Migilou ho-a Kon Huhdohna Dinga Taona
La Lamkaipa dinga, David Labol.
140
1 Vo Pakai, miphalouva konchun neihuh doh-in,hunam miho-a konchun neiveng tupmin.
2 Alunguvin lheplhahna angaitouvin,
tanglouvin galboldin akikhom khom jiuve.
3 # Aleiju gul bangin anol hemun,
alei noijuva gulsum gu aumme. Selah
4 Vo Pakai migilou khutna konin neingahphan,
kachena suhboi ding eigo-a, hunam miho-a konin neihongphan.
5 Mi kiletsah hon thang le khaohol eikampeh-un,
lamsih-a lenthang aphaovin,
amahon thang eikam khumuve. Selah
6 Keiman Pakai henga chun, nangma ka Pathen nahi kati,
vo Pakai kataona aw hi ngaijin.
7 Vo Pakai Pathen, kahuh hingna thahat;
nangman gal kisat nikhon kalu neikhu peh-e.
8 Vo Pakai, migilou ngaichat chu phalpeh hih-in,
aduha lungthim gilou chu pilhinsah hih-in,
achutiloule kichoisang getnunte. Selah
9 Eium chahho luchang chu,
amaho kamtah-a lheplhahna chun khukhumhen.
10 Mei am lenglung chu achunguva hungchu hen,
ama ahung kithodoh kitna loudiuvin,
kotong thuh tahle meikong lah-a chun kisep lutnu hen.
11 Thuse seija leisetna kitungdoh hihhen,
hunam mang chu setna-in suhlhuh dia anungjui ding ahi.
12 Akibol gentheite thu leh vaichate dihna chu,
Pakaiyin suhdih peh inte ti kahei.
13 Michonphan thonlouva namin athangvah ding;
Midih chu na angsunga cheng ding ahi.