Yesu kpe kpo Solu le Damasi we omɔ ji
9
1 Le hwemɛ la nu, Solu mɔ gbɛ glɔn oku we adan na Xwetɔ la we onukplanviye nɔ. E bo va yi kpɔn Mawu we ovɔsantɔ ɖaxo la, 2 bo lɔ ni-i tun ni boo wasi wema xeni na he ɛcɛ, na he a bo hɛn do yi Jwifuye we okplityɔnye xeni le Damasi, na ŋusunglo ɖeye alo nyɔnusi ɖeye le blɛ bo zɔn do Yesu we omɔ ji nɔ, he a bo wle ye do va Jeluzalɛmu. 3 Hwexenu na e le omɔ la ji bo tɛkpɔ Damasi la nɔ, zɔnɖokpo kpoŋu, kinklɛn ɖe sɔn jiŋukunsin bo lɛ do-e. 4 E jɛ onyi do nyixɔ mɛ, bo se ogbe ɖe lo lɔ ni-i nɔ tun mɔ: «Solu, Solu, ɛlɛ dɔn o do ci ɛtɛ na-a nɔ?» 5 Solu bo kan se tun mɔ: «Onu lɛ o nyi, Xwetɔ?» Xwetɔ la bo ɖo e wu ni-i tun mɔ: «Mɔ wɛ nyi Yesu xena o ci ɛtɛ na nɔ. 6 Fifi, site a bo dyɛ Damasi we toxo la mɛ, blɛ la wɛ ye na lɔ onu xena o na wasi la, na we le.» 7 Ɛmɛ xeye kpo Solu kpo ni lo sɔn nɔ ye, bo ci ote, onu kikɛ bo glo do vivɔ wu, ɖo, ye se ogbe la nɔ, vɔ, ye ko kpɔn ɛmɛ ti nɔ. 8 Solu site le nyixɔ mɛ. Ŋukunsin etɔnye le hunhun ganke, e ɔn mɔ kpɔn onu ti nɔ. Ye bo hɛn alɔ ni-i bo do yi Damasi la. 9 E nɔ onu ma kpɔn, onu ma ɖu, onu ma nu na onyihinhɔn atɔn.10 Yesu we onukplanvi ɖe le Damasi la, ye bo nɔ yɔ-ɛ tun Ananyasi. Xwetɔ la bo lɔ ni-i le ɖiɖexlɛ mɛ tun mɔ: «Ananyasi!» E bo yi ogbe tun: «Xwetɔ, mɔ xɛn.» 11 Xwetɔ la bo lɔ ni-i tun mɔ: «Site, a bo yi omɔ xena ye nɔ yɔ tun omɔ jijɔ la ji, o ba ɖyɛ Yuda we oxwegbe, a bo kan dahwe Tasi we toxo mɛtɔ ɖe xena ye nɔ yɔ tun Solu we ota mɛ se. E le blɛ bo xo ɛɖɛ nɔ. 12 Gbɔn ɖiɖexlɛ mɛ, e kpɔn dahwe ɖe xena ye nɔ yɔ tun Ananyasi, e bo va e kɔn, bo ɖo alɔ ota ni-i, e ba mɔ do kpɔn onu.» 13 Ananyasi bo ɖo e wu tun mɔ: «Xwetɔ, ko se ɛmɛ susuye lɔ lena dahwe mɛ la ɖe ofun na agunvi tɔweye ɖo le Jeluzalɛmu. 14 E bo va bwɛ kpodo ɛcɛ xena Mawu we ovɔsantɔ ɖaxoye ni-i, e ba do bla ɛmɛ ɖekpekpe xeni gbɛ yɔ nyikɔ tɔwe nɔ.» 15 Vɔ, Xwetɔ la bo lɔ ni-i tun mɔ: «Yi, dahwe mɛ la nyi odanwanu xena ko can, a do ɖe nyikɔ tɛye sɔ xlɛ ɛmɛ xeye ni ɔn nyi jwifuye, kpodo xɔluye, kpodo Izrayɛli we otogun la. 16 Mɔ ŋutɔ na ɖe aya xena e na ɖu do nyikɔ tɛye wu a sɔ xlɛ-ɛ.» 17 Ananyasi yi, bo ɖyɛ oxwe la gbe, bo ɖo alɔ ota na Solu, bo lɔ ni-i tun mɔ: «Solu, nɔvye, Xwetɔ Yesu xeni ɖe eɖe sɔ xlɛ we le omɔ xe ji na o le bo do gbɔn nɔ, wɛ ɖo-o ɖodan, na mɔ do kpɔn onu, a bo gɔ kpo Gbigbɔ Kinkwɛn.» 18 Zɔnɖokpo onu ɖi afanye ha bo flɛ le ŋukunsin ji ni-i, e bo mɔ jɛ onu kpinkpɔn ji. E bo site, ye bo lɛ Mawu we ɛsin ni-i. 19 Xena e ɖu onu vɔ, e kpɔn hɔnhlɔn.
Solu to Mawu we oxo le Damasi
Solu la bo nɔ onukplanvi xeye ni le Damasi laye kɔn, na azan viɖe. 20 Zɔnɖokpo e jɛ Yesu we oxo lilɔ ji le Jwifuye we okplityɔnye tun emyɔ bɛ bo nyi Mawu we ovi la. 21 E kpaca do ɛmɛ zɛtɛye xeni se oxo lilɔ etɔn nɔ, ye bo lɔ nɔ tun mɔ: «Dahwe mɛ la hɛn nɔ ci ɛtɛ na ɛmɛ xeye ni nɔ yɔ Yesu we nyikɔ la nɔ ye, le Jeluzalɛmu wɛɛ? Va hɛn e va a do wle ye, sɔ yi Mawu we ovɔsantɔ ɖaxoye we ŋukɔn wɛɛ?» 22 Vɔ, Solu bo lo syɛnxu nɔ le oxo lilɔ mɛ, Jwifu xeye ni le Damasi ye, bo nɔ flu. E bo nɔ ɖe xlɛ nɔ tun Yesu bɛ bo nyi Klisu la.
23 Le azan susu ɖeye godo, Jwifu laye bla ogbe a do hu-i, 24 vɔ, Solu bo se okpa. Ɛmɛ laye bo nɔ cɔ toxo la we agboye, ozan kpo oklo, a do hu-i. 25 Mi wɛ, le ozan mɛ gbeɖokpo, Solu we onukplanviye sɔ-ɛ do jaxwi ɖe mɛ, bo ɖe-e jɛ ote do toxo la we oglikpa godo gbɔn otro ɖaxo ɖe mɛ.
Solu va Jeluzalɛmu
26 Xena Solu va Jeluzalɛmu, e jɛ gbagba a do ɖyɛ onukplanvi Yesutɔnye we ogbɛ mɛ, vɔ, ye ɛmɛ zɛtɛye bo vɔ-ɛ nɔ, ɖo ye ɔn kan do e ji tun, le oxojɔmɛ, e o nyi onukplanvi Yesutɔn. 27 Mi wɛ Banabasi kplɔ-ɛ do yi ɛmɛ dindɔn laye kɔn, bo xo gbexo na ye sɔn lena Solu kpɔn Xwetɔ la ɖo kpodo lena Xwetɔ la lɔ oxo ni-i ɖo le Damasi we omɔ la ji. Banabasi la bo mɔ lɔ lena Solu jla Ɛwɛn Nywɛ la le Yesu we nyikɔ mɛ le Damasi la kpodo kan do e ji kpo ɖo. 28 Bɛ sɔn hwemɛnu, Solu kpo ye kpo nɔ yi nɔ, a bo va nɔ, le Jeluzalɛmu, e bo nɔ lɔ oxo nɔ kpodo kan do e ji kpo le Xwetɔ la we nyikɔ mɛ. 29 E bo nɔ jɛ jɛtun kpodo Jwifu xeye ni nɔ do glɛki we ogbe ye can, a bo dɔn onu kpo ye nɔ, vɔ yee bo jlo na hu-i. 30 Xena nɔvi le xɔse mɛ ye se okpa, ye kplɔ Solu do sɔn yi Sezale, bo do sɔ-ɛ sɔ ɖodan Tasi.
31 Fifa bo le na agunye le Yude, Galile kpodo Samali kpo, ye bo li odo nɔ, bo nɔ zɔn le Xwetɔ la we vivɔ mɛ nɔ, agunviye bo su do e ji nɔ, dogbɔn Gbigbɔ Kinkwɛn we hɔnhlɔn dido ɛmɛ mɛ.
Yesu gɔ adɔn na Enɛ gbɔn Piyɛ ji
32 Piyɛ dan gbɔn oto zɛtɛye mɛ nɔ. Gbeɖokpo, e va yi xɔsetɔ xeye ni le Lida ye kɔn, 33 bo kpɔn dahwe ɖe le toxo la mɛ, ye bo nɔ yɔ-ɛ tun Enɛ. Dahwe mɛ la, ci ojan ji sɔn oxwe atrotɔn gbɔɔn, ɖo, e kplibɔ. 34 Piyɛ bo lɔ ni-i tun mɔ: «Enɛ, Yesu Klisu gɔ adɔn na we, site, myɔ ŋutɔ o ba xa ojan tɔwe.» Zɔnɖokpo kpoŋu, e bo site. 35 Xena Lida kpodo Salɔn we toxomɛtɔ zɛtɛye kpɔn-ɛ, ye kan do Xwetɔ la ji.
Tabita fɔn sɔn oku
36 Le Yope, nyɔnu ɖe le bo nyi onukplanvi Yesutɔn, ye bo nɔ yɔ-ɛ tun Tabita, xeni nyi «Dɔkasia» le glɛki we ogbe mɛ. Le hwe zɛtɛye nu, e nɔ wa onu nywɛ nɔ, a bo mɔ kpedo ayanɔye wu nɔ. 37 Le hwe mɛ la nu e jɛ adɔn bo ku. Xena ye lɛ ɛsin na ocɔ etɔn vɔ, ye sɔ-ɛ sɔ ɖo sanŋu ji. 38 Lida we toxo la ɔn dɛn le Yope we toxo wu. Xena onukplanvi xeye ni le Yope ye, se tun Piyɛ bo le Lida, ye dɔn ŋusunglo owe ɖodan e kɔn, a do va yi do ɛwɛn ni-i tun mɔ: «Le kukuɖiɖe mɛ, hwlɛndo a bo va kpɔn mí.» 39 Mi wɛ Piyɛ site, bo kplɔ ye do, xena e va yi jɛ Yope, ye kplɔ-ɛ do yi sanŋu la ji, okposi zɛtɛye bo tɛkpɔ-ɛ kpo avin kpo, ye bo sɔ awu ɖaxoye kpodo awu oviye xena Dɔkasi nɔ wasi le hwexenu na e le ɛgbɛ, sɔ xlɛ-ɛ. 40 Piyɛ ɖe ɛmɛ zɛtɛye tɔn-ɛ, bo jɛ klita, bo xo ɛɖɛ. E mɛ godo e lɛkɔ kpɔn ocɔ la bo tun mɔ: «Tabita site!» Mi wɛ e hun ŋukunsin, xena e kpɔn Piyɛ, e bo xlɔn onyi. 41 Piyɛ hɛn alɔ ni-i bo sɔ-ɛ site, bo yɔ xɔsetɔye kpodo okposi laye kpo bo sɔ-ɛ sɔ xlɛ ye ɛgbɛ-ɛgbɛ. 42 Yope we toxo la seŋu wɛ se onu xeni jɔ la, mi wɛ ɛmɛ susu kan do Xwetɔ la ji. 43 Piyɛ bo nɔ Yope na azan susu le Simɔ xeni nɔ jla olangbaza ɖo, kɔn.