Mɑriki
wɑ̃̀rimɛ̀ tinɑ́ɑǹsɑ̀ɑ̀tì
Di mpɑ́tíri tɔ tìì nɑ́ɑǹtì
Yesu tɑncɔ́ùmbɛ̀ tɛpíítɛ̀ nɛ̀ bɛdɛ́bɛ̀ kóò mɔù bɛ̀ tu wè Mɑriki weè wɑ̃̀ri di mpɑ́tíri. Ò do tú Sedisɑdɛmmu ɛì kou nwe, kòo yɔ̃ yètìrì tu Mɑɑri (Yesu Tɔ̃rɛ̀ 12:12). Bɛ̀ í nɑ̀kɛ́ o cicɛ yie kpɛti. Mɑriki kó dipɑ́tíri diì tu dipɑ́tíri dìì kɛ̃ńnì tinɑ́ɑǹsɑ̀ɑ̀tì kó yɛpɑ́tɛ miɛkɛ.
Mɑriki kó dipɑ́tíri ò dì wɑ̃̀ri Odommu kɔbɛ kpɛ́í nkɛ, kɛ bɛ̀ nɑ̀ɑ́ nKirisi tumɛ̀ ti Yiɛ̀ nKuyie nkóo tɔ̃ntì kù tɔ̃nní wè kòò bo pĩ́ nKuyie nkó mutɔ̃mmú, dɛ kó dipɑ́tíri wɑ̃̀ri kɛ nɑ́ɑ́ nYesu pĩ mmùù tɔ̃mmú mmu, Kuyie mpɑ̃ɑ̃nɑ́ɑǹtì nɑ́ɑm̀bɛ̀ nɑ̀kɛ́ mùù kpɛ́í (Esɑii 42:1-21, 49:1-7). Mɑriki nɛ́ dɔkɛ ĩkú tìì ĩ́nkɛ̀ ò wɑ̃̀ũ dìì mɔ̀nnì o pɑ́tíri tiì tu: Tidiɛtì Yesu dɔ̀ɔ̀ tì, tiì bɛnkú ò tumɛ̀ Kuyie mBirɛ.
1. Isɑ̃ɑ̃-Bɑtiisi nɑ̀ɑ́mmɛ̀ Kuyie nnɑ́ɑǹtì nɛ̀ ò ɑ̃nnɛ́mɛ̀ Yesu bɑ̀tɛ́mmù (1:1-13)
2. Yesu otɔ̃ntì pĩ mmùù tɔ̃mmú (1:14-13:37)
3. Yesu otɔ̃ntì yiemmɛ̀ Kuyie nkpɛti kɛ yɑ̀ɑ kúnɛ̀ (14-15)
4. Yesu otɔ̃ntì yɑ̃̀ńtɛ́mɛ̀ kɛ nɑ mukṹṹ (16)