Lɔga Ibaysiyɛa ꞉Betirosi Hira Ku Anyakuwanday
3
1 Na kali kona rayagiye Betiros ko Yohanis ago doraa Tumu barara a kolea kallinɛnɛa ko Tumu.
2 Na ngonu dha bere lɔ hirre ihineya bere hudhukkinyanɛa a anyakuwanday na ngorronɛ ꞉zugu doraa Tumu barara kali kali.
Na dhɔttɛ warande keli Warana Challa na kogol zuga hɛa doraa Tumu barara ratagiye.
3 Na nɔng aru Betiros ko Yohanis hunde hony doraa Tumu bararaye na ogolu.
4 Na yɔk gɔnyigi churr na sɛɛsɛ ꞉Betirosi,
“Ga gɔnyiy agge se!”
5 Na nɔng se kako ale ajjɛ aha gen na gɔnyu churr.
6 Na sɛɛsɛ ꞉Betirosi,
“Anye tomoga hɔla gaw dhandala ko worginya ngakɔlɔmiyo.
Nɔng ahite kɔlɔmiye kajjinydɔ.
Sara hira Nazeriti kènno Yesus Kirisos,
ga bana tunɔ na tɔ jagarre!”
7 Na ibhu siya sɛtɛni na dhɔnga.
Na jagarɛb iriytɛ shaw hung.
8 Na bana kɛhɛy na chilu tunɔ na tɔu.
Na dhi ko yɔk kari doraa Tumu barara ratagiye na bo hini hɔla na bɔrrɔtta na eterrisana Tumu.
9 Na zugo kumulɔng hunaa orrɛa nɔng hunde wo na eterrisan Tumuye,
10 taga hunde a hira taa ogolnɛna doraa Tumu barara warana kèleo Warana Challa kali kaliye.
Na dɛɛbɛ na iwachiyɛ ke ngaya kìbaysɛɛ nɔngge.
Lɔga Yokkonɛa ꞉Betirosi Lɔga Ibaysia Hira Ku Anyakuwanday
11 Na hira kìbayseo hunaa ngani ibhbho Betiros ko Yohanise,
zugo kumulɔng iwachiyɛ na ngeya bhɛa ɛlɛa kènno “Boloya Sɔlɔmɔni.”
12 Na hunaa Betiros orro zugoye,
sɛɛsɛ,
“Zuga Isirayeliye,
gunyey na iwachinɛnɛo ɔng?
Na gunyey churr huna zuga kemesso lɔga challa na kibayseo ngahirra barartina nayo kɛ ɔng?
13 Na Komoruya kokonginyaa ga bere Awurahami ko Isaki ko Yaykobi Tumu nɔng dhɔngu hoynɛ Yesus.
Na nɔng igge ibhtao na ayɛo Bhilatos na kertɔ.
Na chɔɔ Bhilatos huna senno kɔga,
igge kɛnggao na tamarto.
14 Na tamarto chɔɔ Hira Kullɛna Barara Ridhing Ningginɛna na tɛhɛndo hira kɔdhdha zugo na kɔ̀ktagunggɔ.
15 Na ibhtao hira ajjiy bassey na indo.
Na Tumu nɔng dhɔnga rɛsɛyɔ.
Nɔng agge kanno zuga bɔɔ korrono ngalɔkta kawarre.
16 Na ngahirra ku anyakuwanday orro na gao kumulɔngge,
wa bawa ke ngaya yɛbhɛ sara Yesusiye.
Ee!
Nɔng ngahirra basɛ ngaya yɛbhɛ Yesuse.
Na mɛa a nganda i ke na bo iho shɛɛ na orro ꞉iggeu kumulɔngge.
17 “Gochonginyaa ganyuye,
igge ko gulsachina gu annaa bɔɔ ɛddɛano lɔgɔ na nisso Yesus.
Na ngalɔktonu yɔk hunde a lɔga imaggo na ɛddɛanoye,
anye kaggayɔ.
18 Yɔk ngalɔktonu agga bere bhugnyɛsɛa damiya bere yokkono ꞉Tumu na yogɛsɛna zuga yokkonɛa lɔga gɛnyɛ sabbɔ na sennɛa,
‘Hira kɛbɛrrani maya sabbɔ chɔllanɛyɔ.’
19-20 Na mɛa ujugu lɔga gu gɛrsa na wakta gɔra Tumu na ko nɔng Tumu kujuk lɔga gu gɛrsa na kagara dhul.
Na Tumu ale ittonnogung Komoruya bere kɛ̀bɛrragungu igge sabbɔ kènno Yesus na kilalung hinisi na ke ga bo challa.
21 Yesus nɔng mɛa i tumɔ ko bhee ale Tumu bhɔdhɛ ba ke chagi kumulɔng huna lɔga bere bhiigɛsɛna zugo na yokkonɛa ꞉zuga bɛrrana ꞉Tumu na yogɛsɛnɛa zugo lɔga yokkono ꞉nɛa.
22 Ko nɔng Muse anna bere senno,
‘Komoruya nu Tumu ale ibhbhana hir kona bhɛa nu na yogɛsɛn zugo lɔga yokkono ꞉nɛa hunde nande.
Na lɔkte yokkogung ꞉nɛaye kumulɔng shigitɔ.
23 Na inde lɔga gɛnyɛ ngashikkoye,
ale kennɛ ko zuga gɛnyɛ na gara dhul ko kingi.’
24 “Na chɔɔ zuga bere bɛrgua Samueli yogɛsɛnɛa zugo lɔga yokkono ꞉Tumu,
ko yɔk kumulɔng bere yoktoa lɔga ngabɛrguya.
25 Na igge anno ashaa sɛrɛo bhɛa zuga bere yogɛsɛnɛa zugo lɔga yokkono ꞉Tumu ko lɔga bere bhiigɛsɛna ꞉Tumu Awuraham na sennɛa,
‘Ale bhorinyaa bany kumulɔng tuhinɛnɛ hoyaa gunyu.’
26 Na Tumu huna bere ibhbhana hoynɛ sabbɔ na ekkono,
bere ittonnogungu igge na kutuhɛung ke ngaya lamanɛung bhɛa lɔga gu gɛrsa na wokkonɛo gɔra nɛnɛye.”