Ye wle Piyɛ kpo Jan kpo do ogankpa mɛ
4
1 Hwexenu na Piyɛ kpodo Jan kpo mɔ gbɛ lɔ oxo na otogun la nɔ, Mawu we ovɔsantɔye, kpodo Mawu we oxwecɔtɔye we oga kpodo Sadusitɔye, va ye kɔn. 2 Aɖi bo wle ye do Piyɛ kpo Jan kpo we onu xena ye kplan otogun la nɔ wu, bo do lɔ nɔ tun finfɔn sɔn oku bo le na ɛmɛ kukuye, ɖo Yesu bo ku bo fɔn. 3 Mi wɛ, ye wle ye sɔ tu do ogankpa mɛ. Xena e nyi tun ozan o lo do nɔ, Piyɛ kpo Jan kpo bo nɔ ogankpa la mɛ gbɔɔn do yi onyihinhɔngbe etɔn. 4 E nyi ɖo mɔsinha ganke, ɛmɛ susu bo xɔse, xɔsetɔye bo su do e ji gbɔɔn ŋusungloye bo yi ɛmɛ akpo atun ha.Ye kplɔ Piyɛ kpo Jan kpo va ɛhwɛɖɔtɔye kɔn
5 Le onyihinhɔngbe etɔn, otogaye, agunmɛhyɔnye, kpodo osɛnkplan-ɛmɛtɔye, bo va kpli le Jeluzalɛmu. 6 Mawu we ovɔsantɔ ɖaxo Anu kpodo Kayifu, Jan, Alɛsandru kpodo ɛmɛ xe zɛtɛye ni gbɛ le Mawu we ovɔsantɔ ɖaxoye we okunkan mɛ, yee can bo va kpli. 7 Ye bo kplɔ Piyɛ kpo Jan kpo va ye mɛ, bo kan ye se tun mɔ: «Hɔnhlɔn ŋukɔ lɛ mi zan, alo onu we nyikɔ mɛ lɛ mi gɔ adɔn na dahwe kplibɔnɔ la le?» 8 Piyɛ xeni gɔ kpo Gbigbɔ Kinkwɛn kpo, bo lɔ na ye tun mɔ: «Otogaye kpodo agunmɛhyɔnye, 9 mí wasi onu nywɛ na dahwe kplibɔnɔ la, xena e nyi tun e mɛ la wɛ dɔn na mi do kan mí se nɔ tun naɖe e nyi ɖo na e do kpɔn adɔngigɔ, 10 mi ɛmɛ zɛtɛye kpodo Izrayɛli we otogun la seŋu, mi ɖo na nyɔ-ɛ tun dogbɔn Yesu Klisu Nazalɛtitɔn we nyikɔ mɛ wɛ dahwe mɛ la le afɔtenu le ŋukɔn na mi le. Yesu mɛ la wɛ mi kan do otinsoga ji, Mawu bo fɔn-ɛ sɔn oku. 11 Mawu we oxo lɔ do Yesu mɛ la wu tun mɔ:
“Ɛkpɛn xena mi ɛmɛ oxɔwatɔye gbɛ,
Wɛ va trɔ zun azwe ji we ɛkpɛn.”
12 Yesu mɛ la ɖokpo gee, wɛ na kpewu hwlɛn ɛmɛ gan; ɖo nyikɔ bu ti ɔn mɔ le na Mawu sɔ na le ɛgbɛ xe mɛ bo na do hwlɛn mí gan».
13 Ɛhwɛɖɔtɔ laye bo kpɔn tun mɔ, Piyɛ kpo Jan kpo bo ɔn se wema, ye bo mɔ nyi ɛmɛ vɔvɔye. Vɔ ye bo lɔ oxo kpodo kan do e ji kpo nɔ. E mɛ la bo kpaca ye, ye bo o kpɔn onu jɛ e wu tun, ye bo o nɔ kplɔ Yesu do saa. 14 Xena ɛhwɛɖɔtɔ laye, kpɔn dahwe xeni kpɔn adɔngigɔ la le ote le aha na Piyɛ kpo Jan kpo, ye ɔn mɔ kpɔn oxo ti bo na ɖo e wu. 15 Ɛhwɛɖɔtɔ laye bo nya ye tɔn-ɛ le ɛhwɛɖɔxwe la. Xena ye tɔn vɔ, ɛhwɛɖɔtɔ laye bo gbeje oxo la kpɔn nɔ le yeɖe mɛ, 16 bo lo lɔ nɔ tun mɔ: «Ɛlɛ mí na wa na ye ɛmɛ mɛ laye? Jeluzalɛmutɔ zɛtɛye wɛ nyɔ-ɛ ganji tun ye bo wasi ŋudandonu kpatakli, míye ko kpewu na lɔ tun e bo nyi ojo. 17 Vɔ ganke, na ɛmɛ susu ko mɔ do se oxo la le otogun la mɛ nɔ, mí ɖo na gbɛ na ye taŋu tun ye boo ká mɔ lɔ oxo na ɛmɛ ɖe do nyikɔ mɛ la wu».
18 E mɛ godo, ye bo yɔ Piyɛ kpo Jan kpo, bo gbɛ na ye kpo akpa sinsyɛn kpo tun ye boo ká mɔ lɔ oxo alo a bo kplan onu ɛmɛ ɖe le Yesu we nyikɔ mɛ. 19 Piyɛ kpo Jan kpo bo kan ye se tun mɔ: «Miye ŋutɔ mi gbeje-e kpɔn tun e sɔgbe le Mawu we ŋumɛ tun mí a gbɛ oto nu sise na Mawu a bo va se oto nu na miye? 20 Míye, mí ɔn dokpo oxo ma lɔ do onu xena mí kpɔn bo se wu nɔ.» 21 Ɛhwɛɖɔtɔ laye ɔn kpɔn ɛhwɛ ti bo na do dɔn oto na Piyɛ kpo Jan kpo, ɖo otogun la zɛtɛye lo kanfu Mawu nɔ do onu xeni jɔ la wu. Ye bo nya ye, bo kan ŋumɛ na ye, 22 ɖo, dahwe xeni kpɔn adɔngigɔ dogbɔn ŋudandonu xena Mawu wasi la mɛ, e ɖo hugan oxwe kanɖe.
Xɔsetɔye xo ɛɖɛ
23 Xena ye jo Piyɛ kpo Jan kpo do, ye sɔn yi ye nɔvyɛ xɔsetɔye kɔn, bo lɔ onu xena ovɔsantɔ Mawutɔn laye kpodo agunmɛhyɔnye lɔ, na ye. 24 Xena ye nɔvyɛ laye ɖo oto Piyɛ kpo Jan kpo vɔ, ye bo kɔ ogbe do okpɔ bo xo ɛɖɛ na Mawu bo lɔ tun mɔ: «Xwetɔ, myɔ wɛ ɖo jiŋukunsin, nyixɔ, ɛxu kpo onu xeni le ye mɛ zɛtɛye. 25 Dogbɔn Gbigbɔ Kikwɛn ji, myɔ wɛ lɔ dogbɔn mía dagbwa Davidi xeni nyi odansɔvi tɔwe we onu mɛ tun mɔ:
“Ɛlɛ jɔ na hunnya-hunnya do le otogunye mɛ?
Ye bo nɔ bla ogbeye, vɔ e bo nɔ nyi vɔvɔ.
26 Xɔlu xeye ni le nyixɔ la ji ye, site
Ogaye bo kpli yeɖe
Kpan ŋukɔn Mawu Xwetɔ la kpodo Klisu etɔn.”
27 Ɖo le oxojɔxo mɛ, xɔlu Elodu kpo Pɔnsu Pilati kpo, kpodo Izrayɛli vikpɛye kpo ɛmɛ xeye ni ɔn nyi Jwifuye, ye site le toxo xe mɛ, bo kpan ŋukɔn odansɔvi tɔwe kinkwɛn, Yesu xena o sɔ do ɖo Klisua la. 28 Onu xena myɔ ŋutɔ o jlo kpo hɔnhlɔn tɔwe kpo le saa tun e bo na va jɔ, wɛ ye wasi. 29 Fifi, Xwetɔ, kpɔn lena ye lo kan ŋumɛ na mí nɔ ɖo, do hɔnhlɔn mí ɛmɛ odansɔvi tɔweye, na mí a nɔ jla oxo tɔwe kpodo kan do e ji taŋu. 30 Ɖe hɔnhlɔn tɔwe sɔ xlɛ, na adɔngigɔye, josiye kpo ŋudandonuye, a nɔ jɔ le odansɔvi tɔwe kinkwɛn Yesu we nyikɔ mɛ.» 31 Xena xɔsetɔ laye xo ɛɖɛ vɔ, ofi xena ye kpli le la hunhun, ye ɛmɛ zɛtɛye bo gɔ kpo Gbigbɔ Kinkwɛn, bo jla Mawu we oxo la nɔ kpo kan do e ji kpo.
Xɔsetɔye lo wasi nɔvi nɔ
32 Xɔsetɔye we ogbɛ kpikple la bo ɖo ogbenɔkpɔ, ayixa ɖokpo kpo susu ɖokpo wɛ nɔ kplɔ ye. Onu xena ye ɖo zɛtɛye, ye bo nɔ bɛ ye do okpɔ. Ɛmɛ ti ɔn nɔ lɔ tun onu hetɛye bo nyi he ɖokpotɔn. 33 Ɛmɛ dindɔn laye bo ɖe kunu do Xwetɔ Yesu la we finfɔn sɔn oku wu nɔ kpo hɔnhlɔn ɖaxo ɖe, Mawu bo kɔn dona gbagbagba do ye ɛmɛ zɛtɛye ji nɔ. 34 Onu ti ko nɔ hudo ɛmɛ ti le ye mɛ. Ɛmɛ xeye ni ɖo ogle alo oxweye, ye nɔ sa ye, a bo sɔ onu xena ye sa laye we oho sɔ va. 35 Ye bo nɔ sɔ oho la sɔ na ɛmɛ dindɔn laye, ye bo nɔ va ma-ɛ na ɛmɛ ɖokpo-ɖokpo ɖi lena ohyan etɔn le ɖo ha. 36 Mɔsinha wɛ, Jozɛfu xeni tɔn sɔn Lewi we akɔta mɛ, ye bo ji-i le Ciplu we kansinmɛ, ɛmɛ dindɔn laye bo sɔ nyikɔ ni-i tun Banabasi, xe we gɔnmɛ ni nyi tun «ɛmɛ xeni nɔ do zozo lanmɛ na ɛmɛ,» 37 va yi sa ogle etɔn ɖe, bo sɔ oho la sɔ va na ɛmɛ dindɔn laye.