Ɛwɛn Nywɛ Yesutɔn xena
Lwiki
Wlan
Lwiki ɖe oxota na wema etɔn
1
1 Ɛmɛ susu wasi tito a do wlan onu xeye ni jɔ le mía do mɛ. 2 Ye bo wlan ye pɛpɛpɛ, ɖi lena ɛmɛ xeye ni kpɔn onu xeni jɔ laye kpo ŋukunsin kpo sɔn dojɛ gbɔɔn, bo va trɔ zun Mawu we oxo la jlatɔye, xo gbexo etɔn na mí ɖo ha. 3 Ɛmɛjɔmɛ Tewofili, mɔ can, ko kan odo se ganji na onu xeni jɔ laye sɔn dojɛ gbɔɔn, ko bo sɔ ogbeta a do wlan onu xeye ni jɔ laye na we ɖe kplɔ ɖe do. 4 Ko lo wasi-i nɔ, na do nyɔ-ɛ tun onukpinkplan xeye na o yi laye, oxojɔxo kpatakli bɛ ye bo nyi.Mawu we ɛwɛndotɔ Gabliyɛli va do ɛwɛn na Zakali
5 Hwexenu na Elodu ɖu xɔlu le Yudea we oto mɛ, ovɔsantɔ Mawutɔn ɖe le, ye bo nɔ yɔ-ɛ tun Zakali. E bo tɔn sɔn ovɔsantɔ Mawutɔn saatɔn Abya we ogbɛta mɛ. Zakali la we osyɛ xena ye nɔ yɔ tun Elizabɛti, bo tɔn sɔn Arɔn we akɔta mɛ. 6 Zakali la kpo osyɛ kpo bo nyi ɛmɛ jijwɛ le ŋumɛ na Mawu, ye bo nɔ zɔn do Xwetɔ la we Osɛn kpo ogbeɖiɖe zɛtɛye ji ɖi lena e jɛ ɖo ha. 7 Vɔ, ye ɔn ɖo ovi ti, ɖo ajikponɔ wɛ nyi Elizabɛti, ye ɛmɛ owe laye bo o ku nyɔxo.
8 Gbeɖokpo, Zakali bo lo wa odan etɔn nɔ le Mawu we oxwegbe ɖo ogbɛta etɔn we azan wɛ va. 9 Ye bo wasi ovoɖiɖe bo do can Zakali ɖi lena ovɔsantɔ Mawutɔnye nɔ wasi ɖo saa ha, e bo na do ɖyɛ tɛnxo kinkwɛn le Mawu we oxwegbe a do va yi do zruya ozo. 10 Hwexenu na ye nɔ mɛ zruya nɔ, Mawu we otogun la zɛtɛye nɔ le gaji, a bo xo ɛɖɛ nɔ. 11 Mi wɛ Xwetɔ la we ɛwɛndotɔ ɖokpo ze do ŋumɛ na Zakali, bo le ote le ovɔsinsan we agba xe ji na ye nɔ mɛ zruya le la we aɖusi mɛ. 12 Xena Zakali kpɔn-ɛ, e flu le eɖe mɛ, vivɔ bo jɛ e ji. 13 Vɔ ɛwɛndotɔ Mawutɔn la bo lɔ ni-i tun mɔ: «Zakali, ká mɔ vɔ, ɖo Mawu se ɛɖɛ tɔwe. Siwe Elizabɛti na ji ovi ŋusunglo ɖokpo na we, o bo na ɖo nyikɔ ni-i tun Jan. 14 Nyɔna kpo jijwɛ kpo wɛ ovi la na nyi na we. Hwexenu na ye na ji-i, ɛmɛ susuye can bo na kpɔn jijwɛ do e wu. 15 Ɖo, Xwetɔ la we odansɔvi ɖaxo ɖe wɛ e na nyi. E ɔn nu vɛn nɔ, e ko nu ahan sinsyɛnxu ti nɔ. Sɔn onɔ we dɔmɛ gbɔɔn wɛ e na gɔ kpo Gbigbɔ Kinkwɛn le. 16 E na trɔ okɔ na Izrayɛli vikpɛye susu va Xwetɔ Mawu yetɔn kɔn. 17 E na jɛ ŋukɔn na Xwetɔ la kpodo hɔnhlɔn kpo Gbigbɔ Mawutɔn xeni zan oxolɔɖonyitɔ Eli le saa ha. Ovi tɔwe la na zan hɔnhlɔn la kpo gbigbɔ la, a do dɔn ovitɔye we ayixa va vikpɛ yetɔnye kɔn. E bo na dɔn na otonumasetɔye na ɖo ɛmɛ jijwɛye we onunyinywɛ. E bo na jla otogun Mawutɔn ɖo onyi na Xwetɔ la.» 18 Zakali bo lɔ na ɛwɛndotɔ Mawutɔn la tun mɔ: «Naɖe lɛ ko na wa a do nyɔ-ɛ tun oxojɔxo bɛ e bo nyi? Ɖo mɔ kpodo siye kpo, mí o ku nyɔxo.» 19 Ɛwɛndotɔ Mawutɔn la bo ɖo e wu ni-i tun mɔ: «Ko nɔ nyi Gabliyɛli, ko bo nɔ nɔ ote le Mawu we ŋukɔn, Mawu ɖo-o ɖodan a do lɔ oxo na we, a bo do do Ɛwɛn Nywɛ xe la na we. 20 Vɔ, o ɔn kan do oxo xena ko lɔ na we ji. Mi wɛ dɔn, ɛɖɛ tɔwe na tɛ, o ɔn mɔ kpewu na lɔ oxo, gbɔɔn do yi hwexenu na onu xeye na va jɔ. Oxo xena ko lɔ laye, ye na va jɔ le Mawu we ganmɛ.» 21 Le hwemɛnu, otogun la bo lo tre kpɔn Zakali nɔ. Lena tintɔn etɔn dɛn ɖo nɔ le tɛnxo kinkwɛn la, bo kpaca ɛmɛye nɔ. 22 Hwexenu na e tɔn, e ɔn mɔ kpewu lɔ oxo na ye nɔ, ɛɖɛ bo tɛ ni-i, e bo wasi alɔ na ye, ɛmɛye bo se e gɔnmɛ tun e bo kpɔn onu ɖexlɛ ɖe le tɛnxo kinkwɛn la. 23 Xena odanwiwa etɔn we ganmɛ va yi vɔ, Zakali sɔn yi oxwe etɔn gbe. 24 E mɛ godo, osyɛ Elizabɛti bo yi gomi. Le sunzan atun gblamɛ, Elizabɛti nɔ sɔ eɖe sɔ hwla, a bo lɔ nɔ tun mɔ: 25 «Onu xena Xwetɔ la wasi na-a mɛ, e kpɔn dɔŋuɖunu na-a fifi, bo ɖe onu xeni do ŋunya-a nɔ tɛ le ŋumɛ na ɛmɛ zɛtɛye.»
Mawu we ɛwɛndotɔ Gabliyɛli, va do ɛwɛn na Malya tun e bo na ji Yesu
26 Hwexenu na Elizabɛti we gomi lo ɖo sunzan ɛdɛn nɔ, Mawu lɔ na ɛwɛndotɔ etɔn Gabliyɛli, tun ni boo yi Nazalɛti we otota mɛ, le Galile we kansinmɛ. 27 Ɛwɛndotɔ mɛ la bo va yi nyɔnuvi xeni le alɔ ji ɖokpo kɔn, ye bo nɔ yɔ-ɛ tun Malya. Hwanjavi ɖe, xena ye nɔ yɔ tun Jozɛfu, xeni tɔn sɔn Davidi we okunkan mɛ, bo sɔ agɔb Malya la. 28 Xena ɛwɛndotɔ la va ofi xena Malya le la, e lɔ ni-i tun mɔ: «Nɔ jijwɛ mɛ, Xwetɔ la le kpo we, myɔ xeni kpɔn dɔmɛnywɛ etɔn.» 29 Xena Malya se mɔsinha, e flu le eɖe mɛ, e bo jɛ ota mɛ bubu ji tun mɔ: «Ɛlɛ jɔ e do lɔ mɔsinha na-a la?» 30 Ɛwɛndotɔ Mawutɔn la bo lɔ ni-i tun mɔ: «Malya, ká mɔ vɔ, ɖo Mawu ɖe dɔmɛnywɛ etɔn sɔ xlɛ we. 31 O na yi gomi, o bo na ji ovi ŋusunglo ɖokpo, o bo na ɖo nyikɔ ni-i tun Yesu. 32 Ɛmɛ ɖaxo wɛ e na va nyi, Mawu Ɖaxo bo na yɔ-ɛ tun mɔ: “Ovi tɛye.” Mawu Xwetɔ la na ni-i xɔlu we ɛcɛ ɖi lena e na dagbwa Davidi ɖo saa ha. 33 Mi wɛ dɔn, ovi la na ɖu xɔlu gbɔɔn do yi mavɔmavɔ mɛ le Izrayɛli we otogun mɛ, ogaɖuɖu etɔn ko vɔ nɔ gbeɖe.» 34 Malya bo kan-ɛ se tun mɔ: «Naɖe lɛ ko na wa, a do yi gomi, mɔ xeni le alɔ ji?» 35 Ɛwɛndotɔ Mawutɔn la bo mɔ ɖo e wu ni-i tun mɔ: «Gbigbɔ Kinkwɛn na jɛ ote do ji we, Mawu Ɖaxo we hɔnhlɔn bo na cɔn we, a bo le kpo we. Mi wɛ dɔn ɛmɛ kinkwɛn wɛ na nyi ovi xena o na ji la, Mawu bo na yɔ-ɛ tun mɔ: “Ovi tɛye.” 36 Elizabɛti can, xeni tɔn sɔn xwedo tɔwe mɛ, e le gomi sɔn sunzan ɛdɛn xɛn, emyɔ xeni o ku nyɔxo, ye bo nɔ yɔ-ɛ tun ajikponɔ. 37 Ɖo, onu ti ɔn glo wiwa na Mawu.» 38 Malya bo lɔ tun mɔ: «Xwetɔ la we odanwavi wɛ ko nyi, Mawu ni wasi na-a ɖi lena o lɔ ɖo ha.» E mɛ godo, ɛwɛndotɔ Mawutɔn la bo lɛ le e kɔn.
Malya va yi kan Elizabɛti kpɔn
39 E mɛ godo, Malya fya do yi toxo ɖe mɛ. Toxo mɛ la bo le Yude we kansinmɛ, le ofi xena okpóye le. 40 E bo ɖyɛ Zakali we oxwegbe, bo do ogbe na Elizabɛti. 41 Xena Elizabɛti se Malya we ogbedido, ovi la hunhun le dɔmɛ ni-i. Elizabɛti bo gɔ kpo Gbigbɔ Kinkwɛn. 42 E bo do axwa bo tun mɔ: «Mawu do na we hugan nyɔnu zɛtɛye, e bo do na ovi xeni le dɔmɛ na we la can! 43 Onu lɛ ko nyi na Xwetɔ tɛye we onɔ na do va kɔn ye? 44 Ɖo hwexenu na ko se ogbedido tɔwe, ovi la hunhun kpo jijwɛ kpo le dɔmɛ na-a. 45 Onu nyɔ na we ɖo o kan do e ji tun Xwetɔ la bo na wasi onu xena e lɔ na we!»
Malya ji kanfu we ohan na Mawu
46 Mi wɛ Malya lɔ tun mɔ:
«Okla tɛye lo kanfu Mawu nɔ,
47 Oji tɛye bo le jijwɛ mɛ do Mawu hwlɛngantɔ tɛye wu,
48 Ɖo, mɔ odansɔvi xeni ɔn nyi onu ti, ji wɛ Mawu kɔ ŋukunsin etɔn do. Mi wɛ dɔn, bɛ sɔn fifi gbɔɔn do yi, ɛmɛye na nɔ lɔ tun mɔ bo kpɔn nyɔna.
49 Ɖo, Mawu hɔnhlɔn zɛtɛyetɔ wasi onu ɖaxo-ɖaxoye na-a.
Kinkwɛn wɛ nyi nyikɔ etɔn.
50 Dɔŋuɖunu kpinkpɔn etɔn nɔ le tɛgbɛ, na ɛmɛ xeye ni nɔ ɖo sisi ni-i ye.
51 E ɖe hɔnhlɔn etɔn sɔ xlɛ.
Ɛmɛ xeye na oji yetɔnye gɔ kpo gonyi, e bo gba ye do.
52 E nɔ ɖe okpo le agɔ na xɔluye,
A bo kɔ ɛmɛ xeye ni nɔ hwe yeɖeye do yi oji.
53 Mawu nɔ na onunywɛ susu ɛmɛ xeye ni le xovɛ ye,
A bo nya ohotɔye asigba-alɔgba.
54 E va gɔ alɔ na odansɔvi etɔn xeni nyi Izrayɛli we otogun.
Mawu ɔn wɔn dɔŋuɖunu kpinkpɔn etɔn,
55 Ɖi lena e lɔ ɖo na mía dagbwaye ha,
Bo lɔ na Ablaxamu kpodo jijimɛvi etɔnye gbɔɔn do yi mavɔ mɛ.»
56 Malya bo nɔ Elizabɛti kɔn na sunzan atɔn ha, e mɛ godo e bo trɔ sɔn yi oxwe etɔn gbe.
Elizabɛti ji Jan
57 Ovijiji we ganmɛ su na Elizabɛti, e bo ji ovi ŋusunglo ɖokpo. 58 Ɛmɛ xeye ni le oxwekpa ni-i ye kpodo xwedo etɔn we ɛmɛye, bo kpɔn tun Xwetɔ la bo kpɔn dɔŋuɖunu ni-i diin, ye bo kpɔn jijwɛ kpo-e nɔ. 59 Xena ovi la ɖo onyihinhɔn atrotɔn, ye va, a do gbo ada ni-i, ye bo jlo na ɖo otɔ we nyikɔ ni-i tun Zakali. 60 Vɔ onɔ bo gbɛ, bo lɔ tun mɔ: «Nyikɔ etɔn na nyi Jan». 61 Ye bo lɔ ni-i tun mɔ: «Ɛmɛ ti ɔn le xwedo tɔwe mɛ bo ɖo nyikɔ mɛ ha!» 62 Ye bo wasi alɔ na Zakali, bo do kan-ɛ se tun mɔ: «Naɖe o jlo na yɔ-ɛ tun?» 63 Zakali bo byɔ tɛkpo ɖokpo xe ji na ye nɔ wlan onu do, e bo wlan tun mɔ: «Jan wɛ na nyi nyikɔ etɔn.» E bo kpaca ɛmɛ zɛtɛye seŋu. 64 Zɔnɖokpo kpoŋu, onu bo hun na Zakali la, e bo lɔ oxo nɔ, bo kanfu Mawu nɔ. 65 Ɛmɛ xeye ni nɔ nɔ oxwekpa ni-i ye bo vɔ. Le Yude we okpóye we kansinmɛ zɛtɛye, ɛmɛye bo lo lɔ onu xeni jɔ laye nɔ. 66 Ɛmɛ xeye ni se onu xeni jɔ laye, bo nɔ bu ota mɛ do onu laye wu nɔ. Ye bo nɔ lɔ nɔ tun mɔ: «Ɛlɛ ovi xe la na va nyi?» Le oxojɔxo mɛ, Xwetɔ la we hɔnhlɔn le kpo-e.
Zakali ji ohan bo do kanfu Mawu
67 Zakali, ovitɔ la, gɔ kpo Gbigbɔ Kinkwɛn, e bo lɔ oxo ɖo onyi tun mɔ:
68 «Mi kanfu Xwetɔ la, Izrayɛli we Mawu. E va gɔ alɔ na otogun etɔn, e bo tun okan ni-i.
69 E na mí hwlɛngantɔ sinsyɛnxu ɖokpo le Davidi xeni nyi odansɔvi etɔn we okunkan mɛ.
70 Oxo mɛ la wɛ Mawu o lɔ saa dogbɔn oxolɔɖonyitɔ kinkwɛn etɔnye we onu mɛ. E bo do lɔ tun mɔ:
71 “Ko na hwlɛn mi gan le kɛntɔ miatɔnye si, a bo yi mi le alɔ mɛ na ɛmɛ xeye ni gbɛ owan na miye.”
72 Mawu kpɔn dɔŋuɖunu na mía dagbwaye, e bo flin okancica kinkwɛn etɔn.
73 Ajɔgbe mɛ la wɛ e fyan na mía dagbwa Ablaxamu. E bo lɔ ni-i tun mɔ:
74 “Ko na hwlɛn vikpɛ tɔweye gan le kɛntɔ yetɔnye we alɔ mɛ, ye bo na do wasi sinsɛn na-a, vivɔ ma nɔ e mɛ.
75 Ye bo na nyi ɛmɛ kinkwɛn, a bo nyi ɛmɛ jijwɛ le ŋukɔn na-a tɛgbɛ-tɛgbɛ.”»
76 Zakali bo mɔ lɔ tun mɔ: «Myɔ ovi tɛye, ye na yɔ we tun Mawu Ɖaxo we oxolɔɖonyitɔ. O na zɔn le ŋukɔn na Xwetɔ la, a do jla omɔ etɔn ji ɖo.
77 O na wasi na otogun etɔn ba do nyɔ-ɛ tun e bo gbɔn nɔ a do va hwlɛn-ɛ gan dogbɔn onu nyanyla etɔnye sisɔkɛ mɛ.
78 Mawu míatɔn gɔ kpo dɔŋuɖunu kpinkpɔn kpodo dɔmɛnywɛ. E tɛ kinklɛn ɖokpo do mía ji sɔn jigbe ɖi lena ohwe we kinklɛn nɔ tɛ ɖo ha.
79 Kinklɛn mɛ la na tɛ do ɛmɛ xeye ni le vuvlu mɛ bo lo vɔ na oku nɔ ye ji, e bo na jɔ omɔ na afɔ míatɔnye gbɔn fifa we omɔ ji.»
Ovifɛ Jan la lo hwɛn nɔ
80 Jan la bo lo hwɛn nɔ le agbaza mɛ kpodo gbigbɔ mɛ. E bo va yi ci gbefaji gbɔɔn do va yi gbexegbe na e va ɖe eɖe sɔ xlɛ Izrayɛli we otogun.