Pɔlu yi Masedwanu kpodo Glɛsi
(Hlɔ 15:25-27; 1 Kɔlɛn 16:1-7)
20
1 Hwexenu na hunnya-hunnya laye ɖo ote le Efɛzu we toxo la mɛ, Pɔlu kpli onukplanvi laye, bo na ye ojidido. E mɛ godo, e lɛ le ye kɔn, bo jɛ omɔ a do yi Masedwanu we oto mɛ. 2 E gbɔn oto mɛ la we kansinye mɛ, bo do akpakpa lanmɛ na xɔsetɔye na oganxixo susu, e mɛ godo, e bo sɔn yi Glɛsi we oto mɛ. 3 E bo nɔ blɛ na osunzan atɔn. Hwexenu na e ka do otɔjihun nɔ a do sɔn yi Sili we kansinmɛ, e se tun Jwifuye bo bla ogbe do e wu nɔ, e bo sɔ ogbeta a do gbɔn Masedwanu we oto mɛ, a bo do sɔn. 4 Ɛmɛ xeye ni kplɔ-ɛ do ye xɛn: Sopatɛ xeni nyi Bele we toxomɛtɔ bo nyi Pilwisi vyɛ, Alisitaki kpodo Segɔndusi xeye ni sɔn Tɛsalonika, Gaywisi xeni sɔn Dɛbu, Timɔte, Ticiki, Tlofimu xeye ni sɔn Azi we kansinmɛ. 5 Ye ɛmɛ mɛ laye, bo jɛ ŋukɔn na mí, bo va yi tre kpɔn mí le Trowasi. 6 Mi wɛ, míye, mí do otɔjihun le Filipu, le kpɔnnɔ ma ɖo tinkɛn we oxwe la godo. Onyihinhɔn atun godo, mí va yi bɔ do ye wu le Trowasi we toxo la mɛ, mí bo nɔ blɛ la na kwɛsiɖa ɖokpo.Pɔlu fɔn Etikusi sɔn oku le Trowasi
7 Le kwɛsiɖa la we azan tantyantɔn gbe, mí kpli, a bo do ɖu onuɖuɖu kinkwɛn la. Xena e nyi tun Pɔlu ɖo na sɔn le onyihinhɔngbe etɔn, e lɔ oxo na xɔsetɔye nɔ, bo dɛn afɔ na oxo etɔn gbɔɔn do va yi jɛ ozangan weve mɛ mɔsinha. 8 Zogyan susu gbagbagba bo le titɛ le oxɔ xe mɛ na mí kpli le la. Oxɔ la bo le sanŋu ji. 9 Mi wɛ, hwanjavi ɖe xena ye nɔ yɔ tun Etikusi xlɔn onyi le flɛsɛ nu, bo ɖyɛ awlɔn mɛ taŋu le hwexenu na Pɔlu mɔ gbɛ dɔn afɔ na oxo etɔn nɔ. Xena awlɔn mu-i, e flɛ sɔn sanŋu atɔngɔ la ji bo va jɛ nyixɔ mɛ. Ye bo kɔ-ɛ, e bo le kuku. 10 Vɔ, Pɔlu bo jɛ ote, bo hwlɛndo do yi e kɔn, bo xwi, bo kɔ-ɛ do alɔ mɛ, bo lɔ tun mɔ: «Mi ká mɔ lo onu, e le ɛgbɛ!» 11 Xena, Pɔlu mɔ trɔ sɔn yi sanŋu la ji, e ma kpɔnnɔ la, ye bo ɖu, e mɛ godo, e bo mɔ lɔ oxo na oganxixo dindyɔn ɖe, gbɔɔn do yi kɛklɛnu. Xena e lɔ oxo la vɔ, e bo sɔn. 12 Mi wɛ ye kplɔ hwanjavi la va, e bo le ɛgbɛ, ye bo kpɔn akɔnfifa ɖaxo ɖe.
Pɔlu lɛ le Trowasi bo do yi Milɛ
13 Míye, mí jɛ ŋukɔn, bo do otɔjihun bo do sɔn yi Asosu, blɛ la wɛ mí na kɔ Pɔlu le, ɖo emyɔ ŋutɔ o sɔ ogbeta a do zɔn afɔ do yi toxo mɛ la mɛ. 14 Xena e va kpe mí le Asosu la, mí kɔ-ɛ do otɔjihun la mɛ, bo do sɔn yi Mitilɛnu. 15 Sɔn blɛ la wɛ mí mɔ gbɔn ɛxu ji le, bo va yi jɛ Cyo le onyihinhɔngbe etɔn, onyihinhɔn atɔngɔ gbe mí bo va yi jɛ Samɔsu, mi wɛ onyihinhɔn ɛnɛgɔ gbe etɔn, mí jɛ Milɛ. 16 Pɔlu bo o sɔ ogbeta tun he bo na gbɔn Efɛzu we toxo la ŋukɔn, e ko mɔ do gú ganmɛ le Azi we kansinmɛ nɔ, ɖo, e lo hwlɛndo nɔ, e mɛ, na e na do kpewu jɛ e ji, e ba jɛ Jeluzalɛmu le Pɛntekotu we azan la gbe.
Pɔlu klan agunmɛhyɔn xeye ni le Efɛzu
17 Hwexenu na Pɔlu le Milɛ we toxo la mɛ, e dɔn ɛmɛye ɖodan Efɛzu we toxo la mɛ, na ye a do yɔ agunmɛhyɔnye do va. 18 Xena ye va e kɔn vɔ, e lɔ na ye tun mɔ: «Mi nyɔ jijɔ xena ko zan do va yi miakɔn le ogan ɖekpekpe mɛ, sɔn gbexegbe na ko ɖyɛ Azi we kansinmɛ. 19 Ko wa odan na Xwetɔ la kpodo ɛmɛ ɖe sɔ hwe taŋu, kpodo ɖasin le ŋumɛ, do vivɛsise xeye na Jwifuye we ogbe biblaye hɛn va na-a ye wu. 20 Mi bo nyɔ-ɛ tun, ko ɔn ɖe okɔ le onu xeni na ɖe ale na mi ti wu; ko jla Mawu we oxo la na mi, bo kplan onu mi le dogbajiye kpodo oxwegbe ye can. 21 Ko bo lɔ oxo na Jwifuye kpodo ɛmɛ xeye ni ɔn nyi Jwifuye, na ye a do ɖɔli jijɔ, a bo ɖo xɔse do Xwetɔ míatɔn Yesu ji. 22 Fifi, ko lo sɔn yi Jeluzalɛmu nɔ, ɖo Gbigbɔ Kinkwɛn tun mɔ bo ɖo na yi dandan, ko ko nyɔ onu xeni ka va yi jɔ do ji ye le blɛ nɔ. 23 Vɔ, onu xena ko nyɔ-ɛ jan wɛ nyi tun, dogbɔn toxo ɖokpo-ɖokpo mɛ, Gbigbɔ Kinkwɛn nɔ ɖo ɛkpɛn e ji a bo lɔ na-a nɔ tun gɛdɛ kpodo vivɛsiseye bo tre kpɔn-ɔ nɔ le blɛ. 24 Vɔ, ko ɔn nɔ lo onu ti do ɛgbɛ tɛye wu ɖi onu xeni vɛ na-a ha, onu xena mɔ ko jlo nɔ jan wɛ nyi tun ma yi vivɔnu na odun dido tɛye kpodo odan xena Xwetɔ la sɔ do asi na-a. Mi wɛ nyi tun, a jla Mawu we dɔmɛnywɛ we Ɛwɛn Nywɛ la.
25 Fifi, ko nyɔ-ɛ tun mi ɔn mɔ kpɔn ŋumɛ tɛye nɔ, mi ɛmɛ zɛtɛye xe mɛ na ko gbɔn bo do jla Mawu we Xɔluɖuɖu la. 26 Mi wɛ dɔn ko do lɔ-ɛ na mi nɔ le egbe, bo ɖo ɛkpɛn e ji nɔ tun, ɛmɛ ti we ohlɔn ɔn le okɔ na-a le mia mɛ, 27 ɖo ko lɔ Mawu we tito zɛtɛye na mi, ko ko hwla ti do mi. 28 Mi cɔ miaɖe, a bo kpe ŋukunsin do otogun xena Gbigbɔ Kinkwɛn sɔ mi sɔ ɖo kplɔtɔ na ye ji, mi ba do kplɔ agun Mawutɔn xena e xɔ kpodo ɛhun etɔn. 29 Ɖo, ko nyɔ-ɛ tun, na ko sɔn vɔ, ɛmɛ xeye ni le ɖi ohla danuwatɔye ha, na ɖyɛ mia mɛ, a bo wa onu nyanyla kpo otogun la. 30 Mi wɛ le mia mɛ, ɛmɛye na site, a bo kan ojoye nɔ, a do dɔn onukplanvi laye do ɛtɛ. 31 Mi wɛ dɔn, mi nɔ ŋuzɔn, a bo nyɔ-ɛ tun, le oxwe atɔn gblamɛ, ozan kpodo oklo, ko ɔn dokpo afɔ ma ɖo afɔ ji na ɖokpo-ɖokpo miatɔn kpodo ɖasin le ŋumɛ.
32 Fifi ko sɔ mi sɔ do alɔ mɛ na Mawu, bo jo mi do na ɛfɛnu we oxo etɔn. Mawu ɖo hɔnhlɔn a do na mi ŋukɔn yiyi le xɔse mɛ, a bo mɔ do na cinɔ ɛmɛ kinkwɛn zɛtɛye seŋu. 33 Ko ɔn jlo ɛmɛ ɖe we oho, alo sika alo onudido ɛmɛ ɖe tɔn. 34 Miye ŋutɔye mi nyɔ-ɛ tun alɔ tɛye xeye, wa odan bo ɖo ohyan tɛyee kpodo ɛmɛ xeye ni nɔ kplɔ-ɔ do ye tɔn wu. 35 Le onu zɛtɛye mɛ, ko ɖe xlɛ mi tun, mi ɖo na nɔ wa odan ɖo mɔsinha, a bo kpewu gɔ alɔ na ayanɔye. Mi bo ɖo na nɔ ɖoŋudo Xwetɔ Yesu la we oxoye wu, emyɔ ŋutɔ wɛ lɔ tun mɔ: “Nyɔna le onunina mɛ hugan onu yiyi mɛ”».