Pɔlu le Maluta
28
1 Xena mí gan le afɔku mɛ la mɛ vɔ, mí va se tun otɔdodomɛ we oto la bo nɔ nyi Maluta. 2 Ɛmɛ xeye ni le oto la mɛ ye, yi mí, bo ɖe dɔmɛnywɛ sɔ xlɛ mí taŋu, bo bɔ ozo ɖaxo ɖe na mí, mí bo lɛ do-e, ɖo oju bɛ jija, vivɔ bo lo ci ɛmɛ nɔ. 3 Pɔlu bo bɛ onukpɔ xuxu ɖeye na do kɔn do ozo la mɛ, vɔ, zakpata ɖe tɔn sɔn onukpɔ la mɛ ɖo zozo gblɔ-ɛ, e bo kun kpla alɔ ni-i. 4 Xena Malutatomɛtɔye kpɔn zakpata la, e bo kun kpla alɔ na Pɔlu, ye lɔ na yenɔniɔye tun mɔ: «Le oxojɔxo mɛ, ɛmɛhutɔ ɖe wɛ na nyi dahwe mɛ, ɖo xena e gan le ɛxu si, yɔhwe we kojoɖiɖo ɔn jlo na jo-e do ɛgbɛ.» 5 Vɔ, Pɔlu bo mimi zakpata la do ozo mɛ. Onu ti ko wa emyɔ ŋutɔ. 6 Ye bo bu-i nɔ tun Pɔlu bo na tɛ wɛ ha alo onu bo na glɔn-ɛ do le zɔnɖokpo mɛ wɛ ha. Vɔ, xena ye nɔ ote dindyɔn ɖe, onu nyanyla ti ko jɔ do Pɔlu ji, susu yetɔnye ɖɔli, ye bo lɔ tun yɔhwe wɛ e nyi.7 Le blɛ la, nyigban ɖeye le bo nyi oto la mɛ we ogatɔn. E bo nɔ nyi Pwibliwisi, e bo yi mí ɖi hadweye ha, bo ɖo tɛnxo na mí do oxwe etɔn gbe na onyihinhɔn atɔn. 8 Pwibliwisi la otɔ bo le adɔn jan ji, vivɔ bo cɔn-ɛ, e bo nyɛ sinsin nɔ. Pɔlu bo va yi kpɔn-ɛ, bo xo ɛɖɛ ni-i, bo ɖo alɔ ota ni-i, adɔn bo gɔ ni-i. 9 Do e mɛ la wu, adɔnnɔ gbokpwe zɛtɛye xeni le oto la mɛ ye, va Pɔlu kɔn, ye bo kpɔn adɔngigɔ. 10 Ye wle yɛyi na mí taŋu, xena mí ka va sɔn nɔ, ye bo na mí onu xeye we hudo na mí ɖo ye na omɔ ji yiyi la.
Pɔlu yi Hlɔma
11 Xena sunzan atɔn va yi vɔ, mí ɖyɛ otɔjihun ɖe mɛ, e bo sɔn Alɛsandri. Otɔjihun mɛ la bo nɔ Maluta la le vivɔ we ganmɛ. Ye bo wlan do e wu tun mɔ: «Hooviye we yɔhwe.» 12 Mí va yi jɛ Silakwisi, bo nɔ blɛ na onyihinhɔn atɔn. 13 Xena mí lɛ le blɛ, ɛxuto wɛ mí gbɔn nɔ gbɔɔn bo va yi jɛ Hlejyo. Le onyihinhɔn gbe etɔn, jɛhɔn site sɔn afɔgbe, mi wɛ, le onyihinhɔn owe gblamɛ, mí va yi jɛ Puzɔlu. 14 Le blɛ, mí kpɔn nɔvi xɔsetɔ ɖeye, ye bo ɖe kuku na mí, na mí a do nɔ ye kɔn na onyihinhɔn acowe. Lena mí wa bo do yi Hlɔma, e mi mɛ. 15 Nɔvi xɔsetɔ xeye ni le Hlɔma bo se tun mí bo gbɔn nɔ ye, ye va kpe mí le kaka ofi xena ye nɔ yɔ tun Apwisi we dogbaji kpodo jonɔyityɔn atɔn laye. Xena Pɔlu kpɔn ye, e do ɛkpɛ na Mawu, bo mɔ ɖo ojidido. 16 Xena mí va jɛ Hlɔma, ye ɖe omɔ na Pɔlu, e ba do nɔ ovo le oxwe ɖe gbe, vɔ sɔja ɖokpo ba le e kɔn a bo lo cɔ-ɛ nɔ.
Pɔlu jla Mawu we Xɔluɖuɖu la nɔ
17 Onyihinhɔn atɔn godo, Pɔlu yɔ Jwifu xeye na ŋukunsin le ye ji ye, xena ye va kpli, e lɔ na ye tun mɔ: «Nɔvyee, ko ɔn wa onu ti do otogun míatɔn alo do kpan ŋukɔn akɔnu mía dagbwayetɔnye, ganke ye bo wle-o le Jeluzalɛmu, bo sɔ-ɔ sɔ do asi na Hlɔmatɔye. 18 Xena ye kan-a oxo se vɔ, Hlɔmatɔ laye jlo na jo-o do, ɖo, ko ɔn wa onu ti xeni jɛ na oku. 19 Vɔ, Jwifuye bo gbɛ, ko bo gbɔjwɛ va yɔ ɛhwɛ la do xɔlu ɖaxo Hlɔmatɔn kɔn, susu tɛye ko nyi tun ma do ɛhwɛ na otogun tɛye o. 20 Onu xeni dɔn na ko do byɔ tun ma kpɔn mi a bo do lɔ oxo na mi, e mi mɛ. Ɖo, do ɛmɛ xena Izrayɛli vikpɛye lo kpɔn omɔ na nɔ la wu, wɛ dɔn na ko do le gɛdɛ xeye mɛ.» 21 Ye bo ɖo e wu ni-i tun mɔ: «Mí ɔn yi wema ɖe sɔn Yude do wu we. Mía nɔvyɛ Jwifu ɖe ko sɔn blɛ danhɔn bo do va ɖo ogbe ɖe alo bo do lɔ oxo nyanyla ɖe do wu we o. 22 Vɔ, mí jlo na myɔ ŋutɔ a ɖe susu xena o lo bu nɔ gɔnmɛ na mí, ɖo mí nyɔ-ɛ tun, le ofi zɛtɛye, ɛmɛye site kpan ŋukɔn sinsɛngbɛ tɔwe mɛ la.» 23 Ye bo ɖo azan ni-i. Xena azan va la sɔgbe, ye ɛmɛ susu bo va e kɔn le ofi xena e zɛ. Sɔn kɛklɛ gbɔɔn do yi hwedo, Pɔlu bo lo ɖe onuye gɔnmɛ na ye nɔ, bo ɖe kunu do Mawu we Xɔluɖuɖu la wu nɔ. Dogbɔn Mɔyizi we Osɛn la kpodo oxolɔɖonyitɔye we wemaye mɛ, e nɔ ɖe xlɛ nɔ tun oxo xena ye se do Yesu wu bo nyi oxojɔxo. 24 Ɛmɛ ɖeye kan do oxo xena e lɔ nɔ ye ji, vɔ ɛmɛ ɖeye ko kan do e ji o. 25 Hwexenu na ye sɔn nɔ, mima ɖyɛ ye mɛ. Pɔlu lɔ na ye kpoŋu tun mɔ: «Ɛhwɛ jɔ na Gbigbɔ Kinkwɛn na e do lɔ na mia dagbwaye dogbɔn oxolɔɖonyitɔ Ezayi ji tun:
26 “Yi otogun mɛ kɔn, o ba lɔ tun mɔ:
‘Mi na se onu ganji, vɔ mi ɔn se e gɔnmɛ nɔ;
Ŋukunsin na le ote na mi ganji, vɔ mi ɔn kpɔn onu nɔ o.
27 Ɖo, onu ti ɔn mɔ ɖi onu ɖe na otogun mɛ;
Ye tu oto yetɔnye, bo myɔ ŋukunsin yetɔnye,
Na ŋukunsin yetɔnye ko mɔ do kpɔn onu nɔ,
Oto yetɔnye ko mɔ de se onu nɔ,
Oji yetɔnye ko mɔ do se onu gɔnmɛ nɔ,
Ye ko mɔ na va trɔ oji mɛ, ko ba do va gɔ adɔn na ye nɔ.’”
28 Mi nyɔ-ɛ tun mɔ: Mawu sɔ Hwlɛgan we oxo etɔn xe la sɔ ɖodan ɛmɛ xeye ni ɔn nyi Jwifuye. Yee, ye bo na se-e».
[ 29 Xena Pɔlu lɔ mɔsinha vɔ, Jwifu laye sɔn, bo va yi dɔn onu kpo yenɔniɔye nɔ sinsyɛnxu ɖea.] 30 Pɔlu nɔ ofi xena e xaya la na oxwe owe blebu. E bo nɔ yi ɛmɛ zɛtɛye xeni nɔ va kpɔn-ɛ nɔ ye. 31 E nɔ jla Mawu we Xɔluɖuɖu la nɔ, a bo kplan onu ɛmɛye nɔ do Xwetɔ Yesu Klisu la wu kpodo ojiɖiɖe kpo, onu ti ko nɔ xɛ omɔ ni-i o.