آدامی نَمه نِجیس اِدیَر؟
۱۵
سُنگرا کَبیر فَریسی‌لِر بیلِن دین عُلَمالار اورشلیمدِن عیسانینگ یانینا گِلیپ، اُندان:
۲ «نَمه اوچین سِنینگ شَگیرتلِرینگ آتا-بابالارینگ عاداتینی پُزیارلار؟ اُلار ناهار اییِنلِرینده نَمه اوچین اِل‍لِرینی یوومایارلار؟» دییّپ سُرادیلار.
۳ عیسی اُلارا شِیله جُغاپ بِردی: «سیز نَمه اوچین اُز سونِّتلِرینگیزینگ خاطیراسینا خودایینگ حُکوملِرینی پُزیارسینگیز؟
۴ خودای: ”اِنه-آتانگا حُرمات قُی“ و ”اِنه‌سینه یا-دا آتاسینا قارغان آدام اُلومه حُکوم اِدیلسین“ دییّپ آیدیپدی.*
۵-۶ اِمّا سیز اِنه-آتاسینا: ”مِن سیزه کُمِک اِدیپ بیلجِک دَل. سیزه بِرمِگی نییِت اِدِن زاتلاریمی مِن خودایا صاداقا بِردیم“ دییّپ آیدیانا اُنونگ اِنه-آتاسینا حُرمات قُیماغی حُکمان دَل دییَّرسینگیز. شِیدیپ، سونِّتلِرینگیزینگ خاطیراسینا خودایینگ حُکوملِرینی پُزیارسینگیز.
۷ اِشعیا پیغامبار سیز ایکی‌یوزلیلِر حاقدا دُغری نبوّتلیق اِدیپدیر! اُندا شِیله یازیلان:
۸ ”بو خالق مِنی دیلینده حُرماتلایار،
اِمّا یورِگی مِندِن اوزاقدیر.
۹ بیدِرِک یِره مانگا عیبادات اِدیَرلِر،
تَعلیمات دییّپ اُورِدیَنلِری اینسان دِستورلاریدیر.“»*
۱۰ عیسی جِماغاتی یانینا چاغیریپ، اُلارا: «دینگلَنگ، دوشونینگ!
۱۱ آغزا گیرِن زات آدامی نِجیس اِدیَن دَلدیر، آدامی آغیزدان چیقیان زات نِجیس اِدیَندیر» دییدی.
۱۲ سُنگرا شَگیرتلِر گِلیپ، اُندان: «فَریسی‌لِرینگ بو سُزی اِشیدیپ، نارضا بُلاندیقلارینی بیلیَرسینگمی؟» دییّپ سُرادیلار.
۱۳ عیسی: «آسمانداقی آتامینگ اِکمِدیک هِر بیر اُسوملیگی کُکی بیلِن سُغرولار.
۱۴ اُلارا زات دییمَنگ، اُلار کُرلِری قُلّایان کُرلِردیر. کُر-کُری قُلّاسا، اُلارینگ ایکیسی هِم چوقورا قاچار» دییّپ جُغاپ بِردی.
۱۵ پِطرُس اُنگا: «بیزه بو میثالی دوشوندیریپ بِر» دییدی.
۱۶ عیسی هِم شِیله دییدی: «سیز هِنیزِم دوشونِنگزُقمی؟
۱۷ آغزا گیرِن هِر بیر زادینگ اَوَّل قارنا باریپ، اُل یِردِن هِم داشاری چیقیاندیغینی بیلمِیَرسینگیزمی؟
۱۸ اِمّا آغیزدان چیقان زاتلار یورِکدِن چیقیپ، آدامی نِجیس اِدیَر.
۱۹ آدامینگ یورِگیندِن تِلِکه فیکرلِر، قاتل‍لیق، زیناکَرلیک، آخلاقسیزلیق، اُغورلیق، یالان شاهاتلیق و تُهمِت چیقیاندیر.
۲۰ آدامی شو زاتلار نِجیس اِدیَر، یووولمادیق اِل بیلِن ناهار اییمِک آدامی نِجیس اِتمِیَر.»
کنعان‌لی آیالینگ ایمانی
۲۱ عیسی اُل یِردِن چیقیپ، صور و صیدون تُوِرِگینه گیتدی.
۲۲ اُل یِرده بیر کنعان‌لی آیال عیسانینگ یانینا گِلیپ: «اِی آقام، داوود اُغلی، مانگا رِحم اِت! قیزیم دیوانا، اُل یامان حُرلوق چِکیَر» دییدی.
۲۳ اِمّا عیسی اُنگا هیچ بیر جُغاپ بِرمِدی. شُندا شَگیرتلِری اُنونگ یانینا گِلیپ: «اُنی یُلا سال، یُغسام ایزیمیزدان یُنه قیغیریپ گِلیَر» دییّپ خاییش اِتدیلِر.
۲۴ عیسی هِم: «مِن یِکه اسرائیل خالقینینگ ییتِن قُیونلارینا ایبِریلدیم» دییّپ جُغاپ بِردی.
۲۵ اِمّا اُل آیال قُلایینا گِلیپ دیزا چُکدی-ده: «آقام، مانگا کُمِک اِت» دییّپ یالباردی.
۲۶ عیسی اُنگا: «فِرزِنتلِرینگ چُرِگینی آلیپ، ایتلِره زینگماق دُغری دَلدیر» دییدی.
۲۷ آیال هِم: «هاووا، آقام! یُنه ایتلِر هِم ساچاق باشیندا دُکولِن چُرِک اُونوقلاریندان اییَّندیر» دییدی.
۲۸ شُندا عیسی اُنگا: «اِی آیال، سِنینگ ایمانینگ بِییک! سانگا ایسلِیشینگ یالی بُلسون!» دییدی. اُل آیالینگ قیزی شُل واقتینگ اُزونده شِفا تاپدی.
عیسی دُرت مونگ آدامی دُیوریار
۲۹ عیسی اُل یِردِن قایتدی و جلیل دِریانینگ قُلایینا گِلیپ، بیر داغینگ اوستونه چیقیپ اُتوردی.
۳۰ اُنونگ یانینا بیر اولی جِماغات گِلدی، اُلارینگ آراسیندا آغساقلار، ماییپلار، کُرلِر، لال‍لار و یِنه-ده بیر تُپار مِریضلِر باردی. اُلاری گِتیریپ، عیسانینگ آیاغینینگ اُوونده قُیدولار. اُل هِم بولاری شِفا بِردی.
۳۱ خالق لال‍لارینگ کِپلِیَندیگینی، ماییپلارینگ شِفا تاپاندیغینی، کُرلِرینگ گُریَندیگینی، آغساقلارینگ یُریَندیگینی گُروپ حایران قالدیلار. اُلار اسرائیل خودایینی اُودیلِر.
۳۲ عیسی شَگیرتلِرینی یانینا چاغیریپ: «بو جِماغاتا یورِگیم آوییار! بولار اوچ گون بَری مِنینگ یانیمدا، اییمَگه هِم هیچ زاتلاری یُق. یُلدا ایسغیندان قاچماسینلار دییّپ، اُلاری آچ گُیبِرِسیم گِلِنُق» دییدی.
۳۳ شَگیرتلِر اُنگا: «بِیله اولی جِماغاتی دُیرار یالی، بو بُش یِرده بیز چُرِگی نیرِدِن آلایلی؟» دییدیلِر.
۳۴ عیسی اُلاردان: «نَچه چُرِگینگیز بار؟» دییّپ سُرادی. اُلار: «یِدی چُرِک بیلِن بیرنَچه اُونوق بالیغیمیز بار» دییدیلِر.
۳۵ عیسی جِماغاتا یِرده اُتورماغی تابشیردی.
۳۶ یِدی چُرِک بیلِن بالیقلاری آلیپ، شوکور اِدِنیندِن سُنگ، اُلاری بُلوشدیریپ، شَگیرتلِرینه بِردی، شَگیرتلِری هِم اُلاری جِماغاتا پایلادیلار.
۳۷ هِمّه‌لِر اییّپ دُیدولار و آرتان چُرِک بُلِکلِری یِدی سِبِد بُلدی.
۳۸ اییِنلِر آیال‍لار و چاغالاردان باشغا دُرت مونگ آدامدی.
۳۹ عیسی جِماغاتی اوغرادانیندان سُنگ، قاییقا مینیپ، مَجدَلینگ تُوِرِگینه گیتدی.