Joshua'n Jabin Le Apanpiho Ajo
11
1 Chuin ahitin ahi, Hezor lengpa Jabin'in hicheho chu ajah phatnin, Madon lengpa Jobab, Shimrom lengpa chule Achshaph henga, 2 chule sahlang thinglhang gamle Chinnereth lhanglam phaichamle dam chule lhumlam Dor gamgi-a cheng lengho henga, 3 chule solamle lhumlama Kanaan mi, Amor mi, Hit mi, Perizz mi chule thinglhanga um Jebus mi chule Mizpeh gam Hermon noilam Hiv mite henga mi asoltan ahi. 4 Chule asepai jouseu toh mitampi atama tam, atam dannu chu luikama nel simsenlou jatjen sakol kangtalai tamtah toh akondoh taove. 5 Chuin hiche lengho jouse chu akisuhkhom phatnun Israel doudingin Merom twipanga gebuh asongkhom taove.6 Chuin Pakaiyin Joshua henga, amaho jehchun kicha hih-in, ajehchu jing nikho tuphat donle amaho Israel masanga thagam dinga kapehdoh ding nahi. Nangman asakolu aja nabana akangtalaihou meija nahalvam ding ahi, ati. 7 Hijeh chun Joshua'n agalsat miho jousetoh amaho satdingin phulou helouvin Merom twilah-a chun ahungun, amaho chu anokhom taove. 8 Chuin Pakaiyin amahochu Israelte khutna apedoh-in, amahon amaho chu athatnun Zidon gei, Misrephoth-maim gei chule solam Mizpeh phaicham geijin adelun, khatcha khenlou helin athat gamtaove. 9 Chule Pakai thupeh bangchun Joshua'n amaho chunga abolin, asakolhou ja abanin, asakol kangtalai hou meijin ahalvamtan ahi.
10 Chuin Joshua hichepet chun akinunglen, Hazor chu alan, alengpa chu chemjamin athat tai. Ajehchu chuche masang chun Hazor chu chuche lenggam jouse chunga alenpen anahi. 11 Chuin chuche sunga um mihing jouse chu chemjamin athatnun, amaho chu asugam helun, khatcha ahinghoi pouve. Chule aman Hazor chu meijin ahal lhatai.
12 Chuin chugama lengho khopi jousele alengteu jouse chu Joshua'n amanin chemjamin athat tai. Chule Pakai soh Mosi'n athupeh bangin amaho chu asumang heltai. 13 Ahinla Joshua'n anahallhah Hazor seh tilouvin molvum'a dingjing khopiho chu Israel ten khatcha anahal lhapouve. 14 Chuin chuche khopiho-a thilkichom jousele ganchaho chu Israel chaten galla kichom thilin akilah-un ahi. Ahivangin amahon amitakip asuhmang tokahseovin chemjamin athatnun khatcha jong ahinghoi pouve. 15 Pakaiyin asoh Mosi henga thu anapeh bangin Mosi'n Joshua koma thu anapen, chutobangma chun Joshua'n abolin Pakaiyin Mosi thu anapeh jouse chu bolouva akhen khatcha aumpoi.
Joshua'n Gam alah ho
16 Chutichun Joshua'n chuche gam jouse thinglhang gamho, lhanglam gamkai jousele Goshen gam jouse, phaichamle phaitong jouse chule Israel molle chuche molsanga damjol jouse alan, 17 Seir lhang geija kikhotou Halak molsanga pat Hermon mol noilam Lebanon phaichama um Baalgad chan geijin alahpeh-in, alengho jouse amanin asatnin athatgamtan, ahi. 18 Joshua'n chuche lengho chu phat sottah anakidoupin, ahi. 19 Gibeon'a cheng Hiv miteho tailou Israel chate toh kichamna sema khopi khatcha jong aumpoi. Adang jouse galla chu alah ngenchangu ahi. 20 # Ajehchu Pakaiyin Mosi anathupeh bangin aman amahochu lungsetna beihela asuhmanghel theina dinga, amahon Israel ahung kidoupina dinguva alungu kitahsah chu Pakaiya kon ahi. 21 Chuin chuphat chun Joshua ahungin molsang ho-a konchun Hebron, Debir le Anaba konin Judah molsangho jouse-a konle Israel moljouse-a konin Anakim te chu athatnin, Joshua'n amaho chu akhopihou pumin asumang heltan, ahi. 22 Israelte gamsunga chun Anakim te khatcha thalouva kihinghoi aumtapoi. Gaza, Gath, chule Ashdod nabou aumtaove.
23 Chutichun Pakaiyin Mosi henga anasei jouse dungjuijin Joshua'n gampumpi chu alan ahi. Chuin Joshua'n amaho aphungu kikhen dungjuijin hichu alodiuvin Israelte apetan ahi. Chule agamchu galla konin akicholdotai.