Thutan na-a Pathen Choisang Ahina
Asaph La bol
76
1 Judah te lah a-Pathen chu hetnin aumin,Israelte lah-a amin chu aloupin ahi.
2 Salem'a jong ahou buh aumin,
chule Zion'a achenna mun aumin ahi.
3 Hiche mun'a chun aman thalpi thalchang ho,
lumdal le chemjam, chule gal asubong gamin ahi. Selah
4 Nangma sadelna molsang ho sangin
naloupin nachung nungjon ahi.
5 Milunglenho chu akisuse gamun,
a-imut naova a-imulhu paijun;
chule mihat ho koimachan akhut hou amujou tapouvin ahi.
6 Vo Jacob Pathen, naphosalna jeh-in
sakol kangtalai le sakol jong a-imu millhon tan ahi.
7 Nang, nangmatah chu gindingtah nahin,
chule nangma lunghan teng namitmu-a koiham ading theidinga?
8 Nangin nathutanna thu van'a konin najahsah-in,
leiset akichan athip behtan,
9 Pathen thutanlha dinga ahung kipat doh-a,
leisetna gimbola um jouse ahuhdoh ding teng. Selah
10 Tahbeh-a mihem lunghanna chun nangma navahchoi ding,
lunghanna amohchengse-a chu naki gah ding ahi.
11 Pakai na Pathen nu henga kihahselun, chule peuvin;
akimvella umjousen ginding dolpa henga chun kipaman hinchoijun.
12 Aman pipuiho lhagao asuhmang ding;
ama chu leiset lengho dinga kichat umtah ahi.