Apocalipsi
Jesucristopa Juaná unupida
Jesú ome nipada Juanpa nãɨ k'art'a bɨsima. Ãyo 95de bɨsima. Griego pedeade Apocalipsi jara bɨma «unupida».
Domitiano apataɨ ãyo 81—96 chi Romanepema chi minachia k'awa bɨ pasima. Mãɨ ewaride ley bɨsidama jõmãɨrãpa chi Romanepema minachia k'awa bɨ k'ɨ̃rianai p'anɨt'a, ara Tachi Ak'õre k'ɨ̃ria p'anɨ jĩra. Mãɨya oowẽa bɨẽra, Juan eda serra bɨsidama.
Mãɨne Jesucristopa Juaná nãɨ k'art'a bɨpisima ũpẽarã siete p'uurude berã pae. Jesupa bɨpida Juanpa jõma k'ãmok'araada jĩra unusima. Juanpa Jesude ĩjãapataɨrã́ k'awapisima Jesú piarã ãchi ome bɨt'a mãɨnepa tãaraawẽa bɨde chi nek'ĩramá ãarea p'ueit'a. Jarasima Jesucristo chek'ari Tachi Ak'õrepa tiore mãɨnepa jõma ichidirã paa peeit'a. Mãɨnepa jarasima tiorepa Cristoderã peaipɨra ewaricha Tachi Ak'õre p'uurude pia tuananaipɨ.
Tachia nãɨ k'ɨ̃risia minachia pia bɨde 2:10de bɨ bɨde k'ɨ̃risiadai p'anɨma: «Mãra ewari tãaraawẽa bɨde minachia mĩanait'a wap'earãt'ɨ. ¡Ũrit'ɨ! Tiorepa eda mãranepema jɨ̃a nɨ bɨipɨ mãɨ wapida ĩjãa p'anɨ k'awayá. Minachia mĩanaipɨ ewari k'ak'o diez ãarea. Mãra peautamisa ĩjãa p'anat'ɨ. Maapae mɨa mãrá poro jũra jɨ̃parí tearude, ewaricha chok'ae bapiipɨ».