Lɔga Hananiya Ko Ga Tɛriya Nɛnɛ Kèe Ngasɛbhira
5
1 Dha bere lɔ hirre kèe Hananiya.
Na tɛriya nɛnɛ keli Ngasɛbhira.
Na kali kona taldɛy baa nɛ tan kona.
2 Na nɔng ɛsɛdhɛ lɔgɔ ko tɛri na ibhta birinyaa tallanɛa na ngɛrɛ na gena kete ga gɛ.
Na Hananiya kuyɛy gena na aynɛ zuga ekko ꞉Yesusi.
3 Na koo sɛɛsɛ ꞉Betirosi,
“Hananiyaye,
wa tɔlɔ ɔng igomɛsɛu Moldoy na kɔbhɔdh hinisa nunu na tab Kuloya Tumu na birinyaa bɔɔ tallano ba gen ullugunyde?
4 Huna ba ngani talliyɛayo,
ngaanno na nunu?
Na koo hunaa talliyɛuye,
birinya ngaanno ga gunyu?
Ngalɔkta bɔɔ hinisɔ ɛsɛdhi kɛ ɔng?
Yee,
inye zugo ngatabiyo ni.
Dhaa tabi Tumu.”
5 Na hunaa Hananiya shikko ngalɔktaye,
chɔyɛ “bum” na ere.
Na zuga shikkɛa ngalɔkta kumulɔng tɛngɛrɛ bho goore.
6 Na zuga gena banda na chɛbɛ hiraa rɛsa na aytɛ na ojjigiyɛ.
7 Na yɔk tɛldi satinya sizzi na tɛriya nɛnɛ ko.
Yɔk ngalɔkta rɛsɛ hira nɛnɛye dha ngani kishikko.
8 Na koo ghinu ꞉Betirosi na sɛɛsɛ,
“Baa nu tallanɛo ngabirinyaya sɔng?
Ga yogogonydɔ se!”
Na nɔng seu,
“Ee,
katallanɛo ngabirinyaya chi!”
9 Na sɛɛsɛ ꞉Betirosi,
“Shiginɛno ko hira nunu na illobbo Kuloya Tumu kɛ ɔng?
Yee,
zugaa wa bhɔkkɛa hira nunu aggee ɛl waranɔye ni,
na kɔbhɔktiny ko inye sɛgɛn!”
10 Na chɔyɛ “bum” jagara Betirosi jaa na ere.
Na zugaab wokkonɛa bhɔgayɔ argi tɛri hunde dha ereye.
Na aytɛ na ojjigi igingeya hira nɛnɛ jaa.
11 Na zuga yɛbhbhɛa Yesus ko zuga shikkɛa ngalɔkta kumulɔng tɛngɛrɛ bho goore.
Lɔga Bo Kìwacheo Messɛa ꞉Zuga Ekko ꞉Yesusi
12 Na yɔk zuga ekko ꞉Yesusi mesigi lɔga bo mɛra barara na iwachiyɛa ꞉zugu.
Na zuga yɛbhbhɛa Yesus kumulɔng hinisiya gɛ te dhɔnɛ na tii tii muknyɛsɛ Boloya Sɔlɔmɔni.
13 Na te ga bo lɔmmɛa diram bhɛa zugony.
Na yɔk zugo tɛngɛrɛ bhɛa senno kasay na kɛtɛldɛ kari.
14 Na chɔɔ ko hunde kɛtɛngɛrɛ ꞉zugu,
yɔk zuga maya ko ga ngaha ngani yɛbhbhanɛa lɔga Komoruny te mɛri na tɔrɔ yɔk.
15 Na chɔɔ zuga orony dha bere ngorronɛ zuga ilagassɛa na ɛhɛɛsɛnɛ hayachina ganggoye.
Se hunde Betiros dho ngonuye,
kɔsɔgɔ ꞉rimboya nɛnɛ na kibaysiyɔ.
16 Na ko yɔk zuga bhakkɛa oriya ɛlla Yerusalemɔ dheyyɔ ngarta zuga gɛ ilagassɛa na dhiganda ko gaa mariyɛa ꞉kulyaa mɛnɛnguny na ba kumulɔng.
Lɔga Kɔ̀chɔllayɛa ꞉Zuga Ekko ꞉Yesusi
17 Na gɔldanga bo doraa Tumu barara ko bɛkanyaa gɛnyɛ ku Sodoka chirkana lɔga messɛa ꞉zuga ekko ꞉Yesusi.
18 Na ibhigi yɔk na aytɛ doraa chibinuny.
19 Na barɔ hira ekkono ꞉Tumu ko na owo waranyoga doraa chibinuny na ɔga yɔk na obhonisiu bhɔ.
20 Na sɛɛsɛ,
“Ago na chili doraa Tumu barara ratagiye na yoktɛsɛ zugo lɔga basseya iho dhul.”
21 Na yɔk bhelleyɔ ago doraa Tumu barara ratagiye na madhtɛsɛ zugo lɔgɔ damiya bare kòyogɛsɛna.
Na gɔldanga bo doraa Tumu barara ko bɛkanyaa gɛnyɛ hunaa honyoye,
eli gulsachina Ayhudhi kedhdhɛa lɔgɔ ko zuga Ayhudhi nyagasa kumulɔng.
Na ko yɔk ege zuga doraa chibinuny na kidhiganda zuga ekko ꞉Yesusi.
22 Na hunaa hɛa doraa chibinunyde,
zuga ekko ꞉Yesusi dha garayɛ.
Na wakta na seyɛsɛ,
23 “Agge hunde kɛhɛo doraa chibinunyde,
a nyuginɛ na zuga bhɛginɛna chillɛ waranɔ bhɔ.
Na hunaa koonoye,
chɔɔ hirre dhɔnɛ toye ninggɛ.”
24 Na yɔk hunaa shikkɛa ngalɔktaye,
gulsaa zuga bhɛkkɛa doraa Tumu barara ko gɔldangɛa bibiyo doraa Tumu barara rɛgɛ ꞉lɔkku na se,
“Na dha ale ngalɔkta ɛl ɛnɛng?”
25 Na hir kona ko na sɛɛsɛ,
“Na ke zuga bare chibbo a ngagenu madhɛsɛnɛ zugo lɔgɔ doraa Tumu barara ratagiye ngonuye.”
26 Na hunaa shikkɛa ngangaye,
gulsaa zuga bhɛkkɛa doraa Tumu barara ko bholisa gɛnyɛ ago na dhiganda.
Na yɔk gidhingɔ ngadhigananɛo ke ngaya ɛngɛrsɛ bho na se kako ngakɔchɔ ꞉zugu bɛnneye.
27 Na dhiganda chɔɔ bhɛa kedhdhɛa ꞉zugu lɔgɔ na kighin ꞉gɔldanga bo doraa Tumu barara.
Na koo sɛɛsɛ ꞉gɔldangɔ,
28 “Huna bare kamadhtungɔ kɛr na kennagungu,
‘Zugo sara Yesusi ngamadhdho!’
Na igge dha bare madhtɛsɛo na chɔɔ Yerusalem tɛhɛtɛy ko lɔga gu.
Ngangaye gigeya bɔɔ ngahirra rɛsse senno kɔ̀tɔlɔmbo ꞉aggeu dha?”
29 Na Betiros ko zuga ekko ꞉Yesusi gena yaktɛsɛ na seyɛsɛ,
“Agge ko bhee kigomɛsɛno zugo,
maya kigomɛsɛno Tumu.
30 Igge huna bere ibhbhano Yesus na ujɛsɛno muddɛnne kɛyɔ na rɛsa,
nɔng Tumua kokonginyaa ga annaa bere dhɔngngana rɛsɛyɔ na bassa.
31 Na ibhbhana na ojjo siyɔ sɛtɛna nɛnɛ na ajjɛa diram.
Na ojjo ke Komoruya na bo ibayseiy.
Na kamadh zuga Isirayeli na kujugu lɔga gɛ gɛrsa na kawakta gɔra Tumu.
32 Na Tumu bɔɔ aynɛa zuga igomɛsɛnɛa nɔng Kuloya nɛnɛ.
Na agge ko Kuloya Tumu kanno ga bɔɔ korrono ngalɔkta bansanɛ ꞉Yesusi rɛsɛyɔye kawarre na koyogɛsɛno zugo.”
33 Na zuga kedhdhɛa lɔgɔ hunaa shikkɛa ngalɔktaye,
dɛbɛ goore na kɔtɔgɔdhɔtɔ.
34 Na nɔng hira kɔbhbha damiya Bhɛrɛsi ɛngɛrsɛa ꞉zugu kumulɔng ku Bhɛrɛsic madhdha zugo kera Muse kèe Gɛmaliya bana na aynɛ zugo lɔgɔ na kobhonisi zuga ekko ꞉Yesusi na kɛtɛlda bhɔ bhee chinyi.
35 Na koo sɛɛsɛ zuga kedhdhɛa lɔgɔ,
“Zuga Isirayeliye!
Lɔkte senno mesigi bhɛa ngazuktaye,
ga sabbɔ ɛsɛdhɛ shɛɛ na tɛldi kɔk.
36 Anna bere lɔma hirre kèe Tewoda na senno,
‘Anye kani hira bo.’
Na tɔrnɛna ko zukte heo anda ku zugo hirkon.
Na nɔng koo kɔ̀gɔnda na erra.
Na hunaa rɛsaye,
zuga bere tɔrrɛa nɔng bhassayɛ na lɔga gɛnyɛ garayɛ.
37 Na bɛrgua bere kotoyiyɛa zugo kali kona,
hira Gelila kèe Yuda ko nɔng annaa dhɔnga rɛ ke bu na kɔtɔrɔ zuga bo mɛra.
Na ko nɔng kɔ̀gɔnda na erra.
Na zuga kɔbhbhɛa nɔng bhassayɛ kumulɔng sɛgɛn.
38 Na mɛa anye kennagung ɛnɛnggeo,
ngazukta ɔddigiyɛ!
Any kago!
Yɔk ngalɔkta gɛye hunde agga messonɛa ꞉zuguye,
ale garsɛyɔ.
39 Yɔk hunde agga ajjɛa ꞉Tumuye,
bhee ɔanɛo ꞉iggeu ninggɛ.
Na chɔɔ ale ɛkɛnyanɛno ko Tumu hɔlɔng hung.”
40 Na zuga kedhdhɛa lɔgɔ shigi lɔga Gɛmaliya.
Na eliyo zuga ekko ꞉Yesusi na dhaga na ayɛ lɔgɔ na wurtɔ sara Yesusi ngayokkɛ na ɔtta.