Sug Bekna Sulat ni Pablo
tu nga Getaw
TESALONICA
1
1 Naan si Pablo mukaˈ su ngag dumau si Silas buˈ si Timoteo. Piwitan ku amu sulat, yamu nu pikumpungan nu nga sakup ni Isukristu ditug lunsud Tesalonica suminalabuuk na ditu Gamaˈ ta Megbebayaˈ mukaˈ tu Kaunutan ta si Isukristu.
Penenebiin ku tu Megbebayaˈ begayan amu niin tulungen mukaˈ pianan ginaa.
Su Pigbetad mukaˈ Kesalig nu nga Getaw Tesalonica
2 Mendadi yamu, mekpaladpalad ami lelayun tu Megbebayaˈ sabaˈ diniu, launan niu, mukaˈ tatap nami amu penenebiay. 3 Puˈ milabuˈ di ginaa nami su pinggulaula niu puun tu kesalig niu, su binaal niu miksekat tug lelaat niu sampay su kepagen pedetengen niu di kepuliˈ dini nu Kaunutan ta si Isukristu. 4 Uu Mingumpated petailen nu Megbebayaˈ, misuunan nami puˈ mipemiliˈ amu niin di nga getaw, adun mbaal amu niin piglegetawanen. 5 Puˈ su kegukit nami diniu tu Gempia Petenday, kanaˈ pibian laak di tinaluˈ nami, segaga pibian dadema di ginuung nug Balakat nu Megbebayaˈ, mukaˈ sabaˈ mituudan ami dun gupia. Misuunan niu puˈ su pigbetad nami su saanan nami ditu niu, iini pigbetad nami dun, su kepia diniu. 6 Mukaˈ dema, pinunggilingan niu ami mukaˈ su Kaunutan ta si Isukristu. Pia piglegetan amu, pinembaˈ niu su kegukit nami mukaˈ liliag amu dun sug leliag bigay nug Balakat nu Megbebayaˈ, 7 kaas mibaal namu lendasan tu ngag launan mikpetuud dia ngag benwa Macedonia mukaˈ Grecia. 8 Su pitenday mekatag tu Kaunutan ta genat diniu, mileep na di ngag benwa. Kanaˈ laak dig benwa Macedonia mukaˈ Grecia, puˈ pia tandaˈ, midengeg na nilan ditu puˈ suminalig amu gusay ditu Megbebayaˈ. Mendadi ndaˈ na nami kambat teluˈay. 9 Pigukit nu nga getaw dia ngag benwa kia puˈ pinembaˈ niu ami saanan nami ditu niu, mukaˈ tiliudan niu su nga sagya diwata, adun pektemuyen niu su tantu Megbebayaˈ ndaˈi gumulen. 10 Mukaˈ pegelatan pa niu su kelusad puliˈ nug Bataˈen genat tug langit, si Isus su pitubuˈen puliˈ. Iini meglegawen dinita tu ginukuman nu Megbebayaˈ sungu mateng.