پولس رِسول‍لار طارافیندان قابول اِدیلدی
۲
مِن اُن دُرت ییلدان سُنگ بارنابا بیلِن یِنه-ده اورشلیمه گیتدیم. بو گِزِک تیتوسی-دا یانیما آلیپ گیتدیم.
۲ مِنی اُل یِره خودایینگ ایلهامی آلیپ باردی. اورشلیمدَکی کِلیسانینگ یُلباشچیلاری بیلِن آیراتین دوشوشیپ، اُلارا یَهودی دَل‍لِره واغیظ اِدیَن خوش خاباریمی بِیان اِتدیم. مِن مونی هِمّه اِدِنلِریمینگ باری پوچ بُلماسین دییّپ اِتدیم.
۳ اُلار بُلسا یانیمداقی تیتوسی، حتّیٰ اُنونگ یونانیدیغینا-دا باقمازدان، اُنی سونِّتلِنمَگه مِجبور اِتمِدیلِر.
۴ سونِّتلِنمه مِسِله‌سی کَبیر دُغان یالیلار اوچین یوزه چیقیپدی. اُلار بیزی بِنده اِتمِک اوچین، آرامیزا اُغرینچا سوملوپ، عیسی مسیحینگ اوستو بیلِن آلان آزادلیغیمیزی اُغرینلیقدا گُزلِدیلِر.
۵ اِمّا خوش خابارینگ حاقیقاتی سیزینگ بیلِن قالسین دییّپ، بیز بو دُغان یالیلارا بیر فُرصَت-دا هِم راضیلاشیق اِتمِدیک.
۶ کِلیسانینگ یُلباشچیلاری مِنینگ واغیظ اِدیَن خوش خاباریما هیچ زات قُشمادیلار. اُلار کیم بُلسالار-دا، مانگا فارقی یُق، سِبَبی خودای آدامینگ داشینی باقمایار!
۷ اُندان باشغا کِلیسانینگ یُلباشچیلاری خوش خاباری یَهودیلِره واغیظ اِتمِکلیگینگ پِطرُسا بِرلیشی یالی، مانگا-دا یَهودی دَل‍لِره واغیظ اِتمِکلیگینگ بِرلِندیگینی گُردولِر.
۸ اُلار یَهودیلِره رِسول‍لیق اِتمَگه پِطرُسی بِلَّن خودایینگ مِنی-ده یَهودی دَل‍لِره رِسول‍لیق اِتمَگه بِلَّندیگینه،
۹ مانگا مِرحِمِت بِرلِندیگینه گُروپ بیلدیلِر. اُنسُنگ کِلیسانینگ سوتونلِری حاساپلانیان یعقوب، پِطرُس و یوحنا مانگا و بارنابا دُغانلیغینگ نیشانی حُکمونده اِل‍لِرینی اوزاتدیلار. مِن بارنابا بیلِن یَهودی دَل‍لِرینگ آراسینا، اُلار هِم یَهودیلِرینگ آراسینا گیتمِلی دییّپ، اُزآرا راضیلاشدیق.
۱۰ یُنه اُلار مَحتَجلیک چِکیَن دُغانلاری یاددان چیقارمان، اُلارا کُمِک اِتمِگیمیزی خاییش اِتدیلِر. مِن هِم مونی بِرجای اِتمِک اوچین اِلیمده بارینی قایغیرمادیم.
پولس انطاکیه‌ده پِطرُسینگ یالنگیشینی بِجِریَر
۱۱ پِطرُس انطاکیَه گِلِنده، اُنونگ اِدِن یالنگیشینی آچیقچا یوزونه آیدیپ، اُنگا تِرس چیقدیم.
۱۲ پِطرُس یعقوبینگ ایبِرِن آداملاری گِلمِزدِن اُزال، یَهودی دَل‍لِر بیلِن بیر ساچاق باشیندا اییّپ-ایچیَردی. اِمّا شُل آداملار گِلِنده، پِطرُس سونِّتلِنمِگینینگ طارافدارلاریندان قُرقوپ، یَهودی دَل‍لِردِن آیریلشیپ، اُلار بیلِن قاتناشیغی کِسدی.
۱۳ اُنونگ بیلِن بیرلیکده بِیلِکی یَهودیلِر هِم ایکی‌یوزلیک اِتدیلِر، حتّیٰ بارنابا هِم اُلارینگ ایکی‌یوزلیلیگیندِن یانگا دُغری یُلدان آزاشدی.
۱۴ مِن اُلارینگ اِدیَن حِرِکِتلِرینینگ خوش خابارینگ حاقیقاتینا لاییق دَلدیگینی گُردوم. شُندا مِن هِمّه‌لِرینگ اُوونده پِطرُسینگ یوزونه گِلیپ، شِیله دییدیم: «سِن یَهودی بُلسانگ-دا، یَهودیلِر یالی یاشامایارسینگ. سِن یَهودی دَل‍لِر یالی یاشایارسینگ. اُنسُنگ سِن نَمه اوچین یَهودی دَل‍لِری یَهودیلِر یالی یاشاماغا مِجبور اِدیَرسینگ؟»
۱۵ بیز آصلیمیزا گُرَه یَهودیدیریس، گونَه‌لی حاساپلانیان یَهودی دَل‍لِردِن دَلدیریس.
۱۶ آدام شِریغاتی بِرجای اِتمِگینگ اوستو بیلِن دَل-ده، دینگه عیسی مسیحه بُلان ایمانینینگ اوستو بیلِن آقلانیاندیر. مونی حتّیٰ بیز هِم بیلیَریس. شُنگا گُرَه-ده، بیز شِریغاتی بِرجای اِتمِگینگ اوستو بیلِن دَل-ده، عیسی مسیحه بُلان ایمانیمیزینگ اوستو بیلِن آقلانماق اوچین، اُنگا ایمان گِتیردیک. چونکی شِریغاتی بِرجای اِتمِگینگ اوستو بیلِن هیچ کیم آقلانیان دَلدیر.
۱۷ شِریغات بیزی، یَعنی مسیحینگ اوستو بیلِن آقلانماقچی بُلیانلاری هِم گونَه‌لی چیقاریار. اُندا مسیح گونَه‌نی قُلّایارمی؟ یُق، بو دویبوندِن بِیله دَل!
۱۸ مِن شِریغاتچیلیق بیناسینی ییقدیم. ایندی اُنی قایتادان دیکِلتسِم، اُندا شِریغاتی پُزیاندیغیمی اُزوم تاصدیقلایارین.
۱۹ شِریغاتینگ اُزی مِنی اُلومه مَحکوم اِتدی. شُنگا گُرَه-ده، مِن شِریغات اوچین اُلی بُلوپ، ایندی خودای اوچین یاشایاندیرین.
۲۰ مِن مسیح بیلِن صلیبه چویلِندیم، ایندی مِن دَل-ده، مِندَکی مسیح یاشایاندیر. بِدِندَکی یاشایشیم بُلسا خودایینگ اُغلونا بُلان ایمانیمینگ اوستو بیلِندیر. اُل مِنی سُیوپ، اُزونی مِنینگ اوچین قربانی اِتدی.
۲۱ مِن خودایینگ مِرحِمِتینی اینکَر اِتمِیَرین. چونکی شِریغاتی بِرجای اِتمِگینگ اوستو بیلِن آقلانیپ بُلیان بُلسادی، اُندا مسیحینگ اُلومی بیدِرِک بُلاردی.