6
Mekpaukum su nga Meksesega'ay tu Samasakupen laak
1 Naa sa' duuni pigbelikegan nu nga samasakup dia niu, mauma dema dumangat amu dia nga gukum kana' ta samasakup? Subay musay dun su nga piglegetawan nu Megbebaya'. 2 Nda' niu ba mesuunay pu' ditug binaya' gebii bu' gendaw, su piglegetawan nu Megbebaya'i mukum tu tiba'an getaw? Sa' ma'antu ukumen niu su tiba'an getaw, ndi' bamu metau mukum tu gembaba' pigbelikegan niu nemun? 3 Nda' ba niu dema mesuunay pu' ditug binaya' gebii bu' gendaw itai mukum tu nga sesugu'en nu Megbebaya' getaw langit? Sa' ma'antu, labi paita metau mukum tu gembaba' baalen di kegbenwa ta dinig lumbang kini. 4 Mendadi sa' duuni pigbelikegan niu, mauma dema paukum niu dia nga gukum nda'i gelalen di pikumpungan niu nga sakup ni Kristu? 5 Iini mitalu'u dun diniu adun mpiid amu. Nda'idun baig duma niu metau mukum di pigbelikegan nu nga mikpetuud? 6 Laak dagid iini pinggulaula niu, sa' duunig duma niu mauya'anen dengatenen su samasakupen, dumangat pelum ditu nga gukum kana' mekpetuud dini Kristu. Ndi' mpia!
7 Naa kumalenged duun pai biselaan niu, dinaag namu gupia nu kekinilawan niu. Tumu' saladua' diniu, sa' pelaatan nug dumanen, tigelenen da. Sa' pegdaawan, ma'antu dadema. 8 Laak mekpelaat amu pasi' tug duma niu, megdaaw damu dema! Bisan su kepetedan niu, pelaatan niu muka' pegdaawan da niu. 9-10 Naa, misuunan niu mabu' pu' su nga mekesala' getaw, nda'iduni mekeseled dun di Keglekaunutan nu Megbebaya'. Kaas ndi' niu melimbunganig lawas niu, pu' pia sala tawan, nda'iduni megdusa mekesalabuuk tu nga suminakup tu Keglekaunutan nu Megbebaya', mesama su megdusa, su mektamuy dig ledawan, su meglelingay, su menggulaula mekepiidpiid tu samalakinen, sa' samalibunen, su tulisan, su mesaku, su megbebulek, su menampalaksa, sa' su megdaaw. 11 Muka' duun diniui ma'niai gandang pigbetaden. Laak dagid, tumu' inugasan amu di sala' nemun, pigwakil na niu pa pagidig lawas niu tu Megbebaya', muka' pimilang namu niin mekesuun miksekat di pegbaya' nu Kaunutan ta si Isukristu muka' tug Balakat nu Megbebaya' su pektemuyen ta.
Iini Metubu' ita dun, adun Megdedengeg su Megbebaya'
12 Naa duuni mektalu' pu' ita nga sakup ni Kristu, mesu'at penggulaulaan ta dawig launan mauya'an ta. Metuud, laak dagid duunig baalen ta ndi' mekpaiseg di kekpetuud ta. Kig launan mauya'an ta, mesu'at baalen ta, laak naan, ndi'u begayig baalen ku mengulipen dinaan. 13 Duun pelumi mektalu' pu' iini binaal dun nu Megbebaya' su tian nu getaw, adun mbesug di gaan, muka' iini binaalen dun su gaan adun mbesug dun su tian. Metuud lai, laak dagid ditug binaya' gebii bu' gendaw, pengikteben nu Megbebaya' su tian muka' su gaan. Laak sug lawas, nda' da mbaal adun megdusa, pu' iini mibaal dun adun mektamuy tu Kaunutan. Muka' megingat su Kaunutan tug lawas nu nga sakupen. 14 Dekag minatay su Kaunutan, pitubu' puli' nu Megbebaya'. Ita dema, sa' matay naita, petubu'en ita niin puli' pebian di ginuungen.
15 Misuunan na niu mabu' pu' kig lawas niu, sepik na nug lawas ni Kristu. Sa' ma'antu, gempia ba lamugui sepik nug lawas ni Kristu ditug lawas nug libun meglaat pekesuunan? Ndi' lai mpia! 16 Nda' niu ba mesuunay pu' su getaw mampu' diag laat libun, lepeng salabuuk dig lawasen? Kana' ba gempantek kanugdiin di Misulat Talu' nu Megbebaya', “Ilan dua', lepeng salabuuk ilan dig lawas.” 17 Laak su getaw sumalabuuk ditu Kaunutan ta si Isukristu, mbaal ilan dua' nu Kaunutan salabuuk di ginaa. 18 Kaas pegliaw niui gayak niu tug libun muka' tug laki sa' kana' sawa niu, pu' dusa. Sug lain sala', sa' mekesala' dun su getaw, nda'ig labeten dig lawasen, laak sa' megdusai getaw, mekesala' di tudalis lawasen. 19 Misuunan na niu dadema mabu' pu' pegbenwanan nug Balakat nu Megbebaya' sug lawas niu muka' iini bigay diniu nu Megbebaya', pu' lepeng namu balay pengedapan tu Megbebaya'. Kana' namu megbaya' dig lawas niu. 20 Pu' sinaluy namu nu Megbebaya' di gembagel gupia bayad. Kaas ini baalen niu dig lawas niu, su mekpededengeg tu Megbebaya'.