19
Tassaq ta inamagga Mǝššina ǝd maddanǝs n Israyil
1 Ǝzǝl wad tǝwar tǝllit ta n karadat dǝffǝr agamad ǝn maddanǝs n Israyil Masar, ǝnta ad ewadan teneray ta n Sinay. 2 As ǝfalan ǝgoras wa n Rifidim, ǝglan har ewadan teneray an Sinay, ǝzzǝbben daɣ-as. Ǝkrasan Kǝl-Israyil den da, dagma n ǝdɣaɣ wa n Horeba. 3 Iggǝzzay Musa adɣaɣ y ad ammanay d Amaɣlol Mǝššina. Iɣr-ay-du daɣ afalla n ǝdɣaɣ inn-as-du: «Ǝnta da arat wa za tannaɣ i hayawan ǝn Yaqub, a tan-imosan maddanǝs n Israyil: 4 Tǝnâyam kawanay iman-nawan awa ǝgeɣ i Kǝl-Masar, d aggay wa dawan-d-ǝgeɣ zun tǝggad tǝnagmart teway maddanǝs fǝl ǝfrutan-net, har kawan-du-šaššawadaɣ iman-in. 5 Amaran as di-tǝbbǝrdagam, tǝqqalam aytedan ǝɣdalnen daɣ tassaq ta dǝr-wan z'aga, adi za ad tǝqqǝlam tamattay-nin ta sǝr-i tǝskatat daɣ tǝmattiwen, kuddeɣ as amadal kul i-nu. 6 Ad tǝqqǝlam tamattay tǝskatat s ǝlɣibada-nin, tǝmosam tawšet ǝn limaman. Ǝnta dada batu ta za tagaɣ i maddanǝs n Israyil.» 7 Iqqal-du Musa iššedaw-du iɣmaran win ǝmosnen šigǝttawen ǝn tamattay, iɣrad-asan emel ǝn batuten šin kul, s ǝmmǝk wa daɣ as t-omar Amaɣlol. 8 Tǝrda tamattay kul, tǝnn-as: «Ad nammazal s arat kul wa inna Amaɣlol». Iqqal Musa Amaɣlol d aljawab ǝn tamattay. 9 Inn-as Amaɣlol: «Ǝnǝy, nak iman-in a kay-in-z-asin ǝheɣ tǝgarak zǝwwǝrat tǝdfasat, fǝl ad taslu tamattay y awal wa dak-z-aga, tǝflǝs-kay deɣ har faw.» Tǝzzar issoɣal Musa y Amaɣlol awa tǝnna tamattay. 10 Inna Amaɣlol i Musa: «Aglu tǝqqǝla tamattay tannaɣ-asan ad ǝkkǝsan ǝzǝl wa n azalada ǝd tufat daɣ ǝzǝzdǝg d arabaz ǝn tǝbǝddaɣ-nasan. 11 Sǝmmutǝgan y ǝzǝl wa n karad, fǝlas ǝzǝl wǝdi ǝnta daɣ in z'azzabbeɣ ǝwǝraɣ afalla n ǝdɣaɣ an Sinay dat awedan kul, 12 tagaɣ i tamattay tǝsǝrret tǝlat anay gar-es d ǝdɣaɣ, tannaɣ-asan: "ǝnkǝdat y i iftanan adɣaɣ a, wala i idasan tama-net. Awedan kul wa idasan adɣaɣ a, wǝdi attadib-net a daɣ-as tǝwǝkkǝsan man. 13 Awedan wala texsay ta tǝdasat adɣaɣ di, kul iɣrâd ǝd tǝmǝddurt. Ad wǝr itǝwǝdǝs. Ammatet ǝs tǝhun, madeɣ ǝs marran. Kundaba ǝslan aytedan y ǝmǝsli n ǝtǝwǝnsaɣ n asăk n akar, as z'ammakkan a din-ǝftǝnan wiyyad daɣ-san adɣaɣ."» 14 Ilas-du Musa ǝzǝbbi n ǝdɣaɣ. Omar tamattay s ad tǝzzǝzdǝg, ǝrbǝzan deɣ šibǝddaɣ-nasan. 15 Inn-asan: «Sǝmmutǝgat i tufat ten. A kawan-wǝr-iggǝz i inimansan ǝd tǝntut-net daɣ karad adan win di.»
Ǝzǝbbi n Amaɣlol fǝl ǝdɣaɣ wa n Sinay
16 Aɣôra ǝzǝl wa n karad, a t-ǝmalan eggagan, d esman, ǝd tǝgarak zǝwwǝrat tǝdfasat tǝlsat afalla n adɣaɣ. Ǝslan aytedan y anasaɣ issohen wǝllen n asăk, tǝzzar tǝga taysǝst daɣ tamattay kul daɣ aɣaywan. 17 Issǝrdaɣ-du Musa tamattay inan, ǝglan y ad ammanayan ǝd Mǝššina. Ǝɣradan tebadday ɣur ares n ǝdɣaɣ. 18 Adɣaɣ wa n Sinay ketnet ils-ay ǝhu, fǝlas Amaɣlol a daɣ-as d-izzǝbben iha ammas ǝn temsay, ǝhu wa itaggad-du ǝgǝzzǝy a d-itaggu ǝhǝw n eqqad zǝwwǝran, amaran adɣaɣ ketnet tǝga daɣ-as taysǝst labasat. 19 Ǝmǝsli n asak en, iket itahag tǝtittǝy assahat-net. Tǝzzar ad iššawal Musa i Mǝššina, Mǝššina deɣ išawal-as-du s ǝmǝsli a d-isaktin eggag. 20 Ǝmmǝk wen daɣ as d-izzǝbbat Amaɣlol fǝl afalla n ǝdɣaɣ an Sinay, tǝzzar iɣr-in Musa. Iggǝzzay-in sǝr-ǝs Musa. 21 Inna Amaɣlol i Musa: «Zabbat tannaɣ i tamattay: "Ǝnkǝdat! A du-wǝr-takǝyam tǝsǝrret di y a di-tǝnǝyam, fǝlas as iga adi a daɣ-wan iba a aggen. 22 Wala ilimaman a di-du-tihaznen, da iwâr-tan ad ǝzzǝzdǝgan, as wǝr iga adi a tan-ǝhlǝka."» 23 Inna Musa y Amaɣlol: «Tamattay ya wǝr tǝfreg ǝgǝzzǝy n adɣaɣ wa n Sinay, fǝlas kay a danaɣ-igan ǝrruɣmaran ǝssohatnen assaɣa wa di-tǝnne: Sǝɣlǝy tǝsǝrret y adɣaɣ, ǝmmǝk en daɣ as tu-za-tagaɣ arat a sǝr-i iskatan. 24 Inna Amaɣlol: Aglu tazzabbe tidawa-du ǝd Harun, mišan a du-wǝr-akǝyan limaman, wala tamattay tǝssǝret ta tǝssǝɣlaɣ adɣaɣ, y a di-d-akkin, fǝlas as ig'adi a tan-ǝhlǝka.» 25 Tǝzzar izzǝbbat Musa ǝs tamattay imal-as awa inna Amaɣlol.