ, mǝ̃́ hũɔ̃-yǝ ǹ-dii-yǝ dǝ̃ǝ̃mã nã, wú ce nǝ̃ǝ̃blɩw.»

25 Musaẃ juo da wà Arɩnãw yáá wùu nǝ̃nǝ̃ǝ̃ Isɩrayɛl bluuba nã, ǹ-ya bá ba curo wo curo, wú ba wù hla nã, ǹ-fǝ̃ǝ̃ ce bà ɲããtaabá ba bà hiil bà kwãmmã nã.

26 Gɩ̀-i, wú fǝ̃ǝ̃ ǹ-ta ǹ-kãã hiraa kúɔ́l'n nũɔ̃gɩ nã, nã̀ã hiil wù yalli ǹ-nãlĩɛ̃ wà: «Bàá mãã Fɩraa-Dũnnũ bɩgaaba, bá jo mǝ̃̀ nãã.» Levi nũɔ̃ntaaba min bá fǝ̃ǝ̃ ǹ-juo tɩgii ǹ-caliɛ wù nã.

27 Musaẃ fǝ̃ǝ̃ ǹ-waa nǝ̃-ba wà: «Fɩraa-Dũnnũw, Isɩrayɛl bluu'n Dũnnũw, Fɩraa-Dũnnũw, wù wa hããw, wà curo wo curo, wú tuu wù dãngunãw, ɲí ba ɲì taa kuɔya'n dũndɔ̃lĩɛ̃ga min, ǹ-tuu dɩ̀ yuugɩ nã fuwɔ gɩ̀ mlãrɩ nã, ɲí ko ɲì cwanããba, ɲì jambliɛba, nǝ̃ ɲì jirataaba.»

28 Levi nũɔ̃ntaabá nɔ̃ ǹ-hã Musaw fuwɔ yuu gúɔ̀ cwa toyur tũndii nǝ̃ cwa tonnũɔ̃sɔ̃ trãngwaahǝ̃ǝ̃lẃ^a ku.

29 Musaẃ fǝ̃ǝ̃ ǹ-waa nǝ̃-ba wà: «Halle ɲi-ń ba ɲì ji ko ɲì tãnkuuraaba, yindagǝ nã ɲì cwanããba, ǹ-dii ɲì hla ǹ-hã Fɩraa-Dũnnũw, ǹ-ba wùú tasǝrɩ nã, cíyà-dǝ, nǝ̃ wú piɛ wù nãkrɔfɩnfaagu ɲì drɔ.»

30 Gɩ̀ taakaalgu, Musaẃ fǝ̃ǝ̃ ǹ-waa nǝ̃-ba wà: «Ɲi cíé diicĩɛ̃rǝgǝ̃ngãrǝ. Yindiɛ mǝ̃̀ ji yuguraa ǹ-kã Fɩraa-Dũnnũw nãã, gɩ̀ hyãl wù ga wa wú ce ɲì gaacĩɛ̃ya'n dũndɔw.»

31 Gɩ̀-i, Musaẃ fǝ̃ǝ̃ ǹ-ver ǹ-yuguraa ǹ-kã Fɩraa-Dũnnũw nãã, ǹ-kãã waa nǝ̃-yǝ wà: «Bluu báàbà gáa ce diicĩɛ̃rǝgǝ̃ngãrǝ, bà gáa ce sãnã dũnnũw.

32 Mǝ̃̀ jiɛriɛ jiɛriɛ-i, ce kukuɔya nǝ̃ ń ce bà dũndɔw, nã̀ã wa gɩ-ń ba gɩ̀ sǝ dìí sǝ, ń hiil mǝ̃̀ yiiri sɛbɛw nã mãã ǹ yállá-yǝ.»

33 Fɩraa-Dũnnũẃ siɛ Musaw wà: «Ã-ãã, gùú tii mãã wu-ń ce ǹ-jãn mǝ̃̀ nã, mǝ̃̀ ji hu ǹ-suu wùú yiirɩ nã-i sɛbɛw kusunã.

34 Yindiɛ, maar n ga ta bà yigagɩ nã ń kã nǝ̃-ba mǝ̃̀ mãã wà ń kã nǝ̃-ba gùú sùɔ́gu. Mǝ̃̀ mɛlɛgɛẁ ga ta ǹ yigagɩ nã. Nǝ̃ mǝ̃n-lǝ, mǝ̃̀ ji piir-ba bà diicĩɛ̃rǝ'n cɔ̃mmã nã.»

35 Fɩraa-Dũnnũẃ juo piir Isɩrayɛl bluuba sãnã nǝ̃ǝ̃blɩ wáà cɔ̃mmã nã, Arɩnãẁ yáá wùu ce wùú mãã.