23
1 Pɔlu kpan ŋukɔn ɛhwɛɖɔtɔ laye, bo lɔ na ye tun mɔ: «Nɔvyee, ayixa tɛye ɔn nɔ do ɛhwɛ na-a do zɔnlin xena ko zɔn kpodo Mawu nɔ wu gbɔɔn do va jɛ egbe.» 2 Ovɔsantɔ ɖaxo Ananyasi bo ɖe ogbe na ɛmɛ xeye ni le aha na Pɔlu tun ye boo gba onu ni-i. 3 Mi wɛ Pɔlu lɔ ni-i tun mɔ: «Myɔ wɛ Mawu na xo, ogli xena ye si awɔn owee na, o xlɔn onyi bo na do ɖɔ ɛhwɛ na-a ɖi lena osɛn jlo ɖo, vɔ osɛn la mɛ o gba nɔ bo do lɔ tun ye boo xo mɔ!» 4 Ɛmɛ xeye ni le Pɔlu we aha ye, bo tɔ-ɛ ogbe, bo tun mɔ: «O zun Mawu we ovɔsantɔ ɖaxo la nɔ!» 5 Pɔlu bo ɖo e wu na ye tun mɔ: «Nɔvyee, ko ɔn nyɔ-ɛ tun ovɔsantɔ ɖaxo Mawutɔn la wɛ, ɖo ye wlan tun: “O ɔn zun otoga tɔwe nɔ.”» 6 Xena Pɔlu nyɔ-ɛ tun ɛhwɛɖɔtɔ laye we akpa ɖe bo nyi Sadusitɔye, ɖeye bo nyi Falizitɔye, e do axwa le ŋukɔn na ye bo tun mɔ: «Nɔvyee, Falizitɔ wɛ ko nyi, bo nyi Falizitɔ we ovi jiji, finfɔn sɔn oku xena ko kpɔn omɔ na nɔ, wɛ dɔn na ye do ɖɔ ɛhwɛ na-a nɔ.» 7 Xena Pɔlu lɔ mɔsinha kpoŋu, Falizitɔye kpodo Sadusitɔye bo jɛ onu dindɔn ji, otogun la bo ma. 8 Ɖo Sadusitɔye nɔ lɔ tun finfɔn sɔn oku bo ɔn le, Mawu we ɛwɛndotɔ kpo gbigbɔ ti can bo ko le o. Vɔ Falizitɔye bo nɔ lɔ tun onu mɛ laye bo le. 9 Axwa la gbɛ syɛnxu do e ji nɔ, mi wɛ osɛnkplan-ɛmɛtɔ ɖeye, xeni le Falizitɔye we ogbɛ mɛ ye, site, bo dɔn onu nɔ kpo akpasinsyɛn kpo tun mɔ: «Mí ɔn kpɔn ɛhwɛ ti bo na do na dahwe xe. Mi nyɔ na Mawu we ɛwɛndotɔ ɖe alo gbigbɔ ɖe wɛ lɔ oxo ni-i?» 10 Onu dindɔn la mɔ syɛnxu nɔ gbɔɔn Ahwanga la bo va vɔ nɔ tun ye bo na vunvun Pɔlu, mi wɛ e ɖe ogbe na sɔjaye tun ye boo ɖyɛ otogun la mɛ, boo yi Pɔlu le ye si, a bo kplɔ-ɛ yi ahwankpa la mɛ. 11 Gbegbe mɛ we ozan mɛ, Xwetɔ la va ze do ŋumɛ na Pɔlu bo tun mɔ: «Do oji! Ɖo o ɖe kunu na-a le Jeluzalɛmu bwɛ, e jɛ tun le Hlɔma can, o na mɔ ɖe kunu na-a ɖo mɔsinha.»Jwifuye bla osɛn do Pɔlu wu
12 Xena onyi hɔn, Jwifuye bla osɛn, bo ta Mawu tun na heye ɔn hu Pɔlu, heye bo ɔn ɖu onu ti nɔ gbɔɔn do nu onu ɖe nɔ. 13 Ye ɛmɛ xeye ni bla osɛn mɛ laye hugan ɛgbɛtɔ kanɖe. 14 Ye bo va yi kpɔn ovɔsantɔ Mawutɔn we ogaye kpo otomɛhyɔnye kpo, bo lɔ na ye tun mɔ: «Míye, mí ta Mawu, bo tun na mí ɔn hu Pɔlu, be mí ɔn ɖu onu ti nɔ. 15 Mi wɛ, miye kpo ɛhwɛɖɔtɔ ɖaxoye kpo na ɖo ogbekpɔ, a bo lɔ na ahwanga la tun ni boo kplɔ Pɔlu va na mi. Mi ba lɔ tun heye bo ka gbeje oxo etɔn la kpɔn nɔ ceɖeceɖe. Míye, mí o na le ogbe sisɔ a do hu-i, keŋu gbɔxwe e na va bwɛ.» 16 Vɔ Pɔlu we onylɔ yɔvi ŋusunglo se ogbe xena ye bla do Pɔlu wu la. Mi wɛ e yi ahwankpa la mɛ, bo va yi xo okpa na Pɔlu. 17 Mi wɛ Pɔlu yɔ sɔjaga ɖokpo bo lɔ ni-i tun mɔ: «Kplɔ hwanjavi xe do yi ahwanga la kɔn, ɖo e ɖo oxo ɖe bo ka lɔ ni-i nɔ.» 18 Sɔjaga la bo kplɔ-ɛ do yi ahwanga la kɔn, bo tun mɔ: «Ogantɔ Pɔlu wɛ yɔ-ɔ, bo lɔ na-a tun mɔ boo kplɔ hwanjavi xe va kɔn we, ɖo e bo ɖo oxo ɖe bo ka lɔ na we nɔ.» 19 Ahwanga la hɛn alɔ na hwanjavi la, bo kplɔ-ɛ jɛ azɔga, bo kan-ɛ se tun mɔ: «Oxo ŋukɔ lɛ o ɖo, bo ka lɔ na nɔ?» 20 E bo ɖo e wu ni-i tun mɔ: «Jwifuye ɖo ogbekpɔ, bo na va byɔ we tun myɔ boo hɛn Pɔlu va ɛhwɛɖɔtɔ ɖaxoye we ŋukɔn le swɛ, ɖi tun ye ka gbeje oxo etɔn la kpɔn nɔ ceɖeceɖe ha. 21 Vɔ, ká kan do oxo yetɔn ji, ɖo ɛmɛye hugan kanɖe ha le ye mɛ, bo na ɖo omɔ ni-i. Ye sɔ ogbeta, bo ta Mawu tun na heye ɔn hu Pɔlu heye bo ɔn ɖu onu nɔ gbɔɔn do nu onu ɖe nɔ. Ye o le ogbe sisɔ fifi, ogbe yiyi tɔwe jan wɛ ye nɔ ote kpɔn nɔ.» 22 E kakaɖi na hwanjavi la tun ni boo ká lɔ oxo mɛ laye na ɛmɛ ti, e mɛ godo, e bo lɔ ni-i tun ni boo va sɔn.
Ye sɔ Pɔlu ɖodan otoga Felisi kɔn
23 E mɛ godo, ahwanga la yɔ sɔjagaga owe, bo lɔ na ye tun mɔ: «Mi kple sɔja sandi owe, sɔja osɔjinɔtɔ kanɖegban, kpodo sɔja kanhwandatɔ sandi owe, ye ba le ogbesisɔ a do yi kaka Sezale le ozangan ɛcɛnɛ mɛ. 24 Mi jla osɔye ɖo na Pɔlu can, a do kplɔ-ɛ yi otoga Felisi kɔn, onu ti ni ká wa-ɛ le omɔ la ji.» 25 E mɛ godo, e wlan wema bo tun mɔ: 26 «Mɔ Klodiwusi Lisyasi, ko do ogbe ɖodan ɛmɛ ɖaxo otoga Felisi nɔ. 27 Jwifuye wle dahwe xena ko sɔ ɖodan we nɔ xe, bo ka hu-i nɔ, xena ko se tun Hlɔma we otovi bɛ e bo nyi, ko kplɔ sɔja tɛyee, mí bo va yi yi-i le ye si. 28 Xena ko jlo na nyɔ onu xe we ɛhwɛ na ye do ni-i nɔ, ko kplɔ-ɛ yi ɛhwɛɖɔtɔ ɖaxo yetɔnye kɔn. 29 Ko va kpɔn onu jɛ e wu tun osɛn yetɔnye we oxo ɖeye wɛ dɔn na ye do do ɛhwɛ ni-i nɔ, vɔ e ɔn hu ɛhwɛ ti xeni jɛ na oku alo ogankpamɛ ninɔ o. 30 E mɛ godo, ye va xo okpa na-a tun Jwifuye bo bla osɛn do e wu. Mi wɛ dɔn, ko do sɔ ogbeta trololo tun ko bo na sɔ-ɛ ɖodan we, ko bo lɔ na ɛmɛ xeye ni do ɛhwɛ ni-i nɔ ye tun ye boo va yi yɔ-ɛ ɛhwɛ le kɔn we».
31 Sɔja laye bo wasi onu xena e dɔn ye, ye bo kplɔ Pɔlu do sɔn yi Antipatrisi we toxo mɛ, le ozan mɛ. 32 Le onyihinhɔngbe etɔn, sɔja osɔjinɔtɔye zɔn omɔ la kpodo Pɔlu, sɔja gbokpweye bo trɔ va sɔn yi ahwankpa la mɛ. 33 Xena osɔjinɔtɔ laye jɛ Sezale la, ye sɔ wema la na otoga la, bo sɔ Pɔlu sɔ do alɔ mɛ ni-i. 34 Otoga la xlɛ wema la, bo kan Pɔlu se tun kansin ŋukɔ mɛ lɛ e sɔn jaa, xena e se tun Silisi we kansinmɛ bɛ e bo sɔn, 35 e bo lɔ ni-i tun mɔ: «Na ɛmɛ xeye ni do ɛhwɛ na we nɔ ye va vɔ, ko ba kan oxo we se.» E bo na ogbe tun ye boo kplɔ-ɛ sɔ ɖo oxwe xena Elɔdu gba mɛ, a bo cɔ-ɛ nɔ.