Mukétímù
Di mpɑ́tíri tɔ tìì nɑ́ɑǹtì
Mukétímù kó dipɑ́tíri ti nɑ́ɑ́ mMɔyiisi do bɛ̀ duɔ́ nKuyie nkuɔ́ Sinɑii tɑ̃rì kɛ́deè kɛ̀ bɛ̀ɛ bɑ́ɑ́tímɛ̀ mmɛ kɛ́kétɛ́ kɛ bo tɑ Kuyie mbɛ̀ duɔ́ ndìì ɛì. Bɛ̀ dɛ nkètɛ́ kɛ́tuɔkɛ Kɑdɛɛsi Bɑdinnɛɑ tenkɛ̀ kɛ̀ dɛ̀ nkpɑɑ́ bɛ̀ bo tɑmɛ̀ dihɛì mɑ́ɑ̀, kɛ̀ bɛ̀ nɛ́ depɛ bɛ̀ bo tɑmɛ̀ dɛ kó dihɛì. Kɛ̀ Kuyie nyṹɔ̃́ mbɛ to, kɛ̀ bɛ̀ɛ fitɛ́ kɛ dɔ̀ yɛbie nsipísìnɑ̀ɑ̀ dikpɑ́ɑ̀ miɛkɛ, kɛ̀ dɛ̀ mboní kɛ̀ bɛ̀ bɑɑ tuɔkɛ Mɔɑbu tenkɛ̀ mukɔ́kúɔ́ nkóò dɑ̀mɛ́ɛ̀rì bɑkù yoú. Isidɑyɛɛribɛ do dò nkɛ́ dɛ nyítɛ́ kɛ́tɑ Kuyie mbɛ̀ duɔ́ nkɛ̀ɛ̀ tenkɛ̀ Kɑnnɑhɑ̃ɑ̃.
Dɛ kó dipɑ́tíri sɔɔtɛ́ Mudennimù kó dipɑ́tíri nɛ̀ ikuɔ́ nìùbɛ̀ pɑ́tíri yɛ kó tinɑ́ɑǹtì nti, kɛ bɛnkú Kuyie nkó bɛnìtìbɛ̀ do cĩĩnnìmɛ̀, kɛ̀ bɛ tɑ̃́kùmɛ̀ níí bonkɛ di nyiè kɛ́wɛ̃tɛ kɛ́tonkɛ̀ ditɛrì. Nɛ̀ mɛmmɛ kɛ̀ Kuyie nkuu mɛ mpĩ nku nùù kù bɛ̀ dɔ́unnɛ̀ dì kɛ dɔ́ kɛ́ dì dɔ̀ɔ̀. Kɛ̀ Mɔyiisi ncómmú bɛnìtìbɛ̀ cuokɛ̀ kɛ nɑ́ɑ́ mbɛnìtìbɛ̀ Kuyie nhò nɑ̀kɛ́ tì, kɛ kù bɑ̀ɑ́ mbɛnìtìbɛ̀ kpɛ́í.
1. Bɛ̀ do kérímɛ̀ ditɑ̃rì Sinɑii kó dikpɑ́ɑ̀ miɛkɛ 1:1-10:10
2. Bɛ̀ ìtɛ́mɛ̀ Sinɑii kɛ tɑ Mɔɑbu biriku 10:11-21:35
3. Bɛ̀ bomɛ̀ Mɔɑbu tenkɛ̀:
Bɑdɑki do yɛ̃mmɛ̀ Bɑdɑmmuu bɔntɛ́ Isidɑyɛɛribɛ kusĩ̀nkù 22-24
Bɛ̀ yetɛ́nɛ̀mɛ̀ Kuyie, mucèmmu sɔɔtɛ́mɛ̀ nɛ̀ ikuɔ́ mɑì dɛ kó tinɑ́ɑǹtì 25-36