26
1 Na Agiriba sɛɛsɛ Bhaulos,
“Wa kìgomboginyɔ na mɛa ga yogo lɔga gunyu.”
Na Bhaulos lamu zugo siyɔ na yogo lɔga kɛngɛa rɛ na seu,
2 “Komoru Agiribaye,
anye kalda hini hɔllany goore ke ngaya kitinynyanɛnɛ na kɛmɛzɛɛ lɔga bɔɔ chillɛanyɛa ꞉zuga Ayhudhi kumulɔngge.
3 Chɔɔ ngaya inye gaɛ kera Ayhudhi ko lɔga ɛkɛnyanɛnɛa ꞉yɔkku kumulɔngge,
chali goore.
Na mɛa kɔtɔllɔhaginydɔ.
Ga,
hini any keteiny bu na chirarany shɛɛ.
4 “Ihineya bere kanɛi eri na kabhagɛi baa nanu ko Yerusalem ko mɛa toye hunde bere ba kabhagi ɛnɛngge,
yɔk zuga Ayhudhi kumulɔng gaɛyɔ.
5 Nɔng huna bere sabbɔ kɛbhɛgɛi kera Bhɛrɛsi bo dhandala,
yɔk gaɛyɔ.
Na hunde kako hinnɛye,
sɛɛ koyoktoyɔ.
6 Na mɛa anye bhee kichilɛ ngaya kèe kegendɛ lɔgɔye,
a ngaya kɔlɔmɛ lɔga bere bhiigɛsɛna ꞉Tumu kokonginyaa ga hinisɔye.
7 Yɔk gettoa Ayhudhi ku tɔmmɔn ko ramman kumulɔng kɛyɛbhbho ngalɔkta na ale kubhugnyɛsɛyɔ,
na aynde kagayɛo Tumu bar ko kaliye.
Na mɛa Komorue,
bhee chillɛanyɛ ꞉ngazukta Ayhudhiye a ngaya kɔlɔmɛ ngalɔkta hinisɔye.
8 Na ngazukta Ayhudhi yɛbhbho ngalɔkta Tumuye,
hunde Tumu ibaniseono zuga rɛssɛaye,
igge bhee ngayɛbhɛoyoye a ore?
9 “Chɔɔ anye sabbaa nanu rɛ bere kamari lɔga Yesusa Nazeriti goore na killobi bhɛa kɔgɔrranɛi zuga yɛbhbhɛa nɔng kumulɔng.
10 Na chɔɔ Yerusalemɔ bere kemesi nganga chi.
Anna ajjanyɛa ꞉gɔldangɛaa bibiyo doraa Tumu barara lɔgɔ na kichibɛi zuga Tumu ridhing ningginɛna na kishiginɛnɛo ko zuga kɔdhdhɛa yɔk.
11 Na taa kalamii yɔk doriyoa kàmadhɛa zugo lɔga Tumu na katii goore na kadhɛsɛni lɔgɔ na kɔdhɔmɔ Yesus.
Na bere kamargii goore na kɔɔbhi chɔɔ ori genne na kɔgɔrraniyɔ.
12 “Na kali kona gɔldangɛa bibiyo doraa Tumu barara ayany lɔgɔ na ektony Dɛmaskogiye na kɛ̀chɛb zuga yɛbhbhɛa Yesus ɛlla ngonu.
13 Na mɛa Komorue,
hunaa ngani kɔgɔi na bho anna kali kɛngɔ na kihi gɔrɔye,
karra hɔldina bo walda tumɔ jorrono su.
Na abakkanany anye ko zuga kidhiyo kari.
14 Na kɔchɔyo ba kumulɔng.
Na hunaa kujjo baye,
anye kishikka lɔgɔ tuga Hibiru hunde sennɛ,
‘Saol!
Saol!
Kɔrranany kɛ ɔng?
Hunde dogi bɛr tundɔye ale bhɛa nunu a dhandali.’
15 “Na anye kighinna na kesɛɛsɛu,
‘Komorue!
Ani nɛng?’
“Na nɔng seagany,
‘Anye kani ngahirra kɔrranany ꞉inynyo kènnony Yesuse.
16 Na mɛa ga bana na chil tunɔ.
Na ngaya wa kɔdhɔllagɛiny rɛa nanuye keni kɛ̀bɛrayɛiny inye na tagayanydɔ.
Na te hira orroni ngalɔkta gany wa oriye ko gee ale kɔdhɔllaginyde kumulɔng na yogɛsɛ zugo.
17 Na ale kibayseny bhɛa zuga gunyu Isirayeli ko bhɛa zuga bhora anaa kekɛinyi.
18 Na owo kawarɛ na kobhonda mugurɔ na kohoya gɔra hɔla na kɔdhɔyɔ ɔnneya Moldoyi na kawakta gɔra Tumu.
Na hunde yɛbhtany anyeye,
aynde ale kujugɛ lɔga gɛ gɛrsa na jɔanɛ bhɛa ɛlɛa ko zuga yɛbhbhanyɛa anye ridhing ningginɛnaye.’
19 “Na mɛa Komoru Agiribaye,
lɔga bɔɔ ajjanyi ꞉Tumu na kori,
anye ngani kìrranno.
20 Na sabbɔ kamadha zuga Dɛmasko ko zuga Yerusalemi ko zuga Ayhudhi kumulɔng.
Na koo kɔtɔrɛu zuga bhorinyaa anaa Tumu ngani kɛyɛbhtao.
Na koyogɛsɛu na kujugu lɔga gɛ gɛrsa kumulɔng na kawakta gɔra Tumu,
na kemesigi lɔga hinno ꞉Tumu na kɔdhɔlda bhɛa anɛa zuga ujukkɛa lɔga gɛ gɛrsa.
21 Na bhee ibhbhɛanyɛ ꞉zuga Ayhudhi na se kindɛaynde,
a ngaya kamadhɛ ngalɔkta doraa Tumu barara ratagiyeye.
22 Nɔng anye ko mɛa toye bɔɔ ɛyaanyɔ ꞉Tumu kɛr na mɛa kani nganda kichili ngayaye.
Na lɔga bɔɔ korroni kawarre kamadhɛsɛu zuga ku bhoyoga ko ga lɔmmɛa aha kumulɔng.
Na gee bere koyogɛsɛnde a lɔga bere yokkono ꞉Muse ko zuga yogɛsɛnɛa zugo lɔga yokkono ꞉Tumu na sennɛa,
“Ale bhugnyɛsɛnɛyɔ.”
Gena ngani kɔ̀tɔrɛyo dhul.
23 Yɔk lɔkte bere yokkonɛ ꞉yɔkkuye sennɛ,
‘Hira kɛ̀bɛrrana ku Kirisos nɔng ale chɔllanɛ na bhɛa zugony a hira bansana rɛsɛyɔ sabbɔ.
Na yogɛsɛn zuga Isirayeli ko zuga bhorinyaa anaa lɔgɔ na terinyɛsɛn ganggua Tumu na ibaysiyɔ.’”
24 Na hunaa Bhaulos ngani yokkono lɔga gɛnyɛye,
nɔng Bhito dɛbu na kedhɛsɛ lɔgɔ toye na sɛɛsɛ,
“Bhaulose!
Wa useny ꞉lolu.
Dha bɔɔ tagu lɔgɔ goore na sabba ɛddɛɛ!”
25 Na nɔng yagɛsɛ na sɛɛsɛ,
“Ngahirra bu lɔmi diram kènniny Bhitoe!
Anye koyokkon lɔga ku dhere lɔma hologun.
Lolu ngakaniyo.
26 Yɔk ngalɔkta bere me ꞉Yesusiye ko nɔng Komoru Agiriba gayɔ na aynde koyokkonɛ tokte.
Agga bere messo bhɛa zugo mɛra.
Lɔkte me dari ngayo.
27 Na mɛa Komoru Agiribaye,
inye zuga yogɛsɛnɛa zugo lɔga yokkono ꞉Tumu ngayɛbhiyo chi?
Nɔng kaggayɔ hunde yɛbhiye.”
28 Na Agiriba nɔng sɛɛsɛ Bhaulos,
“Na kèe inye dhaa seni bhɔdhany na kɛ̀yɛbh Yesus mɛarrɛ dhogoy.”
29 Na nɔng yagɛsɛ na sɛɛsɛ,
“Ko hunde kɔ̀bhɔdhiny mɛarrɛ oo ale kingi,
anye kogoli Tumu na inye ko ngazukta shikkonyɛye kumulɔng kɛtɛhɛyɛ ko anye.
Na igge ngagɔrgɔriya kìchibanyde ngakichibongu.”
30 Na Komoru Agiriba ko gulsaa allinɛnɛa ba ko Ngaberenike ko zuga ɛlla kari kumulɔng banda na bhonda doraa kègedhdhɛa lɔgɔ.
31 Na hunaa ngani bansanɛa na bhonsanɛaye,
mɛzi kɛngɔ na se,
“Ngahirra lɔkte ɛddɛ na kìchibɛ oo kìnisɛ ninggɛ.”
32 Na nɔng Agiriba sɛɛsɛ Bhito,
“Hunde ngahirra bɔɔ ngaseni,
‘Anye lɔga ganyu any kamarak ꞉Komoruya Rome bo,’
anda mɛa kɔ̀kkanayɔ.”