20
Alwajiban win maraw
1 Iššewal Mǝššina imal aratan win kul, inna: 2 «Nak a imosan Amaɣlol, Ǝmǝli-nak, was ǝnta kay d-ikkasan daɣ Masar as kala daɣ-as tǝmosaɣ akli.
3 Ad wǝr tileɣ ǝmǝli a di wǝr nǝmos.
4 Ad wǝr tǝtaggaɣ šaššelan n arat waliyyan gǝr za iha ijǝnnawan, wala iwar amadal, wala deɣ iha igǝrwan y ad iqqǝl ǝssǝnǝm. 5 Ad wǝr tǝssǝjǝda y a iqqal ǝssǝnǝm wala tǝɣbǝdaq-qu, fǝlas nak a imosan Ǝmǝli-nak, amaran wǝr ǝqbelaɣ a imosan akna. Aytedan win maksanan-in, attadib a tan-tagga a tan-z-izzǝrgǝzan har hayawan-nasan win karad, madeɣ win ǝkkoz. 6 Mišan win di-ǝranen ǝbbirdagan y alwajiban-in, win di har hayawan-nasan win ǝgim da a fall-asan zǝzzǝbbeɣ tara-nin wǝr nǝtǝmǝttǝy.
7 Ad wǝr tǝtaggaɣ esǝm-in daɣ aratan a sǝr-i du-wǝr-neway ǝtǝwǝsǝɣmar, fǝlas nak Amaɣlol di n Ǝmǝli-nak, attadib a taggaɣ awedan kul wa wǝr nǝssǝfrar esǝm-in.
8 Kattu ǝzǝl wa n tǝsanfawt, tagaq-qu ǝzǝl zǝwwǝran. 9 Sǝdis adan a tǝle win daɣ za tǝtaggaɣ ǝššǝɣǝlan-nak kul, 10 amaran ǝzǝl wa n ǝssa in tǝsanfawt, imos ǝzǝl iskâtan y Amaɣlol, Ǝmǝli-nak. Ǝzǝl wǝdi a tu-wǝr-imǝl i daɣ-as išɣalan, gǝr za kay, wala bararan-nak, wala šibararen-nak, wala akli-nak, wala taklit-nak, wala amaššaɣal-nak, wala tǝmaššaɣalt-nak, wala eharay-nak, wala deɣ aytedan ǝn ɣǝrab win dǝr tǝhhǝraga. 11 Fǝlas sǝdis adan a daɣ d-ǝxlakaɣ ijǝnnawan, d amadal, ǝd gǝrwan, d aratan kul win tan-ǝhanen, amaran as d-ewad ǝzǝl wa n ǝssa da ǝzzirazaɣ awa tagga kul. Adi da fǝlas Nak Amaɣlol, ǝgeɣ albaraka-nin daɣ ǝzǝl wa n tǝsanfawt di, amaran ǝzzǝzwaraq-qu.
12 Sǝɣmǝr abba-nak d anna-nak, as iga adi ad tileɣ taɣrǝst tagget daɣ akal wa kay ǝkfeɣ nak Amaɣlol, Ǝmǝli-nak.
13 Ad wǝr tagaɣ iman.
14 Ad wǝr tagaɣ ǝzzǝna.
15 Ad wǝr takǝra.
16 Ad wǝr taga tǝgǝyya ǝn bahu fǝl awedan waliyyan.
17 Ad wǝr tagaɣ ǝnnǝyat-nak daɣ ahan n awedan waliyyan, wala tantut-net, wala akli-net, wala taklit-net wala eharay-net, wala ar-es waliyyan.»
Tasa ta tǝggazat tamattay
18 Assaɣa wad tǝsla tamattay ketnet y eggagan d anasaɣ n asăk, oggan esman d ǝhu wa ilsan adɣaɣ, ǝnta daɣ-san tǝga taysǝst fǝl tasa, ǝbdadan-in daɣ igǝg n adag wa. 19 Ǝnnan i Musa: «As dana-tǝššewala kay, a dak-nǝssǝsǝm, mišan Mǝššina wǝr nǝra a danaɣ-iššiwǝl, fǝlas nǝksud âs as danaɣ-iššewal, a danaɣ-iba.» 20 Inn-asan Musa: «A kawan-wǝr-tǝggǝz tasa, Mǝššina assa a d-iga y a kawan-ajjarrab, fǝl a kawan-agu aytedan a das-ǝbbirdagnen, igdǝl-awan adi igi ǝn bakkadan.» 21 Mišan ǝglan aytedan ǝbdadan daɣ igǝg n adag wen, Musa ɣas a iglan ihoz-in tǝgarak zǝwwǝrat kawalat ta iha Ǝmǝli.
Ǝššǝriɣa wa iqqalan edag wa n ǝsǝqqǝd ǝn tǝkutawen y Amaɣlol
22 Omar Amaɣlol Musa inn-as: «Ǝnta da arat wa za tannaɣ i maddanǝs n Israyil: Tǝnâyam ǝmmǝk was dawan-d-ǝššewala nak
Ǝmǝli-nawan daɣ jǝnnawan. 23 Daɣ adi ad wǝr tagim daɣ urǝɣ, wala azrǝf ǝssǝnǝman tagim-i-tan ǝmadraw. 24 Kalar edag n ǝsǝqqǝd ǝn tǝkutawen a di-za-tagim igân daɣ amadal. Taggiwat fall-as šikutawen šin tirǝkǝmmitnen ǝd šin tassaq ǝganen daɣ aharay wa ǝndarran ǝd wa zǝwwǝran. Ǝddi edag kul wa sannafrana y a daɣ-as tǝwǝɣbǝda, a daɣ-as sǝnnǝfilǝlaɣ iman-in agaɣ-awan albaraka. 25 Amaran as di-tǝkarrasam edag ǝn tǝkutawen igan daɣ tǝhun, tagim-tu ǝs tǝhun wǝr nǝttǝkat, fǝlas as tanat-tǝttǝkem ǝs tǝzoli, ad ib'as immǝkkan ǝsǝttǝɣmǝl-nasnat daɣ aratan win sǝr-i ǝskatnen. 26 Ad wǝr tǝkrǝsam edag ǝn tǝkutawen ilan šisǝffǝttan, fǝl ad wǝr ǝnǝyan aytedan izuf ǝn win tu-z-ǝftǝnnen.»