Pakaiyin Gamsung Akiledohsah Kit Nadinga Taona
Korah chapate La bol.
85
1 Pakai nagam chunga lungsetna naneijin;sohchanga Jacob chu nahin lepui kittan ahi.
2 Nangin namite khan gitlouna nangaidamin,
achonsetnao jouse namelkhutan ahi. Selah
3 Nalunghanna jouse naladoh-in,
nalungsat gimneitah chu nakihei mang khumtai.
4 Vo eihuh hingpao Pathen, neilehei jinlang,
kachunguva nalunghan bangtan.
5 A-imatih channa kachunguva nalung hanjing ding ham?
Nalunghan chu khangjousea naso dohsah jing ding hitam?
6 Nangman namite kakipana diuva,
neisuhhal kit loudiu ham?
7 Vo Pakai nahepina chu neimusah unlang,
nahuhhingna chu neipeuvin.
8 Pakai Pathen'in ahin thusei ding chu ngaijing kate,
ajehchu amite le amithengte henga chamna thu aseiding ahin;
ahinla amaho ngolna lama kiheikit daohen.
9 Adihtah-in igam uva loupina aumtheina dingin,
ami huhhing na chu ama gingte henga ahungnaijin ahi.
10 Hepina le thutah akimuto lhonin,
chonphatna le chamna akichopto lhone.
11 Leisetna konin thutah kehdoh intin,
chule chonphat na-in van'a kona ahinvet suh ding ahi.
12 Henge, Pakai chun thilpha chu hinpentin,
chule igamuhin aga ahin punsah ding ahi.
13 Chonphatna chu amasanga chentin,
chule akholhahna lampia eichesah diu ahi.