Labu 41

Pathen Miho Gentheina Anunnom Dan

La lamkaipa henga, David Labol

(Labu 70)

1 Migenthei khotopa chu anunnom ahi;

Pakaiyin boina ato phatle ahuhdoh ding ahi.

2 Pakaiyin ama chu ahonbitna ahinsah ding;

chule leiset chunga phattheina chang ding;

chule nangman ama chu melmate deilama napehdoh louding ahi.

3 Lungkhamna jalkhun chunga chu Pakaiyin ama ahatsah ding;

nangman ajalkhun chunga nasemthah ding ahi.

4 Keiman Pakai neihepin,

nei damsah-in,

ajehchu nangma dounan kachonse tai kati.

5 Kamelma ten keima eisamse jingun,

itihle ama athin, amin amangdem? atiuvin ahi.

6 Chule eivedinga ahung jongle,

manlou thu jeng aseijin alungsunga khan gitlouna adimin,

apotdohle teng aseithang sohjin ahi.

7 Eihotbol jouse chu keidounan akihou lhiuvin;

keima dingin asecheh angaitouvin,

8 Nat phalou tah-in ama aphah ahitai,

alupna-a kon thoudoh talou ding ahi, atiuve.

9  Henge, kagol ngaitah, katahsan pen,

ka changlhah nepa tah-in jong kachunga akengto alamtai.

10 Ahivangin vo Pakai,

amaho kalethuh theina dingin

neihepin lang neiphong dingin.

11 Kamelma ten eijolou jeh-un,

nangma kachunga nalung lhaije ti

hichea konhin kahei.

12 Chule keima vang, kadih chamkimna-a

nangin neituh jingin,

namai koh-a tonsotnadin neitousah tan ahi.

13  Pakai Israel Pathen chu

tonsotna pat tonsot geijin nunnom jinghen,

Amen chule Amen.