Bɛkpɑ̀ɑ̀tìbɛ̀ tɔ̃mmú
pɑ́tíri ketirì
Di mpɑ́tíri tɔ tìì nɑ́ɑǹtì
Bɛkpɑ̀ɑ̀tìbɛ̀ tɔ̃mmú pɑ́tíri ketirì nɛ̀ didɛ́rì yɛ̀ wɛ̃̀tɛ kɛ kòńtɛ́ tìì nɑ̀kɛ́ tìnti Sɑmmuyɛɛri pɑ́tíri ketirì nɛ̀ didɛ́rì yɛ miɛkɛ nɛ̀ bɛkpɑ̀ɑ̀tìbɛ̀ pɑ́tíri diketirì nɛ̀ didɛ́rì yɛ miɛkɛ. Bɛkpɑ̀ɑ̀tìbɛ̀ tɔ̃mmú pɑ́tɛ yɛdɛ́ miɛkɛ kɛ nɛ́ nɑ̀kɛ́ kɛ̀ dɛ̀ ntukúnɛ̀ Isidɑyɛɛribɛ nɛ̀ Kuyie mbɛ kó mɛtɑummɛ̀.
Dɛ kó yɛpɑ́tɛ yɛɛ̀ ti bɛnkú kɛ dò mbɑ́ nɛ̀ mɛyɛi mmɛ̀ɛ̀ do Isidɑyɛɛri kó dikpɑ̀ɑ̀tìyuu nɛ̀ Sudɑɑ kpɛri, Kuyie nyí yɛ̃̀ ndinùù kù do bɛ̀ dɔúnnɛ̀ dì, kɛ dɔɔri kù bo yĩ́mɛ̀ kɛ́ bɛ̀ dɛɛtɛ́ bɛmbɛ ku nìtìbɛ̀ bɛ̀ɛ̀ bo Sudɑɑ tenkɛ̀. Dɛ kó kucɛ kuù tu Dɑfiti nɛ̀ Sɑdomɔɔ nɛ̀ Sosɑfɑti nɛ̀ Esekiɑsi nɛ̀ Sosiɑsi nɛ̀ bɛtɔbɛ̀ bɛtɔbɛ̀ bɛ̀ɛ̀ do dɔɔri Kuyie ndɔ́mɛ̀. Bɛ kó mɛdɔɔ̀rìmɛ̀ mɛɛ̀ bɛnkú Kuyie nkuù dɔ́mɛ̀ kɛ́dɔ̀ɔ̀ kù do dɔúnnɛ̀ dìì nùù ku nìtìbɛ̀
Diì pɑ́tíri ti bɛnkú Kuyie nkuɔ́ tɔ̃mmú ketɛ́mɛ̀ ku cĩ́ɛ̃̀tɛ̀ nɛ̀ bɛ̀ kɑ̀nnɛmɛ̀ ikuɔ́ nìùbɛ̀ nɛ̀ Defiibɛ. Dɛ kó dipɑ́tíri diì ti nɑ́ɑ́ nDɑfiti weè do yɑ̀mɛ̀ bɛ̀ dòmmɛ̀ kɛ́mɑɑ́ Kuyie ncĩ́ɛ̃̀tɛ̀, weè dɔú nyikuɔ́ tɔ̃mmú. Kɛ̀ Sɑdomɔɔ weè nɛ́ mɑɑ́ Kuyie ncĩ́ɛ̃̀tɛ̀.
1. Isidɑyɛɛribɛ kó iwuɔ 1-9
2. Sɑuri kó mukṹṹ 10
3. Dɑfiti kó tikpɑ̀tì 11-29