Fɛcɑnyɛ̀nfɛ̀
Di ḿpɑ́tíri tɔ tìì nɑ́ɑǹtì
Wèè wɑ̃̀ri dɛ kó iyiɛ mbɛnìtìbɛ̀ yɛ̀mmɛ̀ dò nSɑdomɔɔ nwe kɛ bɛ yu dɛ kó iyiɛ nkɛ tú fɛcɑnyɛ̀nfɛ̀, kɛ yɛ̃́ dɛ kó fɛyɛ̀nfɛ̀ miɛkɛ nkɛ bɛ̀ nɑ̀ɑ́ mmɛ̀ mɛdɔ́kùmɛ̀ kó tinɑ́ɑǹtì: Osɑpɑ̀ɑ̀ nnɛ̀ odɑpɑ̀ɑ̀ nkɛ̀ bɛ̀ nɑ̀ɑ́ nkɛ tiètì bɛtɔbɛ̀ mɛdɔ́kùmɛ̀ kó tinɑ́ɑǹtì.
Dɛ kó dipɑ́tíri tú mɛdonnimɛ̀ kpɛri ndi. Kɛ dɔ́ kɛ bɛnkɛ mɛdɔ́kùmɛ̀ mɛ̀ɛ̀ bo Kirisi nɛ̀ diwedɔuntĩ̀nnì bɛ cuokɛ̀. Dɛ kó dipɑ́tíri nɛ́ í bo kɛ bo bɛnkɛ mɛɛ̀ mɑ́ɑ̀, kɛ nsɑ̀ kɛ ti yie nkɛ dò nKuyie nkuù dɔ̀ɔ̀ onitidɔ̀ù nɛ̀ onitipòkù kɛ̀ bɛ̀ bo bɛtɔbɛ̀ kpɛ́í kɛ́ndònnɛ̀ ti wɑ̃̀rimɛ̀ Tenketɛ́ 2:23-25. Kɛ̀ ti kɑ̀ɑ ndɛ kó iyiɛ mmɛsɑ̀ɑ̀ nti bo yɑ̀ ì dɔ́mɛ̀ kɛ́ ti bɛnkɛ mɛdɔ́kùmɛ̀ do dò nkɛ́ndòmmɛ̀ mmɛ, kɛ́ bɑ́ ncɑ̃́nnì cɑ̃́nnì. Dɛɛ̀ te kɛ̀ Kuyie nduɔ́ nkɛ̀ bɛ keutɛ́ dɛ kó fɛyɛ̀nfɛ̀ kɛ fɛ̀ bo nti teennɛ̀.