21
Ǝššǝriɣa wa iqqalan eklan
1 Inna Amaɣlol i Musa: «Ǝššǝriɣa da wa za tǝssǝbdǝdaɣ i Kǝl-Israyil: 2 As du-tǝzzǝnzaɣ akli imosan iyyan daɣ Kǝl-Ɣibri, wǝdi tǝle turagat n a tu-tǝššǝšɣǝla har sǝdis elan. As iga awatay wa n ǝssa, tǝsaddarfaq-qu da wǝr t-ǝweran ǝrruzmatan ǝn wala. 3 As imos as ɣur nazzan-nak y as imos ǝnǝmmeɣrǝs, wǝdi ad aglu ɣas-net. Kud amaran kala da ila tantut, wǝdi a dǝr-ǝs idaw. 4 As imos as izzǝzlaf-tu mǝššis, tǝzzar ila ǝd tǝntut-net bararan ǝd tǝbararen, wǝdi tantut ten, ǝd bararan-net, kul ad aglin ǝhan tǝla ǝn mǝššis, addarfat ǝnta ɣas. 5 Mišan as d-inkar ǝkli wa inna: "Nak mǝšši areq-qu, areɣ tantut-in ǝd bararan-in, wǝr areɣ tǝdarfit", 6 a dǝr-ǝs akku mǝššis edag n ǝššǝriɣa, izzǝhǝz-in akli tǝsǝhǝrt n ahan ǝd tǝfasasen-net šin tamawen, ibǝd tǝmǝzzuk n ǝkli en s endal, iggǝz tǝla-net har faw.
7 As din-izzǝnza alǝs tǝbarart-net y ad tǝqqǝl taklit, wǝdi wǝr za taddarfat s asaway was tadarfen eklan win yayyan. 8 As tat-iksan mǝššis dǝffǝr ǝsǝnnǝfrǝn wa tat-iga tǝqqal tantut-net, wǝdi a tat-isǝddǝrfǝt. Wǝr ila turagat n a tat-in-azzanzu i tawšet iyyat ǝn tama, fǝlas ǝnta a das-igmadan arkawal. 9 As imos as isannafran-tat i barar-net, wǝdi iwar-tu a das-agu iduf wa daɣ iga i tǝbararen-net, ifǝl-tat esǝm wa n ǝkkǝlu. 10 As d-izlaf tantut iyyat, wǝdi tantut-net ta tazzarat, wǝr ila turagat n a fall-as assabu imensewan, wala tabdoq, wala deɣ alxaqan win fall-as tǝla daɣ tarrayt ta tǝqqalat azalaf. 11 As das-ugay s iyyan daɣ aratan win karad di, wǝdi tǝla turagat n ad taglu tammazzay dǝr-ǝs, da wǝr das-tǝrzem wala.»
Tewatay n awedan madeɣ ǝsǝbbusi-net
12 «As iwat awedan iyyan har t-aba, wǝdi wa t-iwatan ǝddi, attadib-net tǝmattant. 13 Mišan ya, as imos as alǝs wa as iwat wa hadan wǝr igmay s awen iman-net, imos as ǝlɣǝdǝr ɣas a t-ewadan, wǝdi a dak-ǝmǝlaɣ edag was z'addarrag. 14 Mišan as d-inkar awedan iga iman n iyyan s ǝttǝnǝgmur, wǝdi kud iggaz edag wa daɣ-i tawagginat tǝkutawen da iwar-kay a t-idu-tǝkkǝsa daɣ-as, tǝxkǝmaɣ-as tǝmattant. 15 I daɣ-wan iwatan abba-net madeɣ anna-net, wǝdi ǝššǝriɣa-net tǝmattant.
16 I daɣ-wan ikfalan iyyan wǝdi ǝššǝriɣa-net tǝmattant, gǝr za y a t-in-azzanzu, wala deɣ ag-ay akli.
17 I daɣ-wan isaffallasan abba-net madeɣ anna-net, wǝdi ǝššǝriɣa-net tǝmattant.
18 As ǝknasan aytedan, iwat iyyan daɣ-san wa hadan ǝs tǝhunt, madeɣ idag-as s ǝfus-net, amaran wǝr das-iqqel awen ǝssǝbab, mišan ya har izalallat, 19 as imos as dǝffǝr awen inkar-du ifrag teklay s ǝsǝdǝd, wǝdi alǝs wa t-iwatan wǝr t-obez ǝššǝriɣa ǝs wala. Ǝrruzmatan ɣas a das-z-agu alxaq ǝn tamert ta iga oyya ǝššǝɣǝlan-net, iwar-tu deɣ ǝsǝmmǝgǝl-net har izzǝy.
20 I daɣ-wan iwatan akli-net madeɣ taklit-net ǝs tǝburǝk, kud za aba akli wen ɣur tǝwit šin, awedan wǝdi ad awwaddab, 21 Mišan as iga ǝzǝl madeɣ ǝššin iddar dǝffǝr awen, wǝdi mǝššis wǝr z'awwaddab fǝlas azrǝf-net a t-id-izzǝnza.
22 As imos as ǝknasan meddan har ǝstaban i tǝntut tǝgat tadist, eway-du sǝr-ǝs awen iguz n ǝmzur, mišan ya wǝr d-eway awen tǝkma iyyat labasat, wǝdi alǝs wa d-ewayan ǝlɣǝdǝr wa, ad irzǝm addayyat ta imal alǝs ǝn tǝntut ten, ǝs tǝrǝddawt n awedan wa dasan-imosan ǝlqali. 23 Mišan as d-eway arat wǝdi tǝkma iyyat, wǝdi ad tǝzzǝrzǝma iman ǝs man, 24 tǝzzǝrzǝma šat ǝs šat, irzǝm ašen s ašen, ǝfus s ǝfus, adar s adar, 25 tewaɣday ǝs tawaɣday, abus s ǝbus, ǝbudǝd s ǝbudǝd.
26 As iwat awedan akli-net madeɣ taklit-net daɣ šat, ig-as awen šat, wǝdi ad t-isǝddǝrfǝt imos awen alxaq ǝn šat-net. 27 As d-irza ešen-net, ad t-isǝddǝrfǝt ǝntada.
28 As idag azgar awedan s asak-net aba-tu, azgar wǝdi ad ammat ǝs tǝgur ǝn tǝhun, amaran wǝr z'ammatšin ṣan-net, mišan mǝššis wǝr z'irzǝm addayyat waliyyat fǝlas wǝr t-iwer lahan n awen. 29 Mišan ya as imos as azgar wa dat awen da imos alxal-net tenaɣay n aytedan, amaran ittǝmal awen i mǝššis eges wǝr das-inked, azgar wǝdi as inɣa awedan aba-tu, ad ammat ǝs tǝgur ǝn tǝhun, tǝzzar tǝtǝwǝxkǝm tǝmattant i mǝššis. 30 Amaran as igraw ikus ǝn man-net, ad irzǝm arat a iqqal wa daɣ-as itawagmayan. 31 As imos as barar, madeɣ tabarart a inɣa azgar wa, ad itǝwǝxkǝm s ǝmmǝk wǝdi da. 32 As imos as inɣa azgar akli madeɣ taklit, wǝdi ad irzǝm mǝššis i wa n ǝkli karadat tǝmǝrwen ǝn tafelt n ǝzrǝf, tǝzzar ammat azgar ǝs tǝgur ǝn tǝhun.»
Ǝššǝriɣa wa iqqalan šijǝrak
33 «As imos as olam awedan anu oyy-ay wǝr t-iher, madeɣ iɣaz-tu oyy-ay da wǝr t-iher tǝzzar iqqal-tu azgar, madeɣ ajad, 34 awedan wǝdi, iwâr-tu ad irzǝm i mǝššis n ǝmudar wǝdi azrǝf wa tewad ǝlqimat-net, ilu amaran ǝnta ǝmudar wa ammen den. 35 As idag azgar n awedan in iyyan s asak-net immut, a din-anzu azgar wa iddaran uzanan attaman-net, uzanan deɣ isan ǝn wa ammen. 36 Mišan as tǝga masnat daɣ as azgar wen imos alxal-net tenaɣay ǝn zǝgran, amaran wǝr das-inked mǝššis, wǝdi iwar-tu ad irzǝm azgar wǝdi s iyyan, tǝzzar ilu ǝnta wa ammen. 37 As okar awedan ǝsǝnǝy madeɣ texsay, igzam-tu madeɣ izzǝnz-ay-in, wǝdi iwar-tu ad irzǝm ǝsǝni wǝdi ǝs sǝmmos sǝnay, kud deɣ texsay a okar, ad tat-irzǝm s ǝkkozat.