Yesu ɖe eɖe sɔ xlɛ onukplanvi etɔn acowe
21
1 Azan oviiɖe va yi, Yesu bo mɔ ɖe eɖe sɔ xlɛ onukplanvi etɔnye ke, le Tibelyadi we otɔ to. Lena e ɖe eɖe sɔ xlɛ ye ɖo xɛn: 2 Simɔ Piyɛ, Tɔma, xena ye nɔ yɔ tun Togbosu, Natanayɛli xeni sɔn Kana le Galile we kansinmɛ, Zebede vikpɛye, kpodo onukplanvi Yesutɔn owe buye, ye ɛmɛ mɛ la zɛtɛye le okpɔ. 3 Simɔ Piyɛ bo lɔ na ye tun: «Ko ka yi da oɖɔ nɔ.» Ye bo lɔ ni-i tun: «Míye can, mí a kplɔ we do.» Ye sɔn bo ɖyɛ otɔjihun la mɛ. Vɔ, ye ɔn wle onu ti le ozan mɛ la mɛ. 4 Xena ŋukɔn jɛ ɖiɖe ji, Yesu le ote le otɔ la to, vɔ onukplanvi laye ɔn nyɔ-ɛ tun emyɔ wɛ. 5 Yesu bo lɔ na ye tun: «Vikpɛ tɛyee, mi wle ohwe wɛɛ?» Ye bo tun: «O o!» 6 E bo lɔ na ye tun: «Mi da oɖɔ la do aɖusi mɛ na otɔjihun la, mi bo na kpɔn ohwe a bo wle.» Mi wɛ ye da oɖɔ la, dindɔn bo glo, ɖo, ohwe gɔ-ɛ tanŋu-tanŋu. 7 Mi wɛ onukplanvi xena Xwetɔ la yi owan na-a, lɔ na Piyɛ tun mɔ: «Xwetɔ la wɛ!». Xena Simɔ Piyɛ se oxo mɛ la tun Xwetɔ la bɛ, e sɔ awu ɖaxo etɔn sɔ bla do alin ji, ɖo, e ɖe-e saa, e bo lɔn jɛ otɔ la mɛ. 8 Onukplanvi gbokpweye bo zɔn tɔjihun la mɛ do va ago bo lo dɔn oɖɔ xena ohwe gɔ la nɔ, ɖo sɔn ofi xena ye le, do yi ago la ji, mɛta sandi ɖokpo ha wɛ. 9 Xena ye jɛ ote, ye kpɔn akanzo ɖe le ofi la, ohwe bo le e ji, kpɔnnɔ can bo le blɛ. 10 Yesu bo lɔ na ye tun: «Mi sɔ ohwe xena mi wle fifi la ɖeye va.» 11 Simɔ Piyɛ ɖyɛ otɔjihun la mɛ, bo dɔn oɖɔ la tɔn le otɔ la mɛ va ago, e bo gɔ kpodo ohwe ɖaxo-ɖaxoye. Xixlɛ etɔn zɛtɛye bo nyi sandi ɖokpo ota atun ŋukun atɔn (153). Ohwe la su ɖo mɔsinha ganke, oɖɔ la ko vun. 12 Yesu lɔ na ye tun: «Mi va ɖu onu.» Onukplanvi ti ɔn ɖo oji, bo na do kan-ɛ se tun mɔ: «Onu lɛ o nyi?» Ɖo ye nyɔ-ɛ tun Xwetɔ la bɛ. 13 Yesu sɔ kpɔnnɔ la, bo tɛkpɔ ye, bo ma na ye, bo mɔ na ohwe la can ye. 14 Sɔn hwexenu na Yesu fɔn sɔn oku, zɔn atɔngɔ mɛ e lo ɖe eɖe sɔ xlɛ onukplanvi etɔn laye nɔ.Yesu lɔ na Piyɛ tun ni boo kpe ŋukunsin do lɛngbɔvi hetɛyee wu
15 Xena ye ɖu onu la vɔ, Yesu lɔ na Simɔ Piyɛ tun: «Simɔ, Jan vyɛ, o yi owan na-a hugan ɛmɛ xeye?» Piyɛ bo ɖo e wu ni-i tun: «Ɛɛn Xwetɔ, o nyɔ-ɛ tun ko bo yi owan na we.» Yesu bo lɔ ni-i tun: «Kpe ŋukunsin do lɛngbɔvi tɛyee wu.» 16 E mɔ kan-ɛ se zɔn owegɔ tun: «Simɔ Jan vyɛ, o yi owan na-a?» Piyɛ bo tun: «Ɛɛn, Xwetɔ, o nyɔ-ɛ tun ko bo yi owan na we.» Yesu lɔ ni-i tun: «Kplɔ lɛngbɔ tɛyee.» 17 E mɔ kan-ɛ se zɔn atɔngɔ tun: «Simɔ Jan vyɛ, o yi owan na-a?» Xena Piyɛ kpɔn tun Yesu bo kan he se zɔn atɔngɔ tun he yi owan ni-i ja, e ci onulilo mɛ. E bo ɖo e wu tun: «Xwetɔ, o nyɔ onu zɛtɛye, o nyɔ-ɛ tun ko yi owan na we ma!» Yesu bo ɖo e wu ni-i tun: «Kpe ŋukunsin do lɛngbɔ tɛyee wu. 18 Oxojɔxo kpatakli xɛn ko lo lɔ na we nɔ: hwexenu na o le winwyan mɛ, myɔ ŋutɔ wɛ nɔ bla alin tɔwe ji, o bo nɔ yi ofi xena o jlo. Vɔ, na o va ku nyɔxo, alɔye wɛ o na drɛn, ɛmɛ bu ba bla alin tɔwe ji na we, a bo kplɔ we yi ofi xena o ɔn jlo.» 19 Oku xe ha ŋumyɔ na Piyɛ na va ku, a do do bubu Mawu wu, we oxo wɛ Yesu lo lɔ nɔ. E mɛ godo Yesu bo lɔ na Piyɛ tun mɔ: «Kplɔ-ɔ do.»
20 Piyɛ ɖe okɔ kpɔn godo, bo kpɔn onukplanvi xena Yesu yi owan na la, gbɔn nɔ. Onukplanvi mɛ la wɛ dɛ do Yesu we akɔnnu le hwexenu na ye ɖu onu nɔ saa, bo kan-ɛ se tun: «Xwetɔ onu lɛ ka sa we nɔ?» 21 Xena Piyɛ kpɔn-ɛ, e lɔ na Yesu tun: «Xwetɔ emyɔ ɖe, naɖe lɛ etɔn na va nyi ɖo?» 22 Yesu bo ɖo e wu ni-i tun mɔ: «Na ko tun ni boo nɔ ɛgbɛ gbɔɔn do jɛ hwexenu na ko na trɔ va, ŋukɔ lɛ kan we le e mɛ? Myɔ kplɔ-ɔ do!» 23 Oxo la gbakpe do xɔsetɔye mɛ, tun onukplanvi mɛ la bo ɔn ku nɔ. Ganke Yesu ko lɔ na Piyɛ tun e bo ɔn ku nɔ. E lɔ ni-i tun na he jlo tun ni-i boo nɔ ɛgbɛ gbɔɔn do jɛ hwexenu na he na trɔ va, ŋukɔ lɛ kan-ɛ le e mɛ jaa.
24 Onukplanvi mɛ la ŋutɔ wɛ ɖe kunu onu xeye ni jɔ laye tɔn nɔ, bo wlan ye. Mí bo nyɔ-ɛ tun kunuɖiɖe etɔn bo nyi oxojɔxo.
Oxotaɖiɖo
25 Yesu mɔ wasi onu susu buye; na mí na do wlan onu mɛ laye ɖokpo-ɖokpo wɛ, ko ɖi tun wema xena mí na wlan la na su gbɔɔn, ɛgbɛ la blebu ɔn kpewu na ɖo tɛnxo a do hɛn ye can.