Jerusalem Chanute
6
1 Nangaipa chu hoilamma chemanga hitam?Vo nang numei lah lah-a hoichungnung nu,
keihon ama kaholhu theina diuvin,
nangaipa hoilanga kihei manga ham?
Shulam Nungahnu
2 Kangaipa chu Gimnamtui umna honsunga,
aganhonho vah dingle,
lily pahho loukhom dingin,
ahon sunga achelutnin ahi.
3 Keima kangaipa-a kahi,
chule kangaipa chu keija ahi;
ama lily pah lah-a aganhon avah-in ahi.
La Ngana
Mounu Hoina Atepi Ding Aumpoi
Moulang
4 Vo kangai Tirzah bangin nangma nahoije,
Jerusalem bangin namellomin,
ponlap dom galmi honpi bangin tijat na-ume.
5 Keijakonin namit teni heidoh-in,
ajehchu hiho chun eisuboije.
Nasam chu Gilead'a kona hungkumlha
kel hon abangin ahi.
6 Nahaho chu kelngoipi hon amul akivojoutil
akisil joutil uva ahungpot doh-u toh abangun;
amaho asohkop cheh ahiuvin,
alah uva nouneilou khatcha aumpoi.
7 Nadeh pang jong nasamlom lah-a
kolbuthei uma abangin ahi.
8 Lengnu somgup, thaikem somget,
chule nungah theng simjoulou aume.
9 Kavakhu, keija dia chamkim,
keija dia khatseh bou ahi;
anu-a dia cha changkhat ahin,
chule ahingnu deilhenpen ahi.
Nungah ho, lengnu ho chule thaikem hon amanu amuvin,
nunnomnu atiuvin, chule apahchao vin ahi.
10 Jingkah banga hung vahdoh-a,
lhabanga hoi, nisa banga thengset,
chule galmi ponlap domhon khat banga tijat umhi,
koi numei ahitabep dem?
Shulam Nungahnu
11 Phaicham theiga ho ve dingin,
lengpiguiho mumtam ve dingle,
kolbuthei ho pahtam ti ve dingin,
keima beleilut honsunga kachesuh-in ahi.
12 Kahetmanlou hellin kahinna-in,
Amminadib * sakol kangtalai bangin eina semtan ahi.
Moulang le Aloile Golho
13 Hungkilen, hungkilen, vo Shulam nungahnu;
keihon nangma kavet theina dingun;
hungkilen, hungkilen.
Shulam Nungahnu
Shulam nungah nu-a hi ipi navet dingu ham?
Galsatmi hon ni umkhom banga?