دول آیال و عادالاتسیز قاضی میثالی
۱۸
سُنگرا عیسی شَگیرتلِرینه اُلارینگ هِمیشه خودایا دُغا اِدیپ، آصلا روحدان دوشمِزلیگینگ ضِرورلیغی حاقدا بیر میثال آیدیپ بِردی:
لوقا ۱۸:۱-۱۷
۲ «بیر شَهرده خودایدان قُرقمایان بیر قاضی بار میشدیق. اُل قاضی آداملاری اَسگِرمِیَن میشدیق.
۳ شُل شَهرده بیر دول آیال هِم بار میشدیق. اُل قایتالاپ قاضینینگ یانینا قاتناپ: ”داعواچیمدان مِنینگ حاقیمی آلیپ بِر“ دییّپ یالباریپدیر.
۴ قاضی بیرنَچه واقتلاپ مونی اِتمَندیر. آخیرسُنگوندا اُل اُز-اُزونه: ”مِن خودایدان قُرقماسام-دا، آداملاری اَسگِرمِسِم-ده،
۵ ایزینی اوزمَن گِلیپ، مِنی بیزار اِتمِز یالی، بو دول آیالینگ حاقینی آلیپ بِرِیین. ایندی بیر گِلیپ، مِنینگ قولاق اِتیمی قوراتماسین“ دییَّر.»
۶ عیسی یِنه سُزونی دُوام اِتدی: «عادالاتسیز قاضینینگ نَمه آیدانینا قولاق آسینگ.
۷ اِیسِم، خودای اُز سایلانلارینینگ، گیجه-گوندیز اُزونه یوز توتوپ فِریاد اِدیَنلِرینگ حاقینی آلیپ بِرمِزمی؟ اُلاری کَن گُزلِشدیرِرمی؟
۸ سیزه شونی آیدیارین: اُلارینگ حاقینی تیز آلیپ بِرِر. یُنه اینسان اُغلی گِلِنده، یِرینگ یوزونده ایماندار آدام تاپارمیقا؟»
فَریسی و مالییات آلیانچی میثالی
۹ اُز دُغرولیغینا بیل باغلاپ، بِیلِکیلِری کیچیلدیَن کَبیر آداملارا عیسی شو میثالی گورّونگ بِردی:
۱۰ «ایکی آدام خودایا دُغا اِتمِک اوچین عیباداتخانا گیدیَر. اُلارینگ بیری فَریسی، بِیلِکیسی مالییات آلیانچی میشدیق.
۱۱ فَریسی دوروپ، اُزی حاقدا ایچیندِن: ”خوداییم، مِن کَبیر آداملار یالی اُغور، تِلِکه، زیناکَر دَلدیگیمه، حتّیٰ بو مالییات آلیانچی یالی-دا دَلدیگیمه سانگا شوکور اِدیَرین.
۱۲ مِن هِفته‌ده ایکی گِزِک آرازا توتیارین، هِمّه قازانجیمدان اُندان بیرینی بِریَرین“ دییّپ دُغا اِدیَر.
۱۳ مالییات آلیانچی بُلسا اوزاقدا دوروپ، قاباغینی آسمانا قالدیرماغا هِم یورِک اِتمِیَر، قایتام قورساغینا اوروپ: ”خوداییم، مِن گونَه‌کَره رِحم اِت!“ دییَّر.
۱۴ مِن سیزه فَریسی‌نینگ دَل-ده، مالییات آلیانچینینگ آقلانیپ گیدِندیگینی آیدیارین، سِبَبی کیم اُزونی یُقاری توتسا پِسِلدیلِر، کیم اُزونی آشاق توتیان بُلسا بِیگِلدیلِر.»
چاغالار بیلِن عیسی
۱۵ سُنگرا باشلارینا اِلینی قُیسون دییّپ، آداملار چاغالاری عیسانینگ یانینا گِتیردیلِر. مونی گُرِن شَگیرتلِر چاغالاری گِتیرِنلِره کَیِدیلِر.
۱۶ اِمّا عیسی چاغالاری یانینا چاغیریپ: «چاغالاری مِنینگ یانیما گُیبِرینگ، اُلاری ساقلامانگ، سِبَبی خودایینگ پادیشاهلیغی شولار یالیلارینگقیدیر.
۱۷ سیزه دُغروسینی آیدیارین: کیم خودایینگ پادیشاهلیغینی چاغا یالی قابول اِتمِسه، اُل یِره آصلا گیریپ بیلمِز» دییدی.
بایلیق و اِبِدی یاشاییش
۱۸ بیر یُلباشچی عیسادان: «اِی یاخشی اُستاد! مِن اِبِدی یاشایشی میراث آلماق اوچین نَمه اِتمِلی؟» دییّپ سُرادی.
لوقا ۱۸:۱۸-۴۳
۱۹ عیسی اُنگا: «نَمه اوچین مانگا یاخشی دییَّرسینگ؟ یِکِجه خودایدان باشغا هیچ کیم یاخشی دَلدیر.
۲۰ سِن تابشیریقلاری بیلیَنسینگ: آدام اُلدورمه، زینا اِتمه، اُغورلیق اِتمه، یالان شاهاتلیق بِرمه، اِنه-آتانگا حُرمات قُی» دییّپ جُغاپ بِردی.*
۲۱ اُل آدام: «مِن بولارینگ هِمّه‌سینی یاشلیغیمدان بَری یِرینه یِتیریپ گِلیَرین» دییدی.
۲۲ عیسی مونی اِشیدِنده، اُنگا: «سِنینگ یِنه بیر کِمینگ بار. نَمَنگ بار بُلسا ساتیپ، قاریپلارا پایلا، شُندا آسماندا خازینانگ بُلار. سُنگرا گِل-ده، مِنینگ ایزیما دوش» دییدی.
۲۳ اُل بو سُزلِری اِشیدیپ، قاتی غاملی بُلدی، سِبَبی کَن بایدی.
۲۴ عیسی اُنونگ غاملیدیغینی گُروپ: «بایلارا خودایینگ پادیشاهلیغینا گیرمِک نَهیلی آغیر!
۲۵ بیر دویَه‌نینگ اینگَّه‌نینگ گُزوندِن گِچمِگی بای آدامینگ خودایینگ پادیشاهلیغینا گیرمِگیندِن آنگساتدیر» دییدی.
۲۶ مونی اِشیدِنلِر: «اُندا کیم نِجات تاپیپ بیلِر؟» دییّپ سُرادیلار.
۲۷ عیسی: «اینسان اوچین مومکین دَل زاتلار خودای اوچین مومکیندیر» دییدی.
۲۸ پِطرُس اُنگا: «اینه، بیز هِمّه زادیمیزی تِرک اِدیپ، سِنینگ ایزینگا دوشدوک!» دییدی.
۲۹-۳۰ عیسی اُلارا: «سیزه دُغروسینی آیدیارین: هِر کیم خودایینگ پادیشاهلیغینینگ خاطیراسی اوچین اُیونی، آیالینی، دُغانلارینی، اِنه-آتاسینی و اُغلانلارینی تِرک اِدِن بو زاماندا ایزینا نَچه بِرابار کَن اِدیپ آلار، گِلجِک زاماندا بُلسا اِبِدی یاشایشا قاوشار» دییدی.
عیسی اُلوپ دیرِلجِگینی یِنه آیدیار
۳۱ عیسی اُن ایکی شَگیرتلِری بیر چِته چِکیپ، اُلارا: «ایندی اورشلیمه باریاریس. پیغامبارلارینگ اینسان اُغلی حاقدا یازانلارینینگ هِمّه‌سی بِرجای بُلار!
۳۲ اُل بیگانه میلِّتلِرینگ اِلینه بِرِرلِر. اُلار اُنونگ اوستوندِن گولِرلِر، اُنی ماسغارالارلار، اوستونه تویکورِرلِر، قامچیلارلار و اُلدورِرلِر.
۳۳ اِمّا اوچولِنجی گون اُل دیرِلِر» دییدی.
۳۴ شَگیرتلِر بو زاتلارینگ هیچ بیرینه دوشونمِدیلِر. بو سُزلِرینگ مَعنیسی اُلاردان گوزگین بُلدی. اُلار اُنونگ نَمه حاقدا گورّونگ اِدیَنینی بیلمِدیلِر.
بیر کُرونگ گُزی آچیلیار
۳۵ عیسی اَریحا قُلایلاندا، یُلونگ قیراسیندا بیر کُر آدام دیلِگچیلیک اِدیپ اُتیردی.
۳۶ اُل یانیندان جِماغاتینگ گِچیپ باریاندیغینی اِشیدیپ، مونونگ نَمِدیگینی سُرادی.
۳۷ اُنگا: «ناصِره‌لی عیسی گِچیپ باریار» دییّپ خابار بِردیلِر.
۳۸ شُندا اُل: «اِی داوود اُغلی عیسی! مانگا رِحم اِت!» دییّپ قیغیردی.
۳۹ سِسینگ چیقماسین دییّپ، اُودِن باریان کَن آداملار اُنگا کَیِدیلِر، اِمّا اُل: «اِی داوود اُغلی! مانگا رِحم اِت!» دییّپ، اُنگکودِن هِم قاتی قیغیردی.
۴۰ عیسی دوردی-دا، اُل آدامی گِتیرمِکلِرینی بویوردی. یانینا گِلِنده، عیسی اُندان:
۴۱ «سِنینگ اوچین نَمه اِتمِگیمی ایسلِیَرسینگ؟» دییّپ سُرادی. اُل: «آقام، گُزلِریم آچیلسین» دییدی.
۴۲ عیسی اُنگا: «دِگمه، گُزلِرینگ آچیلسین! ایمانینگ سانگا شِفا بِردی» دییدی.
۴۳ شو واقتدا بو آدامینگ گُزلِری آچیلدی و اُل هِم خودایی بِییکلِندیریپ، عیسانینگ ایزینا دوشوپ گیدیبِردی. مونی گُرِن هِمّه خالق خودایی شوکور اِتدیلِر.