16
Su nga Gamut ta tu nga Samasakup ta
1 Naa, mekatag di keksukat niu pigamut tu nga samasakup ta tu Megbebayaˈ ditug benwa Judea, subay dunutan niu su tituluˈan ku tu nga pikumpungan nu nga mikpetuud diag benwa Galacia maˈniniˈ. 2 Kada Duminggu, diadia diniu, subay duuni paasenen bantang tu mialapen. Teguˈenen dayun, adun saˈ mateng pau, ndiˈ ta na kambat pungunen su gamut. 3 Mabuˈ duun diniui nga getaw misimet na niu puˈ meseligan ilan. Saˈ mateng nau ditu niu, begayan ku ilan sulatu keligenan nilan, adun muit nilan ditu syudad Jerusalem su pigamut niu. 4 Dayun saˈ batiku dun gempia mpanaw dau dema, meketendug ilan dinaan mangay ditu.
Delendeman ni Pablo di Kepanawen
5 Naa, danaan, meguliug pau ditug benwa Macedonia, dekag pau peditu niu lunsud Corinto, puˈ subay meguliugu diag benwa Macedonia. 6 Mabuˈ maibenu dayun megbebenwa dia niu ditu Corinto. Bisan mpapasi timpu metegdaw, melengas. Mauyaˈan ku ebangan niau dayun di kebundasu bisan tandaˈu pangay. 7 Puˈ mpauku saˈ maˈniinu laak kumabad di mata niu diin. Pedetengen ku saˈ buang nu Kaunutan, megbebenwau dia niu nga santaˈ bulan.
8 Laak dini pau pegbebenwa lunsud Efeso sampay dig Lumpuk Pentecostes. Dayun mpanawu. 9 Puˈ gembageli sikawan ku megukit Gempia Petenday dini mukaˈ pekpetuˈun di nga mikpetuud na. Kiin, bisan melaun pelumi kuminuntra dinaan.
10 Naa si Timoteo kiin, saˈ mateng na dia niu, penembaˈ niu iin gupia, puˈ piktamuyen dadema su Kaunutan, maˈniin dinaan. 11 Saladuaˈ diniu, ndiˈ mekpelabawlabaw diniin, subay pegbesaan niu. Ebangay niu dayun di kebundasen di pianan ginaa, adun mekepuliˈ dini naan. Pedetengen ku muliˈ ilan nu nga dumanen kepetedan ta.
12 Naa, ki mimated dinita si Apolos, tatapu iin penengiay meguliug ditu niu, ilan nu ngag duma kepetedan. Laak ndaˈ pa mpantek dig delendemanen mpia mpanaw nemun. Saˈ mekesikaw daw, mpanaw dayun meguliug dia niu.
Su Katapusan Tituluˈ
13 Mendadi, uu Mingumpated, pekpetubud amu, maaˈ nu getaw mengenduk. Ndiˈ niu begay pelinen su kekpetuud niu di Gempia Petenday. Ndiˈ niu begay mpelepeeˈ amu saanan niu megukit Gempia Petenday. Mukaˈ pepagen niui ginaa niu. 14 Bisan taˈ alanduni penggulaulaan niu, subay mekpuun di kepetail niu di nga samataw niu.
15 Naa, si nga Estefanas, misuunan niu puˈ ilanig bekna suminakup dini Kristu di tibuuk benwa Acaya. Tinduˈ nilan sug lawas nilan mektagikul tu nga samasakup nilan tu Megbebayaˈ. Penengiin ku diniu, Mingumpated, 16 pekpetuud amu di nga getaw maˈnia sampay tu ngag duma ta meksugut di nga samasakup ta gikteb nu sekeg nilan.
17 Su kedateng dini ni Estefanas, si Fortunato buˈ si Acaico, liliagu dun gupia puˈ guminantiˈ ilan diniu tug bugaˈan ku gupia. 18 Pileliag mau nilan, maaˈ dadema nu kepeleliag nilan diniu. Su nga getaw maˈnia, mbantang pegbesaan ta.
19 Naa su nga mikumpung mekpetuud dini Kristu dini prubinsya Asia, sinambay amu nilan. Si Aquila buˈ si Priscila, sampay su pikumpungan mekumpung diag balay nilan, sinambay amu nilan, puˈ miksalabuuk amu dinilan sumakup ditu Kaunutan. 20 Sinambay amu pa pagid nug launan kepetedan ta dini.
Pegdedialay amu maaˈ nu kededial niu di gapen niu.
21 Naan si Pablo, sulaten kui kesambayu kini diniu di kemetu gupia. Sinambayu damu dema.
22 Pia taˈ taway dun, adini getaw ndiˈen petailen su Kaunutan ta, subay ukuman nu Megbebayaˈ.
Marana tha! Maˈananen, Uu Kaunutan nami, saˈ mesuˈat, peksituaˈa na!
23 Naa, penenebiin ku, mbianan niu lelayun su tulung nu Kaunutan ta si Isus. 24 Mekpetailu lelayun diniu gelaˈ, puun tu keksalabuuk ta dini Kristu Isus.
Daal daitu. Pablo