16
1 «Ko lɔ oxo xeye na mi, na e ko mɔ do nyi afɔklɛnnu na xɔse miatɔn nɔ. 2 Ye na nya mi le Jwifuye we okplityɔnye. Oganxixo ɖeye lo gbɔn nɔ, na ɛmɛ ɖekpekpe xeni na hu mi, na bu-i tun Mawu we odan la mɛ, e lo wa nɔ ha. 3 Ye na wa onu ɖo mɔsinha, ɖo, ye ɔn nyɔ Didaye gbɔɔn do nyɔ mɔ la can. 4 Ko lɔ oxo xe na mi, e mɛ, na ogan la va xo, mi ba do flin tun ko bo o lɔ-ɛ na mi ɖo onyi.Ko ɔn lɔ oxo xeye na mi ɖo onyi saa, ɖo, ko le kpodo mi.
Gbigbɔ Kinkwɛn we odan
5 Fifi ko sɔn yi ɛmɛ xeni ɖo-o ɖodan de nɔ, ɛmɛ ti ko le mia mɛ, bo kan-a se tun bɔ lɛ ko yi nɔ can. 6 Vɔ, mi ci dɔŋuɖunu mɛ taŋu, ɖo, ko lɔ oxo xeye na mi; 7 ganke, oxojɔxo bɛ ko lɔ na mi nɔ. Na ko sɔn, e na ɖe ale na mi, ɖo, na ko ɔn sɔn, Akɔnfana-ɛmɛtɔ la ɔn va nɔ. Vɔ, na ko sɔn, ko na dɔn-ɛ ɖodan mi. 8 Na e va va, e na na ɛgbɛtɔye na nyɔ-ɛ tun gɔnmɛ sise xena ye ɖo do onu nyanyla wiwa wu, kpodo onu jijwɛ wiwa wu, kpodo kojoɖiɖo wu, bo ɔn sɔgbe. 9 Ye na kpɔn onu jɛ e wu tun gɔnmɛ sise xena ye ɖo do onu nyanyla wiwa wu bo ɔn sɔgbe, ɖo ye ɔn kan do ji ye. 10 Ye na kpɔn onu jɛ e wu tun gɔnmɛ sise xena ye ɖo do onu jijwɛ wiwa wu bo ɔn sɔgbe, ɖo ko sɔn yi Otɔ la de nɔ, mi ko mɔ kpɔn-ɔ nɔ. 11 Ye na kpɔn onu jɛ e wu tun gɔnmɛ sise xena ye ɖo do kojoɖiɖo wu, bo ɔn sɔgbe ɖo Mawu o ɖo kojo na ɛmɛ xeni kpa ɛcɛ do ɛgbɛ la ji.
12 Oxo susu mɔ le nu ye, ko bo na lɔ na mi, vɔ, fifi e kpɛn hugan mi. 13 Hwexenu na oxojɔxo we Gbigbɔ la na va, e na na na mi na nyɔ oxojɔxo la zɛtɛye. Ɖo, e ɔn lɔ oxo le emyɔ ŋutɔ we ɛcɛ mɛ nɔ, vɔ, oxo xeni na se zɛtɛye wɛ e na lɔ, a bo lɔ onu xeni ka va jɔ nɔ ye na mi. 14 E na ɖe hɔnhlɔn tɛye sɔ xlɛ, ɖo, e na nɔ se ɛwɛn le nu ye a bo nɔ do na mi. 15 Onu xeni nyi Didayetɔn zɛtɛye wɛ nyi mɔ can tɛye. Mi wɛ dɔn ko do lɔ tun Gbigbɔ la bo na nɔ se ɛwɛn le nu ye a bo do na mi.»
Dɔŋuɖunu na trɔ zun jijwɛ
16 Yesu mɔ yi e ji bo tun: «Zaanɖe fi, mi ɔn mɔ kpɔn-ɔ nɔ, e mɔ yi zaanɖe mi ba mɔ kpɔn-ɔ.» 17 Mi wɛ onukplanvi etɔn ɖeye lo lɔ le yenɔniɔye ye mɛ nɔ tun mɔ: «Oxo mɛ la we gɔnmɛ ɖe? E lɔ na mi nɔ tun: “Zaanɖe fi mi ɔn mɔ kpɔn-ɔ nɔ, e mɔ yi zaanɖe mi ba mɔ kpɔn-ɔ”. E bo mɔ tun “Ko sɔn yi Otɔ la de nɔ.” 18 Ɛlɛ nyi “zaanɖe fi” xe we oxo na e lɔ nɔ la? Mí ɔn se oxo la gɔnmɛ nɔ mɔ.» 19 Yesu bo kpɔn onu jɛ e wu tun ye bo ka kan oxo he se nɔ. Mi wɛ e lɔ na ye tun mɔ: «Ko lɔ na mi tun “Zaanɖe fi mi ɔn mɔ kpɔn-ɔ nɔ, e mɔ yi zaanɖe mi ba mɔ kpɔn-ɔ.” Oxo mɛ la wɛ dɔn na mi do kan oxo se mianɔniɔye nɔ? 20 Oxojɔxo kpatakli xɛn ko lɔ na mi nɔ: mi na va fan avin nɔ, a bo na ale nɔ, vɔ ɛgbɛ la ba kpɔn jijwɛ nɔ. Mi na le dɔŋuɖunu mɛ, vɔ dɔŋuɖunu miatɔn bo na trɔ zun jijwɛ. 21 Na nyɔnusi ka ji ovi nɔ, e nɔ le onulilo mɛ, ɖo vivɛsise we ogan xo, vɔ na e ji ovi la vɔ, e nɔ wɔn vivɛsise etɔnye ɖo e nɔ le jijwɛ mɛ taŋu, do ovi la xeni va ɛgbɛ la mɛ wu. 22 Mɔsinha ke wɛ, miye can mi le vivɛsise mɛ fifi, vɔ, ko na trɔ va kpɔn mi, hwemɛnu, mi na kpɔn jijwɛ, ɛmɛ ti ko kpewu na ɖe jijwɛ mɛ la tɛ le oji miatɔn mɛ. 23 Le azan mɛ la ji, mi ɔn mɔ kan-a oxo ti se nɔ. Oxojɔxo kpatakli xɛn ko lo lɔ na mi nɔ, onu xena mi na byɔ Otɔ la le nyikɔ tɛye mɛ, e na sɔ-ɛ na mi. 24 Gbɔɔn do va jɛ fifi, mi ɔn byɔ onu ti le nyikɔ tɛye mɛ. Mi byɔ na mi a yi, oji ba do jɔ mi taŋu.
Yesu ɖu le ɛgbɛ la ji
25 Ko do olo bo do lɔ oxo mɛ ye na mi, oganxixo la gbɔn nɔ, ko ko mɔ do olo na mi nɔ, vɔ, ko na lɔ oxo xeni kun do Otɔ la wu na mi, trelele. 26 Le azan mɛ la gbe mi na byɔ onu Mawu le nyikɔ tɛye mɛ. E ɔn nyi ko lɔ nɔ tun ko bo na xo ɛɖɛ na Didaye do ota na mi hɛn. 27 Didaye la ŋutɔ yi owan na mi, ɖo, mi yi owan na-a, mi bo kan do e ji tun Mawu mɛ bɛ ko bo jɔ sɔn. 28 Ko sɔn Otɔ la kɔn bo va ɛgbɛ la mɛ, Fifi, ko na mɔ lɛ le ɛgbɛ la mɛ, a bo trɔ sɔn yi Otɔ la kɔn.» 29 Onukplanvi etɔnye bo lɔ ni-i tun mɔ: «Fifi gbɔɔn bɛ xɛn o lɔ oxo nɔ trelele, o ko mɔ do olo ti nɔ o. 30 Fifi, mí nyɔ-ɛ tun myɔ bo o nyɔ onu zɛtɛye seŋu, e ko mɔ hyan tun ɛmɛ ɖe a kan oxo we se. Mi wɛ dɔn mí do kan do e ji tun Mawu mɛ bɛ myɔ bo jɔ sɔn.» 31 Yesu bo ɖo e wu na ye tun: «Mi kan do e ji fifi? 32 Mi kpɔn oganxixo ɖe lo gbɔn nɔ, ogan la can bo o xo, na ye na gba mi do sesese, ɛmɛ ɖokpo-ɖokpo bo na sɔ omɔ etɔn a bo jo mɔ ɖokpo do. Vɔ, e ɔn nyi mɔ ɖokpo hɛn le, ɖo, Otɔ la le kpo-o. 33 Ko lɔ oxo xeye na mi, na mi a do kpɔn fifa le mɔ mɛ. Mi na se vivɛ le ɛgbɛ la mɛ, vɔ, mi do oji, ɖo ko ɖu le ɛgbɛ do la ji!»