Dadaba Zuga Kèkko 9

Lɔga Yɛbhɛa ꞉Saoli Kamannaa Challa

1 Na nɔng Saol dha bere dɛbiny na ngani hinɛsɛn zuga yɛbhbhɛa Komoru Tumu rɛsɛ. Na ogo bhɛa gɔldanga bo doraa Tumu barara. 2 Na ghinu na kɔgɔdhɛsɛ dadab na kɔgɛ na kayɛsɛ zuga ɛlla doriyoa kàmadhɛa zugo lɔga Tumu Dɛmaskogiye. Na hunde jɔana zuga kɔbhbhɛa Ganggua Yesusiye, kibh ga maya ko ga ngaha kari na kɔgɛ doraa chibinuny iho Yerusalemɔ. 3 Na hunaa kɔa na senno kadak Dɛmasko jaaye, tumu bhadha dari na abakkanu bhɛa ihɛa ꞉nɛa. 4 Na chɔu ba na shigu hirre se, “Saol, Saol kɔrranany kɛ ɔng?”

5 Na ghinu ꞉Saoli na sɛɛsɛ, “Komorue! Ani nɛng?”

Na nɔng yagɛsɛ na sɛɛsɛ, “Kani ngahirra kɔrranany ꞉inynyo kènnony Yesuse. 6 Na mɛa bana ok ɔr toye. Na lɔkte kèe mese ale yokkoginyɛ ngonu.”

7 Na zuga dhiyɛa ko Saol hunaa yɔk shikkɛa mɛziye, chili laay na dhittɛ rib. Na hirre mɛziye ngani ngaorrɛo. 8 Na nɔng Saol bana bhɛa ujjɛa ba. Na hunde oddono kawarɛye, bho ngani ngaorro. Na ibhigi ꞉zugu siyɔ na dhigana chɔɔ Dɛmasko. 9 Na ungo sizzi bho ngani ngaorro. Na saniu hozzo na amissɛ ngani ngaammo na ma ngani ngamatto dhul.

10 Nɔng Dɛmaskogiye dha bere lɔ hirre yɛbh Yesus kèe Hananiya. Na yogɛsɛ ꞉Komoruyɔ lɔgɔ huna kunauny na sɛɛsɛ, “Hananiyaye!”

Na nɔng elɛɛ, “Woy Komorue!”

11 Na sɛɛsɛ ꞉Komoruyɔ, “Bana ok ganggua kèleo ‘Dib.’ Na ok doraa hira kèe Yuda na lameo hira Tersese kèe Saol ngonu. Nɔng mɛa a inde allinɛ ko Tumuye. 12 Nɔng wa orro hirre kèe Hananiya huna kunauny hunde kun na tadhɛ siyɔ na kawarɛ oninya na or bhoye.”

13 Na nɔng Hananiya sɛɛsɛ, “Komorue! Ngahirra bare kishikka hunde se tiranyɛ zuga gunyu ridhing ningginɛna ɛlla Yerusalemɔ gooreye. 14 Na bare ayɛa ꞉gɔldangɛaa bibiyo doraa Tumu barara lɔgɔ na kɛchɛb zuga eliyɛa sara gunyu ɛlla ngaya kumulɔng.”

15 Na nɔng Komoru sɛɛsɛ, “Ay! Ogo assa! Nɔng a hira bere kɛbɛrrani ꞉anynyo na koyogɛsɛ bhorinyaa anaa ko komortɛna gɛ ko zuga Isirayeli sara ganyu. 16 Na ale kudhugunɛsɛn nɔng bhɛa ale chɔllanɛnɛa sara ganyu.”

17 Na Hananiya bana na ogu doraa ihɛa ꞉Saoli na tunnugu. Na tadhɛ siyɔ na sɛɛsɛ, “Gochonga nanu Saole, anye ekkonony ꞉Komoruyɔ Yesusi, hira bare dhɔllaginyi rɛ gɔrɔ huna kuni ngaya. Na ekkonony bhɛa nunu na ar bho na kɔgaginy ꞉Kuloya Tumu.” 18 Na galite heo rugɛrugɛy ngɔa kawariyɔ shaw hung na aru bho. Na nɔng bana na kuchuru ma. 19 Na ussu amissɛ na kɔmi dagu ba.

Lɔga Madhinɛnɛa ꞉Saoli Dɛmaskogiye

Na ungge muchugi tɛldi ko zuga yɛbhbhɛa Yesus ɛlla Dɛmaskogiye. 20 Na tɔgɔdhay madha doriyoa kàmadhɛa zugo lɔga Tumu ɛlla Dɛmaskogiye na madhɛsɛ zugo hunde Yesus a eriya Tumuye. 21 Na zuga shikkɛa lɔga madhinɛnɛa ꞉nɛa kumulɔng iwachiyɛ na se, “Nganda ngayo hira bɔɔ kɔrrana zuga eliyɛa sara Yesusi Yerusalemɔ na kunno ngaya na kibh ga ɛlla ngaya sɛgɛn na kayɛsɛ gɔldangɛa bibiyo doraa Tumu barara?” 22 Na nɔng Saol te ɔnnɛ na dhugunɛsɛ zuga Ayhudhi bhakkɛa Dɛmasko bhɛa Yesus anɛa hira kɛ̀bɛrrana ku Kirisos dib na yɔk rɛgɛ ꞉lɔkku.

23 Na hunaa ungo tewa mɛriye, zuga Ayhudhi daga go na kɔgɔdhɔ Saol. 24 Na yɔk tunggɛsɛ waranyoga orony kumulɔng bar ko kali na kɔgɔdhɔtɔ. Na nɔng Saol shigu lɔga dogɛa ꞉yɔkku go. 25 Na barɔ zuga kɔbhbhɛa nɔng ibhta na oytɛsɛ kolite toye. Na ɔsɔnisi bhɛa ku hologun iho sariya orony ku bɛ hɛtta ko bhurbhur na dagu ba bay bhɔ.

26 Na hunaa Saol kɔa Yerusalemɔ na koo illobbo bhɛa senno kasay zuga yɛbhbhɛa Yesus ɛlla ngonu na kɛtɛldi kariye, yɔk tɛngɛrɛ kumulɔng ke ngaya senɛ nɔng kako hira yɛbhbha Yesus dhere ngani keteɛoye. 27 Na nɔng Barnabas ko na dhiganu chɔɔ bhɛa zuga ekko ꞉Yesusi. Na kɔbhɛsɛ ngalɔkta bare Saoliye hunde dha bare itinynyannɛ ko Komoru gɔrɔ na or na mɛzɛɛ kari ɛnɛngge. Na kɔbhɛsɛ ko lɔga bare madhɛa zugo sara Yesusi Dɛmaskogiye dib. 28 Na nɔng Saol tɛldi ko yɔk kari na tɔu Yerusalemɔ damite hinɛye. Na madhu zugo sara Komoru Yesusi dhɛ dhɛ hung. 29 Na mɛzi ko zuga Ayhudhi gayɛa tuga Girikuny na ɛkɛnyandɛy lɔgɔ. Na yɔk daktɛ nɔng go na kɔgɔdhɔtɔ. 30 Na hunaa zuga yɛbhbhɛa Yesus takta ngalɔktaye, dhigana chɔɔ Kesariya na ittono Tersesegiye.

31 Na koo zuga yɛbhbhɛa Yesus ɛlla Yudhagiye ko Gelilagiye ko Samariyagiye hinisi tɛlda bay na bhaga ba shɛɛ. Na iriyu ꞉Kuloya Tumu na te dhandali. Na yɔk ago na te mɛri na ayɛ Komoru Tumu diram na dhɔngɔyɛ.

Lɔga Ihɛa ꞉Betirosi Lidagiye Ko Yobhegiye

32 Na kali kona hunaa Betiros woo ori toyeye koo gɔnyu zuga kachchɛa Tumu bhakkɛa Lida. 33 Na ngonu daga hirre kèe Ɛniya dha bere anyakuwaninya kingi na oynya issey ungu hayagiye. 34 Na sɛɛsɛ ꞉Betirosi, “Ɛniyaye! Wa ibayseinyɔ ꞉Yesus Kirisosi. Na ga bana tɛhɛ hayaa nunu!” Na nɔng bana ke tiri. 35 Na zuga bhakkɛa Lida ko Sarona argi nɔng na yɛbhɛ Komoru Tumu kumulɔng.

36 Nɔng dha bere ɔra kèe Yobhe lɔ tɛrite yɛbh Yesus kèe Ngatabita. Na sara gɛnyɛ tuga Giriki keli Ngadorka. Na nɔng kali kali me lɔga challa na ɛana zuga ku bhoyoga. 37 Na kalaa gina ilagau na ere. Na tonyigi ꞉zugu na aytɛ na ulubu doraa ku balanggi tundɔ. 38 Yɔk dha bere Lida ko Yobhe a oriya ɛlla jaajaa. Na yɔk zuga yɛbhbhɛa Yesus bhakkɛa Yobhe hunaa shikkɛa lɔga ihɛa ꞉Betirosi Lidagiyeye, ege zukte ku ramman na kɔtɔllɔsɛsɛ na kugo ke tiri.

39 Na Betiros dhiya ko zugaa kèkko na hoya chɔɔ balanggi tundɔ bhɛa ihɛa hiraa rɛsa. Na tɛrroa ku bhoyoga kumulɔng hoya na munydɛsɛ Betiros na dhɔldɛsɛ nɔng tanduranya ko ruminyaa bere dhakkana ꞉Ngadorka kala bere ɛlɛa kari na turgi burr.

40 Na nɔng Betiros obhonisiu zugo kumulɔng bhɔ. Na tɔgɔdhu kɔmma na alliyɛ ko Tumu. Na gɔnyu hiraa rɛsa na eliu na sɛɛsɛ, “Tabitaye! Bana!” Na nɔng Ngatabita ɔda kawarɛ. Na hunaa orro Betirose, bana na liginu tunɔ. 41 Na ibhu ꞉Betirosi siyɔ na dhɔnga na chilu tunɔ. Na koo eliu zuga yɛbhbhɛa Yesus ko tɛrroa ku bhoyoga na dhɔlɛsɛ yɔk hunde dha bana rɛsɛyɔye. 42 Na ngalɔkta taga ꞉zugu na tɛhɛtɛy ko Yobhe kumulɔng. Na zukte mɛri yɛbhɛ Komoru Yesus. 43 Na Betiros tɛu Yobhegiye bhee hirre sib sayo kèe Simon ungge mɛri.