3
Penenebiay niu ami
1 Naa, uu Mingumpated, duun pai teluˈen ku diniu. Saˈ yami, kelelaat penenebiay niu ami, adun medaliˈ mesigwag gusayi gukiten nami mekatag di Kaunutan ta mukaˈ metelimaˈ dadema gupia maaˈ nu mipenggulaula diniu. 2 Penenabi damu dema, megawen ami di nga mekedupang mukaˈ di nga getaw lelayun melaati gulaula nilan, puˈ kanaˈ nug launan getawi suminalig tu Kaunutan ta.
3 Laak su Kaunutan ta, meseligan iin. Pementekeneni kekpetuud niu mukaˈ penendingan amu niin di Palin. 4 Kagina pingmetuudan ami niin, iini kesalig nami mekatag diniu, pinggulaula na niu su tinituluˈ nami diniu, mukaˈ penggulaulaan pa niu.
5 Penenebian nami amu isegen nu Kaunutan ta dig delendeman niu sug lelaat dinita nu Megbebayaˈ mukaˈ su kektigel niu miksekat dini Kristu.
Peksituges amu Mengimbaal
6 Naa Mingumpated, kaas tinituluˈ nami amu pegliaun niu su nga samasakup niu melelaˈ, su nga ndiˈ mengimbaal, su nga ndiˈ dumunut tu tinituluˈ nami diniu. Tinituluˈ nami amu, puˈ pigwekilan ami nu Kaunutan ta si Isukristu. 7 Misuunan niu su pinggulaula nami su saanan nami ditu niu. Subay penunggilingan niu ami, puˈ yami, ndaˈ ami peglelaˈ ditu. 8 Ndaˈiduni ginalap nami gaan atawaka pektulugan ndaˈ nami biaday. Gebii gendaw minamal ami mengimbaal, adun ndiˈ nami amu medeligan. 9 Pia yami siaig bantang menengi diniu sukayan, ndaˈ, puˈ adun mbaal niu ami gempia lendasan. 10 Ndiˈ ba metuud, su saanan nami dia niu, iini tinituluˈ nami diniu, saˈ duuni getaw ndiˈ mengimbaal, ndiˈ dema niu paanen? 11 Puˈ midengeg nami duun dawig duma niu melelaˈ, ndiˈ daw mengimbaal. Iin laaki tembaˈenen, su kenginampenen tu ndaˈ naig labeten dun. 12 Naa, su nga sakup maˈnia, puun tu kegwakil dinami nu Kaunutan ta si Isukristu, tituluˈan nami ilan mukaˈ pegad nami dinilan, subay mengimbaal ilan di kegleketubuˈ nilan, mukaˈ ndiˈ ilan mesasaw di pegbenwa.
13 Yamu dema Mingumpated, ndiˈ niu lukasay gulaulaay su gempia. 14 Saˈ duun diniui ndiˈ dumunut tu sinulat nami kini, pedelendem niu dun ndiˈ amu megduma dun, adun mpiid. 15 Laak dagid, ndiˈ niu iin pemilangay kuntra niu. Subay tituluˈan niu maˈniin nu ngudan niu.
Katapusan Sinulatu diniu
16 Naa, su Kaunutan ta, penenebiin nami diniin pepiananeni ginaa niu gebii gendaw, pia taˈ alanduni kebetang niu, puˈ iini puun gupia nu pianan ginaa. Mukaˈ penenebiin da nami dema diniin, megduma iin diniu, launan niu.
17 Naan si Pablo. Ki pinirmaan ku di sulat kini, naani suminulat dun. Kiai tuˈus dig launan sinulatu puˈ suminulatu dun, kiaig betadu sumulat.
18 Penenebiin nami pa pagid ditu Kaunutan ta si Isukristu begayan amu niin tulungen gebii gendaw, launan niu.
Daal daitu. Pablo