Pɔlu lɔ oxo do ɛɖɛ xixo wu
2
1 Onu tantyantɔn xena ko lo dɔn mi nɔ wɛ nyi tun, mi a nɔ byɔ onuye Mawu, a bo nɔ xo ɛɖɛye, a bo nɔ ɖe kuku, a bo nɔ do ɛkpɛ na Mawu. Mi ba nɔ wasi onu mɛ laye seŋu do ota na ɛgbɛtɔ zɛtɛye. 2 Mi nɔ xo ɛɖɛ do ota na xɔluye, kpodo ɛmɛ xeni kpa ɛcɛ zɛtɛye, na mí a do zan ɛgbɛ le vivo kpo fifa mɛ, le Mawu sisi kpodo jijɔ nywɛ zinzan kpo mɛ. 3 Onu xeni nyɔhwyan, bo jɔhun wɛ e nyi le ŋumɛ na Mawu hwlɛngantɔ míatɔn, 4 xeni jlo tun ɛgbɛtɔ zɛtɛye a kpɔn hwlɛngan, a bo nyɔ oxojɔxo etɔn la. 5 Ɖo, Mawu ɖokpo gee wɛ le, ɛhwɛ yi do ota na ɛmɛtɔ ɖokpo gee can bɛ mɔ le, le ɛgbɛtɔye kpodo Mawu we agblamɛ. Ɛmɛ mɛ la wɛ nyi Klisu Yesu xeni mɔ nyi ɛgbɛtɔ. 6 Emyɔ la wɛ sɔ eɖe sɔ na, bo do tu axɔ do ota na ɛmɛ zɛtɛye. E mɛ la wɛ nyi kunu xena ye ɖe le ogan xena Mawu ɖo mɛ. 7 Kunuɖiɖe mɛ la wɛ dɔn na ye do sɔ mɔ ŋutɔ do ɖo Mawu we oxolɔtɔ kpodo ɛmɛ dindɔn xeni nyi onukplan-ɛmɛtɔ le xɔse kpodo oxojɔxo mɛ na ɛmɛ xeye ni ɔn nyi Jwifuye. Oxojɔxo wɛ ko lɔ nɔ, ko ɔn kan ojo nɔ.Pɔlu lɔ oxo do walɔ xeye na ŋusungloye kpodo nyɔnusiye na zan le agun mɛ wu
8 Ko jlo tun le ofi ɖekpekpe, ŋusungloye a nɔ xo ɛɖɛ nɔ, a bo nɔ kɔ alɔ mimɛye do yi oji, ye ni ká mɔ nɔ do aɖi, ye ni bo ká mɔ nɔ dɔn onu.
9 Mɔsinha ke, ko jlo tun nyɔnusiye a nɔ do onu ɖi lena e jɛ ɖo ha, kpo yɛyi kpo, le ojlɛ nu. Oɖa bibla yetɔn ni ká nyi tun ye a do ɖe yeɖe xlɛ, ye ni ká mɔ nɔ sɔ sika, alo oɣlɔ xeni vɛ oho, alo awu xeni vɛ oho ye do ɖo acɔ. 10 Vɔ, ye ni nɔ sɔ odan nywɛ wiwa a do ɖo acɔ, ɖi lena e jɛ ɖo ha na nyɔnusi xeye ni sɔ ogbeta a do sɛn Mawu ye.
11 Nyɔnusiye ni nɔ bɔ onu xwii le onukpinkplan hwenu, le ɛmɛ ɖe sɔ hwe mɛ. 12 Ko ɔn na ogbe nyɔnusi tun ni boo kplan onu ɛmɛ gbɔɔn a do ɖe ogbe do ŋusunglo ji can. E ɖo na nɔ bɔ onu xwii. 13 Ɖo, Aɖamu wɛ Mawu ɖo tantyan, gbɔxwe va ɖo Ɛvu. 14 E ko nyi Aɖamu hɛn jo eɖe do na Satana do blɛ, vɔ nyɔnusi la wɛ jo eɖe do, Satana bo blɛ, bo do gba osɛn xena Mawu do la. 15 Ganke, nyɔnu la na kpɔn hwlɛngan dogbɔn ovi jiji etɔn mɛ, na e do vivɛnu le xɔse mɛ, le owan yiyi mɛ, le ɛgbɛ kinkwɛn zinzan mɛ, bo nɔ wasi onu do ojlɛ nu.