Dadaba Zuga Kèkko 28

Lɔga Bhauloso Erresɛnɛa Malita

1 Na agge hunaa kerreyo yirisiyɔ tandɔ shɛɛye, katakto hunde dha ngabaya lukkɛ ꞉maye keli Malitaye. 2 Na abhanyisey ꞉zuga Malita shɛɛ. Na ngɔrtagiy chɔɔ go ke ngaya bere guyɔ dhagɛ na ba anɛ laleniye. 3 Na ko nɔng Bhaulos muga chakarta gena na kojjɛsɛ go. Na nɔng dhaa toye lɔ kono. Na hunaa senno kojjɛsɛ goye, kono idhdhau ꞉talangɔ na bhona chakarta toye na ussu Bhaulos siyɔ na ngani ngaoddonoo. 4 Na zuga Malita hunaa orrɛa kono hunde ɔlɔrranɛ siya nɛnɛye, se, “Dha ngahirra a hira kɔdhdha zugo chi. Nɔng chɔɔ hunde a nganda wa bawa huroya yirisinyde, tumua na kedhdho lɔgɔ nɔng dha ngani hinɛsɛn rɛsɛ chi.” 5 Na nɔng Bhaulos tibarɛsɛ kono go na tɛu dhɛɛ hung na ngani ngailagasso. 6 Na zugo yɔk se, “Ga na argitɔ! Rɛ kuusono mɛarrɛ oo uy ba na rɛ mɛarrɛ.” Na hunaa bhɛkkɛa na tɛwa hungge, yɔk se, “Yee! Ngahirra dha a tumu kona ni!”

7 Nɔng dha gulsaa ngabaonu lukkɛ ꞉maye keli Bholiyon. Na baa nɛnɛ bhakka i yirisiyɔ tugɔ jaa ngonu. Na lamaiy agge na abhanyisey ungo sizzi doraa nɛnɛ shɛɛ. 8 Nɔng dha bere baba nɛnɛ ilaga na rɛ awuren goore na hɛrɛt na ungu bay. Na Bhaulos tunnugu dori na gɔnyu. Na ogolɛsɛ Tumu na tadhɛ siyɔ na bau. 9 Na nɔng hunaa messo ngangaye, zuga ilagassɛa bhakkɛa ngabaonu kumulɔng hoya na kìbaysiyo. 10 Na zugo ayiy diram na keteyo kɔmɔna gɛ bo bibiyo. Na hunaa kenno kàyto gonggulɔye, hoyɛy ahaa kihinno kumulɔng na chɔtɛsɛ gonggula nayo toye.

Lɔga Dogɛa ꞉Bhaulosi Rome

11 Na ngonu bere lɔma gonggula ɔra kènno Iskindiriya. Na bhɛa ku sabba lɔ kɛnde ku ramman kɛkɛdhɛsɛn mumiya tumoa gɛ ku shɔa kèleo Kastɛr ko Bholu. Na ngagongguldonu chilu Malitagiye asanday dhɔng. Na agge hunaa kɛtɛldo ngonu taginya sizzi na tewa ushaye, kabandao ngagongguldonu na kayto. 12 Na koo hunaa kodokko ɔra kèe Sirakuye, kɛtɛldo ungo sizzi ngonu. 13 Na kabandao gonggulɔ sɛgɛn na kadakto ɔrre kèe Regim. Na bhorroyɔ ngɔyɔ bana gɔra Sirakuny na ɛbbɛgiy na tɔgiy na bhorre kadakto Butilos. 14 Na kitinynyandɛo ko zuga yɛbhbhɛa kamannaa Yesusi ngonu na lambaiyɔ. Na ungo issabbay kɛtɛldo ko yɔk kari. Na hunaa kɛtɛldo ngonu na tewa ushaye, kayto Romegiye. 15 Na zuga Rome yɛbhbhɛa kamannaa Yesusi gen dha bere shikkɛ hunde kɛllo gɔrɔye, na mɔtaiy ɔrre kèe “Gawua Abiyosi” ko ɔrre kèe “Doriyoa Amissɛny Ku Sizzi.” Na hunaa Bhaulos orro yɔkte, eterrisanu Tumu na hini tɛa bay. 16 Na hunaa koo kodokko Romeye, Bhaulos kàyɛ doraa bhakka bhiy na kɛbhbhɛk ꞉bholisiyɔ.

Lɔga Kɛ̀bhɛgɛa Bhaulos Na Madhɛa Zuga Rome

17 Na hunaa ungo tewa sizziye, Bhaulos eliu zuga Ayhudhi bibiyo. Na muktiyaa na sɛɛsɛ, “Gochonginyaye, anye kera zuga ga ko na babachina ga ngani kɛ̀ddɛo dhul. Na hunaa anna ngangaye, yɔk chɛbtany Yerusalemɔ na ayany zuga Rome. 18 Na chɔɔ bɔɔ marakanyɛa ꞉zuga Rome na senno kɔktaganydɔ ke ngaya lɔkte katiyɛany rɛsɛyɔ ninggɛye. 19 Na zuga Ayhudhi hunaa marrɛa lɔga kènno kɔktagɛanyde, anye katamarra na kesewa, ‘Lɔga ganyu maya shik ꞉Komoruya Rome bo.’ Na nɔng anye bhee kowogɛsɛn zuga ganyu na kichilɛ ninggɛ. 20 Na mɛa a nganda keliyɛung na kɛ̀tɛldi kari na kòyogogung ngalɔktaye. Anye lɔkte kichibbɛany ngagɔrgɔriyaye a ngaya kɛyɛbhɛ ngalɔkta bere kajjɛ zuga Isirayeli na ibhɛsɛnɛ hinisiye.”

21 Na yɔk zuga Ayhudhi bibiyo seyɛsɛ, “Agge dadabte kɔ̀gɔdhagɛiy lɔga gunyu na kittonnogiy Yudhagiye ninggɛ. Chɔɔ zukte hony ngonu na yokkogiyɛ lɔkte gunyu gɛrsi ninggɛ. 22 Agge nɔng kenno kìshikto lɔkte guny yɛbhiye, ke ngaya zuga bhakkɛa ba kumulɔng marɛ na senɛ anɛ kullɛye.”

23 Na hunaa bhiiktɛsɛa ungo na tewa ushaye, tɛldi na hoya doraa nɛnɛ ke mɛri. Na nɔng kali bhɛa bo tii ko bhee anɛ jhayny dhugunɛsɛ lɔga Tumu bhɛa Tumu lɔmɛa zugo. Na kɔbhɛsɛ kera bere kɔdhɛsɛna ꞉Muse ko lɔga bere kɔdhɛsɛnɛa ꞉zuga yogɛsɛnɛa zugo lɔga yokkono ꞉Tumu dadabinya na kɔbhɛsɛ bhɛa madhdhagiyɛa lɔga Yesusi na ko yɔk kɛyɛbhɛtɔ. 24 Na zug gena yɛbhɛ lɔgaa kɔbhɛsɛna na yɔk gen tamarayɛ. 25 Na nɔng Bhaulos hunaa madhɛsɛna lɔgɔye, yɔk kɛngɔ ngani ngashiginɛo na se kegendɛyɔ. Na hunaa ngani kegendayoye, Bhaulos madhɛsɛ zugo lɔgɔ sɛgɛn na sɛɛsɛ, “Lɔga bere yokkono ꞉Kuloya Tumu na yogɛsɛna hira yogɛsɛna zugo lɔga yokkono ꞉Tumu kèe Isayas na ko nɔng yogɛsɛna kokonginyaa gu, dha bere a dhere. Na ngalɔktonu agga bere sennɛa,

26 “ ‘Ok na sɛɛsɛ ngazukta ɛnɛnggeo,

“Igge kali kali shikko lɔga ganyu na ngaungusɛɛnoo,

Na chɔɔ lɔga kemesi ꞉anynyo orro kali kali, na ngakadhdhanoo.”

27 Yɔk ngazukta messɛ ke ngaya sabbiya gɛ anɛ dhitinɛ

na nyabhaa gɛ bho ngashikkɛo

na kawara gɛ bho ngaorrɛoye.

Na yɔk hunde kɛtɛldi hung na kargi bho

na kishigi bho

na kataga bho

na kawakta gɔra nanu, anda ale kibaysiyɔ.’

28 “Na mɛa igge tagatɔni wo! Tumu wa eknyɛsɛa zugo na koyoktɛsɛ bhorinyaa anaa lɔga ibaysia ꞉Tumu zugo na yɔk ale shikkɛyɔ!” 29 [Na hunaa Bhaulos yokkono ngalɔktaye, zuga Ayhudhi ɛkɛnyandɛ kɛngɔ goore na ago.]

30 Na Bhaulos bhagu doraa gadheo birinya oynya ramman kumulɔng, Na kɔmɔnde assanɛ nɔngge abhanyisiu kumulɔng. 31 Na nɔng madhɛsɛ zugo bhɛa Tumu lɔmɛa zugo ko lɔga Komoru Yesus Kirisosi dib kali kali na hirre kanyɛ garu.