Su Keduaˈ Sulat ni Pablo
tu nga Getaw
TESALONICA
1
1 Naan si Pablo, mukaˈ su ngag dumau si Silas mukaˈ si Timoteo, puitan ku amu sulat, yamu nu pikumpungan nu nga sakup ni Kristu ditug lunsud Tesalonica suminalabuuk na ditu Gamaˈ ta Megbebayaˈ mukaˈ tu Kaunutan ta si Isukristu.
2 Penenebiin ku tu Gamaˈ ta Megbebayaˈ mukaˈ tu Kaunutan ta si Isukristu, begayan amu niin tulung mukaˈ pianan ginaa.
Mengukum si Kristu di Kelusaden puliˈ dini
3 Naa yamu Mingumpated, gebii gendaw subay pekpeladpeladan nami su Megbebayaˈ mekatag diniu. Bantang na daan mekpaladpalad ami diniin, puˈ migisegi kesalig niu, miksamet dademai keglinelaatay niu. 4 Kaas saˈ meksimba ami dia nga pikumpungan nu nga sakup ni Kristu, pingangyaˈ nami amu dinilan, puˈ miktigel amu di kegleget diniu, mukaˈ ndaˈ mpalini kekpetuud niu pia milegenan amu.
5 Naa, ki pigbetad niu mukaˈ kektigel niu kia, iin su tuˈus puˈ melepengi ginukuman nu Megbebayaˈ, kaas baalen amu niin bantang sumakup ditu Keglekaunutanen. Puˈ sabaˈ nu kesakup niu tu Keglekaunutanen, milegenan amu nemun. 6 Mukaˈ penggulaulaan pa nu Megbebayaˈ su gempia, puˈ pelegetanen su nga mikpeleget diniu, 7 mukaˈ peleliinen amu nga pilegetan, sampay yami pa pagid. Penggulaulaan nu Megbebayaˈ saˈ metuaˈ puliˈ su Kaunutan si Isus genat tug langit, tendugan nu nga ginuungan sesuguˈen nu Megbebayaˈ getaw langit mukaˈ ligaˈ gapuy, 8 adun pelebuˈanen su nga mimilas tu Megbebayaˈ mukaˈ mimilas tu Gempia Petenday mekatag di Kaunutan ta si Isus. 9 Iini pelabuˈ di nga memilas, pelaatan ilan di ndaˈi tamanen, puˈ peliuˈen ilan nu Megbebayaˈ tu Kaunutan ta, mukaˈ tu kelengas nu pegbayaˈen mukaˈ ginuungen. 10 Mpenggulaula di gendaw nu ketuaˈen puliˈ, puˈ iini metuaˈ dun si Isukristu, pededengegen nu piglegetawanen, mukaˈ pegbesaan dadema nu ngag launan mekpetuud kampuˈ amu, puˈ mituudan amu di ginukit nami.
11 Kaas tatap nami amu penenebiay, puˈ baalen nu Megbebayaˈ su pegbetaden niu mbantang di keˈenggaten diniu. Penenebiin da nami dema, puun tu ginuungen pekpelasenen sug launan gempia delendeman niu sampay sug launan penggulaulaan niu puun tu kesalig niu. 12 Maˈantu mpededengeg niui ngalan nu Kaunutan ta si Isus, mukaˈ pededengegenen damu dema. Mpenggulaula pebian di tulung nu Megbebayaˈ su pektemuyen ta mukaˈ nu Kaunutan ta si Isukristu.