Yesu klɔ afɔ na onukplanvi etɔnye
13
1 Vivayi we oxwe la drɔn swɛ, Yesu bo nyɔ-ɛ tun ogan la bo xo na e na do lɛ le nyixɔ ji bwɛ, a do sɔn yi Otɔ de. E yi owan na ɛmɛ etɔn xeye ni le ɛgbɛ la mɛ ye, bo mɔ gbɛ yi owan na ye nɔ gbɔɔn do yi vivɔnu. 2 Yesu kpodo onukplanvi etɔnye lo ɖu hwesa we onuɖuɖu nɔ. Lɛgba bo o sɔ do ayixa mɛ na Yuda Simɔ Isikalyɔtu vyɛ, tun ni boo sɔ Yesu sɔ jo. 3 Yesu nyɔ-ɛ tun Mawu de bɛ emyɔ ŋutɔ bo sɔn, bo mɔ trɔ sɔn yi Mawu de nɔ, Otɔ la bo o sɔ onu zɛtɛye sɔ do alɔ mɛ ni-i. 4 Yesu site le onuɖuka la nu, bo ɖe awu gaga etɔn sɔ ɖo onyi, bo sɔ avɔ ɖe do bla alin ji. 5 E mɛ godo, e ba ɛsin do agban ɖe mɛ, bo jɛ afɔ kiklɔ ji na onukplanvi etɔnye, e bo nɔ sɔ avɔ xeni do bla alin ji la do tutu-i.6 E va jɛ Simɔ Piyɛ ji, mi wɛ Piyɛ lɔ ni-i tun mɔ: «Xwetɔ, myɔ wɛ na klɔ afɔ na-aa?» 7 Yesu bo ɖo e wu ni-i tun mɔ: «Onu xena mɔ, ko wasi nɔ fifi, myɔ, o ɔn kpɔn onu jɛ e wu, vɔ, o na va kpɔn onu jɛ e wu.» 8 Piyɛ bo lɔ tun mɔ: «A klɔ afɔ na mɔ! Gbeɖe kpɔn!» Yesu bo ɖo e wu ni-i tun mɔ: «Na ko ɔn klɔ afɔ na we, be onu ti ɔn mɔ dɔn mɔ kpodo myɔ kpo ca.» 9 Simɔ Piyɛ bo lɔ ni-i tun mɔ: «Xwetɔ, e le mɔsinha, be e ɔn nyi afɔye ɖoɖyo hɛn mɔ, klɔ, alɔye kpodo ota tɛye can!» 10 Yesu bo lɔ ni-i tun mɔ: «Ɛmɛ xeni o lɛ ɛsin, e ɔn mɔ hyan tun ye a lɛ ɛsin ni-i, zɛgbɔn afɔ etɔnye wu, ɖo e o mɛ sesese. Miye mi o mɛ, ganke e ko nyi mi ɛmɛ zɛtɛye hɛn.» 11 Yesu o nyɔ ɛmɛ xeni ka sa-ɛ nɔ la, mi wɛ dɔn e do lɔ tun ye ɛmɛ zɛtɛye bo ɔn mɛ.
12 Xena e klɔ afɔ na ye vɔ, Yesu mɔ trɔ do awu gaga etɔn bo mɔ va yi xlɔn onyi le onuɖuka la nu, bo lɔ na ye tun mɔ: «Onu xena ko wasi na mi fifi la, mi se e gɔnmɛ doo? 13 Mi nɔ yɔ-ɔ tun “Onukplan-ɛmɛtɔ”, bo nɔ yɔ-ɔ tun “Xwetɔ”, ɛhwɛ miatɔn bo jɔ, ɖo, mi wɛ ko nyi. 14 Xena mɔ ɛmɛ xeni nyi Xwetɔ, kpo onukplan-ɛmɛtɔ la, lo klɔ afɔ na mi nɔ, miye can, mi ɖo na klɔ afɔ na mianɔniɔye. 15 Ko sɔ e mɛ do na mi kpɔndewu na mi a do wasi ɖi lena ko wasi na mi ɖo ha. 16 Oxojɔxo kpatakli xɛn ko lɔ na mi nɔ, odansɔvi, ɔn hugan xwetɔ etɔn, ɛmɛ dindɔn ko hugan ɛmɛ xeni dɔn-ɛ ɖodan. 17 Fifi mi kpɔn onu jɛ onu mɛ ye wu, nyɔnanɔye wɛ mi na nyi, na mi gbɛ wasi do ye ji. 18 E ɔn nyi mi ɛmɛ zɛtɛye hɛn ko lɔ oxo na nɔ, ko nyɔ ɛmɛ xeye na ko can ye. Vɔ Winwlan Kinkwɛn la we oxo xe, ɖo na cɛ. Mi wɛ nyi: “Ɛmɛ xeni ɖu kpɔnnɔ tɛye nɔ, site kpan ŋukɔn-ɔ.” 19 Ko lo lɔ-ɛ na mi nɔ zɔnɖokpo, keŋu gbɔxwe ni a va jɔ, e mɛ, na e va jɔ nɔ, mi ba do kan do e ji tun ko bo nyi ɛmɛ xena ko nyi. 20 Oxojɔxo kpatakli xɛn ko lɔ na mi nɔ, ɛmɛ ɖekpekpe xeni na yi ɛmɛ xena ko dɔn ɖodan, e yi mɔ ŋutɔ can, ɛmɛ ɖekpekpe ni yi mɔ, e yi ɛmɛ xeni dɔn-ɔ ɖodan.»
Yesu lɔ tun Yuda bo na va sa he
21 Xena Yesu lɔ oxo ɖo mɔsinha vɔ, ayixa gbado ni-i seŋu, mi wɛ e lɔ vivɛɖe tun mɔ: «Oxojɔxo kpatakli xɛn ko lo lɔ na mi nɔ, mia domɛtɔ ɖokpo na sɔ-ɔ sɔ sa.» 22 Onukplanvi laye bo kpɔn ŋumɛ na yenɔniɔye nɔ, bo lo kan se nɔ tun, onu wu lɛ e lo lɔ oxo mɛ la do nɔ jaa. 23 Onukplanvi xena Yesu yi owan na taŋu la, le aha tututu na Yesu, le onuɖuka la nu. 24 Simɔ bo wa ŋukunsin ni-i tun ni boo kan Yesu se tun onu we oxo lɛ e lɔ nɔ jaa. 25 Mi wɛ, onukplanvi la dɛ do akɔnnu na Yesu bo lɔ ni-i tun mɔ: «Xwetɔ, onu lɛ la?» 26 Yesu bo ɖo e wu tun ko na kan kpɔnnɔ a bo tɔ onu le agban mɛ, ɛmɛ xena ko na sɔ na la, emyɔ wɛ. Mi wɛ Yesu sɔ kpɔnnɔ kinkan ɖokpo, bo tɔ onu le agban la mɛ, bo sɔ na Yuda, xeni nyi Simɔ Isikalyɔtu vyɛ. 27 Xena Yuda yi kpɔnnɔ la vɔ, Satana ɖyɛ e mɛ. Yesu bo lɔ ni-i tun mɔ: «Onu xena o ka wasi nɔ la, wasi-i bleŋu!» 28 Ɛmɛ xeye kpodo mi kpo ni ɖu onu nɔ laye, ti ɔn nyɔ onu xeni dɔn na e do lɔ mɔsinha ni-i. 29 Xena e nyi tun Yuda wɛ nɔ hɛn oho la, ɛmɛ ɖeye bu-i tun Yesu bo lɔ ni-i nɔ tun ni boo va yi xɔ onu xeye na heye bo hyan a do ɖu oxwe la wɛ ha, alo, ni boo va yi na onu ɖe ayanɔye. 30 Xena Yuda yi kpɔnnɔ kinkan la, e tɔn le ofi la zɔnɖokpo. Ozan bo o do.
Yesu na ogbeɖiɖe yɔyɔ
31 Xena Yuda tɔn, Yesu lɔ tun: «Fifi, Ɛgbɛtɔ we Ovi la o lo yi gigo nɔ, Mawu bo o lo yi gigo nɔ dogbɔn e ji. 32 [Xena Mawu o lo yi gigo nɔ dogbɔn emyɔ la ji,]b Mawu ŋutɔ na ɖe Ovi la we gigo sɔ xlɛ, e bo na ɖe-e xlɛ zaanɖe. 33 Vikpɛ tɛyee, ko mɔ gbɛ le mia kɔn na azan ovii ɖe. Mi na va kan-a, vɔ, ɖi lena ko o lɔ na Jwifu gbokpweye ɖo ha, ofi xena mɔ ko sɔn yi nɔ, mi ɔn kpewu na va ofi la. Mi mɛ ko mɔ lɔ na miye can nɔ fifi. 34 Ko lo na mi osɛn yɔyɔ nɔ: mi yi owan na mianɔniɔye. Ɖi lena ko yi owan na mi ɖo ha, mi yi owan na mianɔniɔye. 35 Na mi yi owan na mianɔniɔye, ɛmɛ zɛtɛye na kpɔn onu jɛ e wu tun miye bo nyi onukplanvi tɛyee.»
Yesu lɔ tun Piyɛ bo na va gbɛ he
36 Simɔ Piyɛ bo kan-ɛ se tun mɔ: «Xwetɔ bɔ lɛ o yi nɔ?» Yesu bo ɖo e wu ni-i tun mɔ: «O ɔn kpewu na kplɔ-ɔ do fifi a do yi ofi xena ko yi nɔ la, vɔ, o na va kplɔ-ɔ do.» 37 Piyɛ bo lɔ ni-i tun: «Xwetɔ ɛlɛ jɔ na ko ɔn do kpewu na kplɔ we do le fifi? Ko le ogbesisɔ a do sɔ ɛgbɛ tɛye sɔ na do ota na we.» 38 Yesu bo ɖo e wu ni-i tun mɔ: «O le ogbesisɔ na do sɔ ɛgbɛ tɔwe sɔ na do ota na-a oxojɔxo! Oxojɔxo kpatakli xɛn ko lo lɔ na we nɔ: keŋu gbɔxwe goklo na do atan, o na gbɛ zɔn atɔn kpetyo tun he bo ɔn nyɔ mɔ.»