مسیحدَکی آزادلیق
۵
عیسی مسیح بیزی آزاد بُلماق اوچین آزاد اِتدی. شُنونگ اوچین-ده قاییم دورونگ، بِنده‌چیلیک یوغونی قایتادان بُیونا سالدیرمانگ.
۲ قولاق قُیونگ! اینه مِن، پولس، سیزه شونی دییَّرین: اِگِر سیز اُزونگیزی سونِّتلِتمَگه یُل بِرسِنگیز، اُندا مسیحینگ اِدِنلِری سیزینگ اوچین پِیداسیزدیر.
۳ اُزونی سونِّتلِتمَگه یُل بِرِن هِر بیر آداما مِن یِنه-ده بیر گِزِک شونی بِلّی اِدیَرین: اُل هِمّه شِریغاتی بِرجای اِتمَگه بِرگیلیدیر.
۴ اِی اُزونی شِریغاتینگ اوستو بیلِن تاقوالی بُلجاق بُلیانلار! سیز مسیحدِن آیریلدینگیز، خودایینگ مِرحِمِتیندِن ماحروم بُلدونگیز.
۵ بیز بُلسا مُقادِّس روحا دایانیپ، اومید باغلایان تاقوالی بُلمامیزا ایمان بیلِن قاراشیاندیریس.
۶ چونکی عیسی مسیحه باغلی بُلانلارینگ آراسیندا نه سونِّتلیلیگینگ، نه-ده سونِّتسیزلیگینگ اَهمییِتی باردیر. یِکه سُیگَه عِمِل اِدیَن ایمان اَهمییِتلیدیر.
۷ سیز شِیله قاوی یُرتیاردینگیز آخیرین. سیزی حاقیقاتا ایناندیرماجاق بُلوپ، کیم سیزینگ قادامینگیزا آیاق سالدی؟
۸ سیزی بو ایناندیرما چاغیریان خودایدان دَلدیر!
۹ بیرآز خامیرمایا هِمّه خامیری تورشودیاندیر.
۱۰ سیزینگ باشغا هیلی فیکر اِتمِجِکدیگینگیز باباتدا مسیح مِنی ایناندیریار. سیزینگ فیکرینگیزی بولاشدیریان کیم بُلسا بُلوبِرسین، اُل اُز جِزاسینی چِکِر.
۱۱ اِی عزیزلِریم! اِگِر مِن هِنیز-ده سونِّتلِنیلمَنی واغیظ اِدیَن بُلسام، اُندا مِن نَمه اوچین آزارلانیارقام؟ اِگِر دُغرودان-دا شِیله بُلیان بُلسا، اُندا عیسانینگ صلیبی باباتداقی واغظیم بودریمه داشی بُلمازدی.
۱۲ سیزی بولاشدیریان آداملار، قُی، اُز-اُزلِرینی دویبوندِن آغتا اِدَیسین!
مُقادِّس روحدا یاشاییش
۱۳ اِی عزیزلِریم! سیز آزاد بُلماغا چاغیریلانسینگیز. یُنه بو آزادلیغینگیزی اینسان هُوِسلِرینگیزی راضی اِتمِک اوچین پِیدالانمانگ. قایتام، بیری-بیرینگیزی سُیگی بیلِن خیدمات اِدینگ.
۱۴ چونکی هِمّه شِریغات: «هِمسایانگی اُزونگی سُیشونگ یالی سُی» دییِن بیر حُکومده جِملِنِندیر.*
۱۵ اِگِر سیز بیری-بیرینگیزی چِینِمِگی و اییمَگی دُوام اِتدیرسِنگیز، اُندا بیری-بیرینگیزی یُق اِتمِکدِن خاباردار بُلونگ.
۱۶ سیزه شونی آیداسیم گِلیَر: مُقادِّس روحونگ اُغروندان یُرینگ. شُندا سیز اینسان هُوِسلِرینی بِرجای اِتمِرسینگیز.
۱۷ چونکی اینسان هُوِسلِری مُقادِّس روحا قارشیدیر. مُقادِّس روح هِم اینسان هُوِسلِرینه قارشیدیر. اُلار بیری-بیری بیلِن هیچ اُنگوشمایارلار. شُنونگ اوچین-ده، سیز اُز ایسلَن زادینگیزی اِدیپ بیلمِیَرسینگیز.
۱۸ اِمّا اِگِر سیز مُقادِّس روحونگ طارافیندان هِدایت بُلسانگیز، شِریغاتا گُرَه یاشاماغا بِرگیلی دَلسینگیز.
۱۹ اینسان هُوِسلِرینینگ نِتیجه‌سی بِلّیدیر. اُلار: زیناکَرلیک، پَکسیزلیک و هِرزِچیلیک،
۲۰ بُت‌پَرَستلیک و دُغا-جادوگَرلیکدیر، دوشمانچیلیق، کینَه، ایچیغارالیق، قاهار، قیسغانچیلیق، جِدِل، بُلونیشیک
۲۱ و باخیل‍لیق، مِستلیک، یُلدانچیقارماق اُتورشیقلاری و شونگا مِنگزِش زاتلاردیر. مِن سیزه اُوال خابار بِرشیم یالی، یِنه-ده بیر گِزِک خابار بِریَریم: هِر کیم شولار یالی یاشایان بُلسا، خودایینگ پادیشاهلیغینی میراث آلماز.
۲۲ اِمّا مُقادِّس روحونگ میوه‌لِری بُلسا شولاردیر: سُیگی، شاتلیق، آسودالیق، صابیرلیق، مِهرِبانلیق، یاخشیلیق، وِفادارلیق،
۲۳ یومشاقلیق و اُز نِفسینگی ساقلاماق. بو زاتلارا تِرس چیقیان شِریغات یُقدور.
۲۴ عیسی مسیحه باغلی بُلانلار اُز اینسان هُوِسلِرینی و ایسلِگلِرینی صلیبه چویلَندیرلِر.
۲۵ اِگِر مُقادِّس روحا گُرَه یاشایان بُلساق، اُندا روحا گُرَه-ده گِزِیلینگ.
۲۶ شُهرَت پَرَست بُلمایلینگ، بیری-بیریمیزی قاهارلاندیرمایلینگ، بیری-بیریمیزه باخیل‍لیق اِتمَیلینگ.