3
Su Gempenggulaula saˈ sungu Melengkebig Benwa
1 Naa, saˈ ndaˈ mu gupia mesuunay, saˈ sungu melengkebig benwa, melegeni ketubuˈ nu tibaˈan getaw. 2 Ki nga gendaw kia, melaat gupiaig betad getaw. Su nga getaw, penemalan nilan petailay su da lawas nilan, mukaˈ mesaku ilan. Mangyaˈ ilan. Mekpelabawlabaw dailan dema. Menampalaksa ilan tu ngag duma. Memilas ilan tu mekegulang nilan. Kanaˈ ilan mekpaladpalad mukaˈ ndaˈi ginaa nilan tu Megbebayaˈ. 3 Ndaˈi petail nilan tu ngag duma nilan mukaˈ ndaˈig lelaat nilan dun. Menlibak ilan mukaˈ ndiˈ nilan meguut sug delendeman nilan. Peglegetan nilan su nga getaw mukaˈ mpauk ilan tu gempia gulaula. 4 Mektipu ilan mukaˈ petuyangen nilan su ginaa nilan. Melebian ilan kebanggiˈitan. Iin laaki pektalentenan nilan, su nga gayak nilan, sabayaˈ di kegbasa nilan tu Megbebayaˈ. 5 Tautau dunutan nilan sug betad ta diniwata, laak dagid su pegbayaˈen, pemilasen nilan gupia. Su nga getaw maˈnia, subay pegliaun. 6 Duun dadema dinilani nga tautau mekpetuˈun menaik tu nga gimbelayan, adun pengmetuudan nilan su nga meglelambing libun, su ngag libun migbuku di nga salaˈ nilan mukaˈ melemu ilan egaken nu nga ginis gayak nilan. 7 Pia taˈ pektuˈunay dun, mauyaˈan nu ngag libun kia petuˈun dun, laak ndiˈ mengganget dig delendeman nilan su metuud. 8 Ki nga getaw kia kumuntra tu metuud, maaˈ ilan dini Janes mukaˈ ni Jambres kanugdiin, su kuminuntra dini Moises, puˈ pemilasen nilan su metuud, puˈ mpenulayig delendeman nilan mukaˈ mbulugani kekpetuud nilan. 9 Laak dagid, ndiˈ mekpalasi penggulaulaan nilan, puˈ melemu maitaˈ nu ngag launan getaw sug dupangan nilan. Maaˈ nu mipenggulaula ni nga Janes kiin.
Katapusan Tituluˈan
10 Naa yaˈa, misimet mu na su pituˈun ku, su pigbetadu mukaˈ su mauyaˈan ku dadema baalen ku sinegay pektetubuˈ pau. Misimet mu padun su kekpetuudu, su kektigelu dig laatan ginau, su kekpetailu sampay su kektigelu di kelegenayu. 11 Misuunan mu pa pagid su kegleget dinaan mukaˈ su kelegenayu. Misuunan mu su kelaun mibianan ku su saanan ku megukit Gempia Petenday dia ngag benwa Antioquia, Iconio mukaˈ Listra. Misuunan mu su kektigelu di meliget gupia kegleget dinaan, laak dagid ginawenu nu Kaunutan ta dig launanen. 12 Metuud, adin su suminalabuuk dini Kristu Isus mukaˈ mauyaˈanen penunggilinganen sug diniwata, iini peglegetan tantu nu samatawen. 13 Laak dagid su nga getaw lelayun melaati gulaula nilan mukaˈ su nga mekpetuˈun dig balus, menamal megdugangi melaat betad nilan. Meglimbung ilan tu ngag duma getaw mukaˈ peglimbungan dailan dema.
14 Laak yaˈa pasiˈ, pektalentenay mu gusay su piktuˈun diniˈa mukaˈ mituudan ka na dun, puˈ misuunan muig betad nu nga mikpetuˈun diniˈa. 15 Misuunan mu dadema puˈ genat kaikaˈay mu, iini piktuˈun diniˈa, su Misulat Taluˈ nu Megbebayaˈ. Iin dayuni mikpesuun diniˈa puˈ ki kegawen begay dinita nu Megbebayaˈ, mekpalas saˈ mekpetuud ita dini Kristu Isus. 16 Ki tibuuk Misulat Taluˈ nu Megbebayaˈ, su Megbebayaˈi pigenatanen, mukaˈ gempia pektuˈun mekatag di metuud, pemaagen di sayep, tituluˈ tu mikesalaˈ sampay pektuˈun di kektinantu pegbetaden, 17 adun su mektamuy tu Megbebayaˈ, ndaˈi kulang dun, puˈ misangkap dig launan melengas baalen.