Agbagɔ we oxwe ɖuɖu
7
1 E mɛ godo, Yesu gbɔn oto xeye ni le Galile we kansinmɛ ye nɔ, e ko jlo na gbɔn oto xeye ni le Yude kansinmɛ ye, ɖo Jwifuye we ogaye, jlo na hu-i. 2 Vɔ, Jwifuye we oxwe xena ye nɔ ɖu le agbagɔ wɛ lo tɛkpɔ nɔ. 3 Nɔvyɛ kpɛ ŋusungloye bo lɔ ni-i tun mɔ: «Lɛ le bwɛ, a bo yi Yude, na onukplanvi tɔweye can a do kpɔn odan xeye na o wasi nɔ ye. 4 Ɖo, ɛmɛ ɖekpekpe xeni jlo tun ye a nyɔ he, e ɔn nɔ wa onu do bibɛmɛ. Xena o wasi onu mɛ ye nɔ, bo ɖe ɖiwe sɔ xlɛ ɛgbɛ la!» 5 Ɖo, nɔvyɛye ŋutɔ can ɔn kan do e ji. 6 Yesu bo ɖo e wu na ye tun mɔ: «Ogan tɛye ɔn xo hɔnɖyo. Miye, ogan ɖekpekpe mɛ wɛ nyɔ na mi. 7 Ɛgbɛtɔye ɔn kpewu na gbɛ owan na mi, vɔ mɔ, ye gbɛ owan na-a, ɖo, ko ɖe kunu nɔ tun onuwiwa yetɔnye bo nyla. 8 Miye, mi yi oxwe la ɖu gbe. Vɔ, mɔ ko ɔn yi nɔa, ɖo ogan tɛye ɔn xo hɔnɖyo.» 9 Xena e lɔ mɔsinha vɔ, e ci Galile we kansin la mɛ.10 Xena nɔvyɛ laye yi oxwe la ɖu gbe, Yesu ŋutɔ can bɛ, bo yi oxwe la ɖu gbe, ɛmɛ ti ko kpɔn-ɛ. 11 Mi wɛ Jwifuye we otogaye kan-ɛ nɔ le oxwe la ɖuɖu hwenu, bo kan se nɔ tun: «Bɔ lɛ e le?» 12 Ɛmɛ susu laye bo lɔ oxo etɔn nɔ taŋu. Ɛmɛ ɖeye lɔ tun: «Ɛmɛ nywɛ wɛ e nyi.» Ɛmɛ buye bo lɔ tun: «O o! E blɛ ɛmɛye ɖu nɔ wɛ!» 13 Vɔ, ɛmɛ ti ɔn kɔ ogbe yi oji, bo do lɔ oxo do e wu nɔ, ɖo ye vɔ Jwifuye we otogaye nɔ.
14 Xena ye ɖu oxwe la nɔ gbɔɔn bo jɛ mamɛ na azan laye, Yesu yi Mawu we oxwegbe, bo jɛ onu kpinkplan ɛmɛye ji. 15 E kpaca do Jwifuye we otogaye, ye bo lɔ tun mɔ: «E ɔn yi okplan le osɛnkplan-ɛmɛtɔ ɖe kɔn kpɔn, naɖe lɛ e wa bo do nyɔ Winwlan laye ɖo mɔsinha?» 16 Yesu bo ɖo e wu na ye tun mɔ: «Okplan tɛye ɔn sɔn ji ye, vɔ, ɛmɛ xeni ɖo-o ɖodan kɔn wɛ e sɔn. 17 Na e nyi tun onukpinkplan tɛye Mawu de wɛ e sɔn, alo, mɔ ŋutɔ we ɛcɛ mɛ wɛ ko lɔ oxo le nɔ, ɛmɛ xeni jlo na wasi Mawu we ojlonu, na nyɔ-ɛ. 18 Ɛmɛ xeni lɔ oxo le emyɔ ŋutɔ we ɛcɛ mɛ nɔ, lo kan emyɔ ŋutɔ we kanfu nɔ, vɔ, ɛmɛ xeni wa odan nɔ a do kanfu ɛmɛ xeni ɖo-e ɖodan, e lɔ oxojɔxo nɔ, oxo etɔn ti ko nɔ nyi awo. 19 Mɔyizi na mi osɛn alo? Vɔ, ɛmɛ ti ko le mia mɛ, bo zɔn do osɛn la ji nɔ. Ɛlɛ dɔn mi lo kan ka hu-u nɔ?» 20 Ɛmɛ susu laye bo ɖo e wu ni-i tun mɔ: «Gbigbɔ nylakan wɛ le myɔ mɛ! Onu lɛ kan ka hu we nɔ?» 21 Yesu ɖo e wu na ye tun mɔ: «Odan ɖokpo jan wɛ ko wasi, e bo o lo kpaca do mi nɔ ɖo mɔsinha. 22 Mɔyizi hɛn adagbigbo we osɛn do va. E ko nyi Mɔyizi la ji hɛn e bɛ sɔn, dagbo-dagbo míatɔnye ji wɛ. Gbɔjwɛzangbe can, mi bo nɔ gbo ada na ɛmɛ. 23 Mi nɔ gbo ada na ɛmɛ le gbɔjwɛzangbe, mi ko mɔ do da le Mɔyizi we osɛn la ji nɔ, ɛlɛ dɔn mi do do aɖi nɔ, do mɔ xeni gɔ adɔn na ɛgbɛtɔ la blebu le gbɔjwɛzan gbe? 24 Mi ká mɔ kpɔn ŋumɛ na ɛmɛ a do ɖo kojo, vɔ mi ɖo kojo do osɛn nu.»
Ɛmɛye lo kan se nɔ tun Yesu wɛ nyi Klisu la jaa
25 Jeluzalɛmutɔ ɖeye bo kan se nɔ tun mɔ: «Ɛmɛ xena ye kan nɔ na hu la hɛn nyi e mɛ wɛɛ? 26 Mi kpɔn, mi mɛ lo lɔ oxo nɔ le agbaŋugba, vɔ ye ko lɔ oxo ti ni-i nɔ! Alo oga míatɔnye va kpɔn onu jɛ e wu oxojɔxo tun emyɔ bɛ bo nyi Klisu la wɛɛ? 27 Ɛmɛ xe, mí nyɔ ofi xena e sɔn, ganke, hwexenu na Klisu la na va, ɛmɛ ti ɔn nyɔ ofi xena e sɔn nɔ.»
28 Hwexenu na Yesu lo kplan onu la ɛmɛye nɔ le Mawu we oxwe la gbe, e do axwa bo lɔ tun mɔ: «Be mi nyɔ ɛmɛ xena ko nyi, bo nyɔ ofi xena ko sɔn? Ganke, mɔ ŋutɔ we ɛcɛ mɛ hɛn ko va le, vɔ, ɛmɛ xeni ɖo-o ɖodan, oxojɔxototɔ wɛ e nyi, emyɔ, miye mi ɔn nyɔ-ɛ. 29 Mɔ, ko nyɔ-ɛ, ɖo e kɔn wɛ ko sɔn, emyɔ la bɛ ɖo-o ɖodan.» 30 Mi wɛ ye kan nɔ na wle-e, vɔ ɛmɛ ti we alɔ ɔn jɛ e wu, ɖo, ogan etɔn ɔn xo hɔnɖyo. 31 Le ɛmɛ laye mɛ, ɛmɛ susu kan do e ji. Ye bo lɔ nɔ tun mɔ: «Na Klisu la va va ɖe, e na wasi ŋudandonuye hugan xena ɛmɛ xe lo wasi nɔ ye wɛɛ?»
Ovɔsantɔye sɔ Mawu we oxwe la cɔtɔye ɖodan na ye a do va yi wle Yesu
32 Falizitɔ ɖeye se oxo xena ɛmɛ susu laye lo lɔ do odo nɔ, do Yesu la wu. Mi wɛ Ovɔsantɔ ɖaxoye kpodo Falizitɔ laye, ɖo Mawu we oxwe la cɔtɔye ɖodan, na ye a do va yi wle-e. 33 Yesu bo lɔ na ye tun mɔ: «Ko kpɔtɔ le mia kɔn na azan ovii ɖe, e mɛ godo, ko na sɔn yi ɛmɛ xeni ɖo-o ɖodan kɔn. 34 Mi na va kan-a, mi ko kpɔn-ɔ nɔ, ɖo, ofi xena mɔ ko na le la, miye, mi ɔn kpewu na va ofi la.» 35 Jwifuye we otogaye bo jɛ lilɔ ji le yenɔniɔye mɛ tun mɔ: «Bɔ lɛ e na yi gbɔɔn mí ko do kpɔn-ɛ nɔ? Jwifu xeye ni gbakpe gbɔn ɛmɛ xeye ni ɔn nyi Jwifuye mɛ, kɔn wɛ e ka va yi ci nɔ, a bo do kplan onu ɛmɛ xeye ni ɔn nyi Jwifuye? 36 Oxo xeni lɔ bo do lɔ tun: “Mi na kan-a, vɔ, mi ko kpɔn-ɔ nɔ, ɖo, mi ɔn kpewu na va ofi xena ko na le la” we gɔnmɛ ɖe?»
Yesu lɔ oxo do otɔsisa xeni nɔ na ɛgbɛ ɛmɛ wu
37 Le gbegbe xena oxwe ɖuɖu la na vɔ, xeni mɔ nyi azan kpatakli ɖe, Yesu nɔ ote, bo do axwa tun mɔ: «Na kɔmyɔ ci ɛmɛ ɖe nɔ, ni va kɔn ye, a bo nu ɛsin. 38 Ɖi lena Winwlan la lɔ ɖo ha, ɛmɛ xeni kan do ji ye, otɔsisa xeye ni nɔ na ɛgbɛ ɛmɛ, na tɔn sɔn e mɛ.» 39 Gbigbɔ Kinkwɛn xena ɛmɛ xeye ni na kan do e ji ye na va yi, we oxo wɛ e lo lɔ nɔ. Le hwe mɛ la nu, Mawu ɔn na Gbigbɔ Kinkwɛn la hɔnɖyo, ɖo, Mawu ɔn do gigo Yesu wu hɔnɖyo.
Otogun la ma do Yesu wu
40 Xena ye se oxo mɛ la vɔ, ɛmɛ ɖeye le ɛmɛ laye mɛ, bo lɔ tun mɔ: «Dahwe xe, oxolɔɖonyitɔ xena mí tre kpɔn nɔ la wɛ oxojɔxo!» 41 Ɖeye bo lɔ tun: «Mi wɛ nyi Klisu la!» Vɔ ɛmɛ buye bo lɔ nɔ tun: «Galile wɛ Klisu la ɖo na sɔn? 42 Winwlan la ɔn lɔ tun Klisu la, Davidi we okunkan mɛ bɛ e bo na tɔn sɔn, a bo sɔn Bɛtɛlɛxɛmu, otota xe mɛ na Davidi sɔn wɛɛ?» 43 E mɛ la hɛn mima va ɛmɛ laye mɛ do Yesu wu. 44 Ɛmɛ ɖeye le ye mɛ, bo jlo na wle-e, vɔ, ɛmɛ ti ɔn ɖo alɔ e wu.
45 Mi wɛ, Mawu we oxwe la cɔtɔye trɔ okɔ va ovɔsantɔ ɖaxo laye kpodo Falizitɔ laye kɔn. Ye bo lɔ na ye tun mɔ: «Ɛlɛ dɔn na mi ɔn do hɛn-ɛ do va?» 46 Oxwe la cɔtɔye bo ɖo e wu tun mɔ: «Ɛmɛ ti ɔn lɔ oxo kpɔn ɖi ɛmɛ mɛ la ha.» 47 Falizitɔ laye bo mɔ kan ye se ke tun mɔ: «Be miye can mi jo miaɖe do, e bo blɛ mi ɖu wɛɛ? 48 Mi kpɔn oga miatɔn ɖe, alo Falizitɔ ɖe xeni kan do e ji wɛɛ? 49 Vɔ, ɛmɛ susu xeye ni kan do e ji ye, ye ko nyɔ Osɛn la ye, nudonɔye wɛ ye nyi.»
50 Nikodɛmu xeni va yi kpɔn Yesu saa, nyi ɛmɛ ɖokpo le ye mɛ. E lɔ na ye tun mɔ: 51 «Osɛn míatɔn ɔn nɔ do ɛhwɛ na ɛmɛ ɖe, na ye ɔn kan oxo ɛmɛ la se, bo nyɔ onu xeni wasi keŋu gbɔxwe.» 52 Ye bo ɖo e wu ni-i tun mɔ: «Galile wɛ myɔ can o sɔn? Gbeje Winwlan la kpɔn nywɛɖe, o na kpɔn tun oxolɔɖonyitɔ ɖe ɔn nɔ tɔn sɔn Galile we kansinmɛ.»
53 [E mɛ godo, ye ɛmɛ zɛtɛye bo trɔ sɔn yi oxwe yetɔnye gbe.