Yesu do olo do lɛngbɔkplɔtɔ wu
10
1 Yesu lɔ tun: «Oxojɔxo kpatakli xɛn ko lo lɔ na mi nɔ, ɛmɛ xeni ɔn gbɔn lɛngbɔkpomɔnu bo do ɖyɛ okpwe la mɛ, vɔ bo gbɔn okpa ta gbɔn ofi bu do ɖyɛ e mɛ, ɛmɛ mɛ la, fyanfinnɔ jaguda wɛ e nyi. 2 Vɔ, ɛmɛ xeni gbɔn omɔnu do ɖyɛ e mɛ, wɛ nyi lɛngbɔkplɔtɔ la. 3 Lɛngbɔkpocɔtɔ la nɔ hun okpwe la ni-i, lɛngbɔ laye bo nɔ se ogbe etɔn, e bo nɔ yɔ lɛngbɔ etɔn laye we nyikɔ ɖokpo-ɖokpo, a bo ɖe ye tɔn-ɛ. 4 Na e ɖe ye ɛmɛ zɛtɛye tɔn-ɛ vɔ, e nɔ jɛ ŋukɔn na yea, lɛngbɔ laye bo nɔ kplɔ-ɛ do, ɖo, ye nyɔ ogbe etɔn. 5 Ye ɔn kplɔ jonɔ do nɔ kpɔn gbeɖe, si jan wɛ ye na si ni-i. Ɖo, ye ɔn nyɔ jonɔye we ogbe.»6 Yesu do olo xe la na ye, vɔ, ye ɔn kpɔn onu jɛ oxo xena e lo lɔ na ye nɔ la wu.
Yesu wɛ nyi lɛngbɔkplɔtɔ nywɛ la
7 Yesu mɔ lɔ ke tun mɔ: «Oxojɔxo kpatakli xɛn ko lo lɔ na mi nɔ, mɔ wɛ nyi agbo na lɛngbɔ laye. 8 Ɛmɛ zɛtɛye xeni va jɛ ŋukɔn na-a ye, fyanfinnɔ jagudaye wɛ ye nyi. Vɔ, lɛngbɔ laye ɔn ɖo oto ye. 9 Mɔ wɛ nyi agbo la, na ɛmɛ ɖe gbɔn ji ye bo do ɖyɛ e mɛ, e na kpɔn hwlɛngan. E na yi nɔ, a bo gbɔn nɔ, a bo kpɔn amakanmɛ adodwe. 10 Fyanfinnɔ, ɛfin gbe jan wɛ e nɔ tɔn, a bo tɔn ɛmɛ huhu kpodo onu hɛn gble gbe. Vɔ mɔ, ko va na ɛgbɛtɔye a do kpɔn ɛgbɛ, ɛgbɛ jɔ ɛgbɛ. 11 Mɔ, wɛ nyi lɛngbɔkplɔtɔ nywɛ la. Lɛngbɔkplɔtɔ nywɛ la nɔ sɔ ɛgbɛ etɔn sɔ na do ota na lɛngbɔ etɔnye. 12 Odanwatɔ xeni kpɔn lɛngbɔ laye ji nɔ a do yi oho, emyɔ e ɔn nyi lɛngbɔkplɔtɔ la, lɛngbɔ laye can ko nyi etɔn. Na e kpɔn ohla lo gbɔn nɔ, e nɔ si a bo jo lɛngbɔ laye do. Ohla la ba ɖyɛ ye mɛ, a bo gba lɛngbɔ laye do. 13 Odan jan wɛ e wa nɔ a bo do yi oho, lɛngbɔ laye we ɛgbɛ ɔn ɖi onu ti le ŋumɛ ni-i. 14 Mɔ wɛ nyi lɛngbɔkplɔtɔ nywɛ la. Ko nyɔ lɛngbɔ tɛyee, yee can bo nyɔ, 15 ɖi lena Didaye nyɔ-ɔ, mɔ can bo nyɔ Didaye la ɖo ha; ko nɔ sɔ ɛgbɛ tɛye do san ovɔ do ota na lɛngbɔ tɛyee. 16 Ko mɔ ɖo lɛngbɔ buye, xeye ni ɔn le okpwe xe mɛ, e mɛ laye can, ko ɖo na kplɔ ye can; ye na se ogbe tɛye, e mɛ lɛngbɔ laye ba nyi ogbɛ ɖokpo, lɛngbɔkplɔtɔ la can ba nyi ɖokpo. 17 Didaye yi owan na-a, ɖo ko sɔ ɛgbɛ tɛye sɔ na nɔ, a bo mɔ trɔ va yi-i. 18 Ɛmɛ ti ɔn yi ɛgbɛ tɛye le si ye nɔ, vɔ mɔ tete wɛ ɖo ojlo a do sɔ na. Ko ɖo ɛcɛ bo na do sɔ ɛgbɛ tɛye sɔ na, bo mɔ ɖo ɛcɛ a mɔ do trɔ yi-i. Ogbeɖiɖe xena Didaye na-a mɛ.»
19 Ogbe mɔ ma na Jwifuye, do oxo mɛ laye xena e lɔ wu. 20 Ɛmɛ susu le ye mɛ bo lɔ tun mɔ: «Gbigbɔ nylakan le e mɛ, e bɛ oha. Ɛlɛ dɔn mi do ɖo oto-e nɔ?» 21 Ɛmɛ ɖeye bo lɔ tun: «Oxo etɔnye ɔn nyi ɛmɛ xena gbigbɔ nylakan le e mɛ we oxo. Gbigbɔ nylakan ɖe na kpewu hun ŋukunsin na ŋuvanɔ doo?»
Jwifuye gbɛ Yesu
22 Vivɔ hwenu wɛ; Jwifuye bo kpli le Jeluzalɛmu, bo do ɖu azan xe ji na ye sɔ Mawu we oxwegbe la sɔ do alɔ mɛ na Mawu, we oxweb nɔ. 23 Le Mawu we oxwe la gbe, Yesu lo yi nɔ, bo gbɔn nɔ le Salomɔ we dogba ji. 24 Jwifuye bo va lɛto do-e, bo kan-ɛ se tun mɔ: «Gbɔɔn do jɛ hwe ŋukɔn nu lɛ o na jo mí do manyɔ-ɛ mɛ na? Na e nyi tun myɔ wɛ nyi Klisu la, lɔ-ɛ na mí oxojɔxotɔn!» 25 Yesu bo ɖo e wu na ye tun mɔ: «Ko o lɔ-ɛ na mi, mi ko kan do e ji. Odan xeye na ko lo wasi nɔ le Didaye we nyikɔ mɛ ye, lo ɖe kunu na-a nɔ. 26 Vɔ, mi ko kan do ji ye nɔ, ɖo mi ɔn le lɛngbɔ tɛye mɛ. 27 Lɛngbɔ tɛyee nɔ se ogbe tɛye, ko nyɔ ye, ye bo nɔ kplɔ-ɔ do. 28 Ko nɔ na ye Ɛgbɛ Mavɔmavɔ, ye ɔn crɔn nɔ gbeɖe; ɛmɛ ti ko yi ye le alɔ tɛye mɛ nɔ. 29 Didaye xeni sɔ ye sɔ na-a lac, hugan onu zɛtɛye seŋu; ɛmɛ ti ko kpewu na yi onu ɖe le alɔ etɔn mɛ. 30 Mɔ kpodo Didaye la, ɖokpo wɛ mí le.»
31 Jwifuye mɔ can ɛkpɛn ke, a do tɔ-ɛ, a bo hu-i. 32 Mi wɛ Yesu lɔ na ye tun mɔ: «Odan nywɛ-nywɛ xeye ni sɔn Didaye de ye, susu wɛ ko sɔ xlɛ mi. Ŋukɔ wu lɛ mi ka tɔ-ɔ ɛkpɛn do nɔ, a bo do hu-u?» 33 Jwifu laye bo ɖo e wu ni-i tun mɔ: «E ɔn nyi odan nywɛ xeye na o wasi ye hɛn dɔn na mí ka do tɔ ɛkpɛn we, a bo hu we nɔ, vɔ, Mawu na o zun nɔ wɛ dɔn, ɖo, myɔ xeni nyi ɛgbɛtɔ vɔvɔ, o sɔ ɖiwe do ɖo Mawu nɔ.» 34 Yesu ɖo e wu na ye tun mɔ: «Ye ɔn wlan le osɛn miatɔn mɛ tun Mawu bo lɔ tun mawuye wɛ mi nyi wɛɛ? 35 -Mí nyɔ-ɛ tun ye ɔn kpewu na tutu oxo xena Winwlan la lɔ- Mawu mɛ yɔ ɛmɛ xeye na e lɔ oxo na nɔ ye nɔ tun mawuye, 36 mi wɛ, miye, mi va lɔ nɔ, na mɔ ɛmɛ xena Otɔ la ɖe ɖo ovo, bo dɔn ɖodan ɛgbɛ la mɛ, tun mɔ bo zun Mawu, ɖo, ko lɔ tun: ko nyi Mawuvyɛ. 37 Na e nyi tun ko ɔn wasi Didaye we odanye nɔ, be mi bo ka kan do ji ye. 38 Vɔ, na ko lo wasi ye nɔ, na mi ɔn mɔ do kan do ji ye nɔ can, be mi bo kan do odan mɛ laye ji, na mi a do nyɔ-ɛ, a bo kpɔn onu jɛ e wu tun Otɔ la bo le mɔ mɛ, mɔ can bo le Otɔ la mɛ.» 39 Xena Yesu lɔ mɔsinha, ye mɔ jlo tun heye a bo wle-e, vɔ, e bo si do ye. 40 Yesu mɔ sɔn yi Judɛn we otɔ la godo, le ofi xena Jan jɛ Mawu we ɛsin lilɛ ji na ɛmɛye le saa. E bo nɔ blɛ la. 41 Ɛmɛ susu va e kɔn nɔ, bo lɔ nɔ tun: «Jan ɔn wasi ŋudandonu ti, vɔ onu zɛtɛye xena e lɔ do dahwe xe wu, oxojɔxo wɛ seŋu.» 42 Le blɛ la, ɛmɛ susu bo kan do Yesu ji.