5
Pengendamay niui Ginaa niu tu Kelusad puliˈ ni Kristu
1 Naa Mingumpated, ndiˈ nau kambat sumulat diniu saˈ nanu mpenggulaula ia. 2 Puˈ ki kelusad puliˈ nu Kaunutan ta si Isus, misuunan na niu tantu, iini maaˈ nu kedateng nu megdaaw di gebii, puˈ metekawan duni nga getaw. 3 Saˈ teluˈen nu nga getaw puˈ melinaw na daw mukaˈ ndaˈ nai gendek ta daw dun, naa metekaw ilan pelebuˈay maaˈ nug libun metekaw megbatik tian. Ndaˈidun demai mekegliaw dun. 4 Laak dagid yamu, saˈ matengi gendaw kia, ndiˈ amu metekawan maaˈ nu mitekawan nu megdaaw, puˈ kanaˈ amu sakup nu medelem maaˈ nu nga ndiˈ mekpetuud. 5 Sakup damu nu tiag, sakup amu nu gendaw, puˈ pisuun diniu su metuud. Ndaˈig labet ta di gempenggulaula di gebii mukaˈ di gempenggulaula di medelem. 6 Kaas subay ndiˈ ita mpia mektulug maaˈ nu nga ndiˈ mekpetuud. Subay megenduk ita mukaˈ pelegdengen taig delendeman ta. 7 Puˈ iin da gusay mededaliˈ nu nga getaw, mektulug saˈ gebii, mukaˈ pagid saˈ gebii, mededaliˈ nu nga getaw megbebulek. 8 Laak ita, kagina sakup ita nu gendaw, subay pelegdengen taig delendeman ta. Maˈantu pektalentenan tai kesalig ta dini Isus mukaˈ sug lelaat ta tu nga getaw, puˈ iini maaˈ nu menending tug lawas ta. Pektalentenan ta dadema su pedetengen ta puˈ megawen ita ditug binayaˈ gebii buˈ gendaw, puˈ gitunganen dun iini menending tu gulu ta. 9 Puˈ kanaˈ iini tinduˈan ita dun nu Megbebayaˈ adun melegenan ita di ginukumanen. Segaga iini tinduˈan ita niin dun, pegawen ita niin di Kaunutan ta si Isukristu. 10 Puˈ si Isusi minatay guminantiˈ dinita, adun mekegduma ita diniin, pia ita matay saˈ metubuˈ, ditu kelusaden puliˈ. 11 Kaas pegeguliksegay amu mukaˈ pektinebangay amu, maaˈ nu gulaula na niu nemun.
Katapusan Tituluˈan di Sinulat kini
12 Naa, penengiin da nami dema diniu, Mingumpated, su nga tinduˈ nu Kaunutan ta meguit diniu, su nga menamal meguit mukaˈ mektituluˈ diniu, subay pegbesaan niu ilan. 13 Pegbesaay niu ilan gusay, mukaˈ petail niu ilan sabaˈ nu pinggulaula nilan. Subay meksalabuuk amu.
14 Naa, penengiin nami pa pagid diniu, tituluˈay niu su nga mikeneng mengimbaal, penguliksegay niu su nga melemu melayuˈi ginaanen, mukaˈ ebangay niu su nga kanaˈ pa gempageni kekpetuuden. Mukaˈ ndiˈ na niu pengebetay su ngag launanen. 15 Ndiˈ amu pia meksesuliˈay. Iini mpia penggulaulaan niu, mektinebangay amu mukaˈ ebangan niu su ngag launan getaw.
16 Mukaˈ subay leliagen amu gebii gendaw, 17 ndaˈi timpu kenenabi niu, 18 mukaˈ pia alanduni mpenggulaula niu, pekpaladpalad amu dun tu Megbebayaˈ, puˈ kiai mauyaˈanen penggulaulaan niu nu nga suminalabuuk dini Isukristu.
19 Mukaˈ pagid, su mekesuun Balakat nu Megbebayaˈ, ndiˈ niu iin belibaday. 20 Mukaˈ ndiˈ niu pemilasay su ngag laung nilan megwali ilan di taluˈ nu Megbebayaˈ. 21 Laak peksimaˈ niuig launanen. Pektalentenay niu dayun su melengas. 22 Pegliaw niu su melaat gulaula, pia alandun.
23 Naa, penenebiin ku tu Megbebayaˈ, su megbegay pianan ginaa di getaw, petelimaˈen amu niin mukaˈ ingatenen su ginaa niu, sug delendeman niu sampay sug lawas niu, adun saˈ lumusad puliˈ su Kaunutan ta si Isukristu, ndaˈ nai melamug diniu melaat, mekesuun namu tantu. 24 Mesuunan ta puˈ penggulaulaanen ia, puˈ meseligan su Megbebayaˈ, su migenggat diniu sumakup diniin.
25 Mingumpated, penenebiay da niu ami dema. 26 Su ngag launan samasakup niu, pegdedialay niu ilan maaˈ nug dedial niu di gapen niu. 27 Puun tu pegbayaˈ bigay dinaan nu Kaunutan ta, penengiin ku diniu, ki sinulatu kini, basa niu tu ngag launan mikpetuud.
28 Naa, penenebiin pa nami ditu Kaunutan ta si Isukristu, mbianan niu lelayun su tulungen diniu.
Daal daitu. Pablo