22
1 As d-itawaɣdar abaydag ehad itaggaz ehan iyyan, tǝzzar tǝggaz-tu tawatay daɣ-as tǝkkasat iman, wǝdi wǝr z'attarmas awedan waliyyan ǝs tǝmattant-net. 2 Mišan as imos as ezal ad iga awen, ǝddi wa t-inɣan ad attarmas s igi ǝn man. Abaydag kul iwar-tu ad irzǝm ǝlqimat n awa okar. As wǝr ila wala, a din-itǝwǝzǝnzu ǝnta iman-net, iqqǝl akli, fǝl ad irzǝm arat wa okar. 3 As okar ǝmudar imosan azgar madeɣ ajad, madeɣ akar, har d-ittǝrmas ǝllan ɣur-ǝs harwada ǝddaran, ǝddi ǝkkullu n iyyan daɣ-san ad t-irzǝm s ǝnǝtfus.
4 As izzogaz awedan eharay-net isǝgyak-net, madeɣ afarag-net a daɣ inbal alɣanab, tǝzzar okay ǝs sǝgyak n iyyan, wǝdi a das-irzǝm baṇṇa wa das-iga da s arat ogdan ǝd tǝnfa ta tofat daɣ ǝsǝgyǝk-net madeɣ afarag-net wa n alɣanab.
5 As issǝrɣa awedan temsay, tǝllǝmlam-in izǝlan har tewad alkama n anarag-net gǝr za imos šibolasen wala ewâd ǝmilǝy ɣas wala deɣ sǝket a d-idwal, awedan wa igan eqqad wen, iwar-tu ad irzǝm a wa issǝqqad.
6 As issǝɣlaf awedan anarag-net azrǝf madeɣ ilalan, har fall-as tan-aba, wǝdi as d-igraw abaydag wa okaran aratan win, ad irzǝm ǝnǝtfus-nasan. 7 As imos as wǝr d-itawagraw abaydag, a d-asu alǝs wa fǝl ǝmmokaran lalan akku edag n ǝššǝriɣa fǝl ad itǝwǝssǝn kud ǝnta a okaran ilalan en wala.
8 Batu kul ta tǝqqalat tǝmazaq, gǝr za tǝga fǝl azgar, wala ajad, wala texsay ǝndǝrrat, wala asalsaw, wala arat kul wa aba as itiwanna i-net, wǝdi elǝkan gǝr meddan win di ad ammazzayan ɣur adag n ǝššǝriɣa. Wa daɣ-san udan, ad irzǝm y anarag-net wen ǝnǝtfus n arat wa fǝl ǝgan elǝkan.
9 As issǝɣlaf awedan iyyan ajad, madeɣ azgar, madeɣ texsay madeɣ ǝsǝnǝy, madeɣ ǝmudar iyyan a iqqal, har immut, madeɣ irrǝz, madeɣ immoɣa, da wǝr t-inay awedan waliyyan, 10 ǝddi ad ihǝd alǝs wa n ǝnaɣlif a as wǝr oker ares n anarag-net. As iga adi mǝššis n ǝrrǝzǝɣ wǝdi, ad iqbǝl tahuday ten, aqqam alǝs wa n ǝnaɣlif da wǝr irzem wala. 11 Mišan as imos as ǝmikǝr a daɣ-as iga ǝmudar wen, wǝdi ad t-irzǝm. 12 As imos as awaqqas iyyan a itšan ǝmudar wen, wǝdi awa daɣ-as d-iqqiman a d-ammaway iqqǝl tǝgǝyya. As iga adi alǝs wen wǝr tu-z-ǝwǝran ǝrruzmatan.
13 As d-iffad awedan tamara har ɣur-ǝs tǝrrǝz madeɣ tǝmmut wǝr iqqim mǝššis, wǝdi a das-tat-irzǝm. 14 As imos as iqqim mǝššis, wǝdi wǝr tat-z-irzǝm. As imos as ǝmudar wa ɣufar a t-iga alǝs wa, wǝdi arat wa iɣšadan da ad t-izǝl arat wa fǝl itawaɣfar ǝmudar.
15 As imos as illǝɣdat alǝs tǝbarart wǝr nǝzday meddan har tat-izna, wǝdi ilzam-tu ad irzǝm taggalt izlǝf-tat. 16 As imos as ugay šis ǝn tǝbarart s a tat-z-izlǝf alǝs wen, wǝdi ad irzǝm alǝs wa a ogdân ǝd taggalt ǝn tǝbarart wǝr nǝzday meddan.»
Šijǝrak šin as tǝtawaxkam tǝmattant
17 «Ad wǝr tayyaɣ a imosan ǝkǝrkǝwwi iddaran.
18 Awedan kul wa iznan ǝmudar n aharay, wǝdi a daɣ-as tǝwǝkkǝsan man.
19 Awedan kul wa igan tǝzǝgzǝmt i malan wiyyad wǝr nǝmos Amaɣlol, ilzam a daɣ-as tǝwǝkkǝsan man.»
Ǝššǝriɣa wa iqqalan masnat daɣ nǝrkam
20 «Ad wǝr tǝdaggazaɣ awedan imosan ǝnaftaɣ iɣsaran daɣ akal-nak, wala tǝšahaššalaq-qu a kay anfu s arat waliyyan, kattiwat-du iman-nawan harwa tǝmosam inaftaɣan ǝɣsarnen daɣ Masar. 21 A dak-wǝr-ilkǝm ad tǝdgazaɣ ǝgugel wala tantut as aba alǝs-net. 22 As tan-tǝdgazam s asaway a iqqal, a igan da a sǝr-i d-awǝyan tala-nasan. Ǝddi amaran illikan as a dasan-aslaɣ, 23 iggǝz-i alham-nawan, awǝya-du sǝr-wan ǝmǝgǝr a kawan-z-iɣrǝdan, ǝggǝznat tǝdoden-nawan ifartayan, ǝqqǝlan deɣ bararan-nawan igugelan.
24 As tǝzabaneɣ azrǝf i tǝlǝqqay tǝmosat arat daɣ tamattay-nin a dǝr tǝhhiraga, a das-wǝr-tagaɣ y-as tehakkay ta taggin aytedan win tizǝbǝnitnen fǝl riba. A daɣ-as wǝr tǝgmǝya tǝttǝyt iyyat fǝl awa das-tǝzabane.
25 As tobazaɣ abargan n awedan as tareɣ a tu-tǝttǝfa har dak-irzǝm, tǝssuɣǝlaɣ-as-tu dat agadal ǝn tǝfuk. 26 Abargan wen, ǝnta ɣas a ilassu, daɣ adi as das-t-in-wǝr-tǝssoɣala dat agadal ǝn tǝfuk ma z'alsu? As sǝr-i d-eway tala-net, a das-asla ǝssǝna daɣ-as, fǝlas nak ǝmǝggi n arraxmat a mosa.»
Ǝššǝriɣa wa iqqalan alxaqan win fall-anaɣ ila Mǝššina
27 «Ad wǝr tǝtakkasa tarna i Mǝššina, wala tǝlaɣɣanaɣ ǝmǝnokal ǝn tamattay-nak.
28 Ad wǝr tǝtiluleɣ wǝr di-tǝkfeɣ adagar-in daɣ tǝnfa ta tazzarat a du-tolaya daɣ sǝgyak-nak, ǝd tǝnfa ta tazzarat tǝgrawa daɣ aman n alɣanab ikkizaman, ǝd widi n azzaytun, takfaɣ-i deɣ barar-nak wa n aɣafadday. 29 Awen daɣ a za taga daɣ aharay-nak wa zǝwwǝran ǝd wa ǝndarran; ara wa azzaran, ad agu ǝssa adan ɣur mas, amaran ǝzǝl wa n ǝttam takfaɣ-i-tu. 30 Iwar-kawan ad tǝmosam tamattay a sǝr-i tǝskatat. Daɣ adi ad wǝr tǝtattim isan n ǝmudar izizarrat awaqqas, kalar ǝgǝrat-t-in i dan.»