22
Da:ta:la:eki kita:la: ikali pita: ti yaapo
1 Mo enisoloma:ta: ala:ta: ma:nda: na ta̱leke kalasima: handeke da:ta:la:eki kita:la: ikali yopulu hala: I̱ pa:ta: walea:me. Mo ikalita: oli Koda: pita: Sipisipi Ma:na: Ikiki yaapona: kini sea pa:ta: yama: epea:me. 2 Kutupa mo ikalita: mo daonina: pota: tukikina: yapea:me. Mo ikali tea: yaapona:ta: hande da:ta:la:eki kita:la: ti opo hala:me. Mo tima:ta: bapi homekena:ta: sumba: homeke homeke yalao kiliki a:eya:tiki pu hala:me. Kutupa ipika: katake manuta: mo tapake ta:ta: ta:ta: paeyaona: epeaasa:ekie. 3 Mo Koda:ma:ta: hoeyaena: laa ma̱leke lia ula: ale ma:nda:ta: koto daoni pa:ta: ota: na wilieke.
Mo Koda: pita: mo Sipisipi Ma:na: Ikiki yaapona: kini seata: koto daoni pa:ta: wilieke. Kutupa ipika: e pokaaseme wanda:halita: ipiki pa:ta: panda:puniao yeiya: laaso hata: yeni pu halimikie. 4 Ikana:ma:ta: ipika: leke popeleke handaa make ipika: bikita: ika: wenokonina: laalimikie. 5 Koto pa:ta:ta: timba: ala:eki ota: dia:yalo hata: ola:pake make natena: pa̱a̱ make na weilimikie. Pa ekipeke mo Tekehali Koda:ta: ika: pa̱a̱ halieke. Kutupa ikana:ma:ta: kinimanu pita: hoto paeyao handeteke hao halimikie.
Yesuna: epolo pa:la:eki
6 Kutupa mo enisoloma: I̱ pa:ta: alota: Do pi manuta: ota:eki ya:la: ekina: hone tu lapeke ya:la:me. Kutupa hande *potopede haliweki pa:ta: Sipitidi halo pa:la: Tekehali Koda:ma: mo ipika: e pokaaseme haliweki pa:ta: ame do koto kone pulu pa:la: ekimanu walena:yeke ipika: enisolo tapaala:me lea:me. 7 Yesuma: alota: Opie. I̱ta: teke pa:ta: ipulume. Do buka pa:ta: ula: wetepena: pulu pa:la: pimanu pa:ta: opua pu haleme wanda:halita: ta:na:ma: homilimikie.
8 I̱ Dionima: do hau paeyao handaa make opua:me. Kutupa do haumanu handa make opu paeyaota: I̱ta: do haumanu walea: enisolona: anketeke pa:ta: lopa ipiki pa:ta: panda:puniao yeiya: laaluekema: pitua:pate 9 ipikana:ma: I̱ pa:ta: alota: Kotoeki na pia:pema laata: I̱ta: e pokaaso naka: yankekee. Kutupa make mo hande naka: potopede kame manuna: make do bukana: ula: wapena: opua pita:la: wanda:hali paeyaona: yankeke kone halome. Koda: pa:ta: homeke yeiya: laaso hata: yeni pu hapeke laa lea:me. 10 Kutupa I̱ pa:ta: ombu alota: Do bukana: la: ula: wetepena: pulu pa:la: pi manuta: na a:mbao wia:peke. Pa ekipeke do haumanu paeyaona: pulu pa:la: nateta: teke pa:ta: ya:la:me. 11 Epi a:nda: hoke temoko haeka:na:ta: kota: ota: hoke hau homeke pa pu hapeke. Epi a:nda: ha̱i̱piki some pu haeka:na:ta: kota: ota: ha̱i̱piki hau homeke pa pu hapeke. Epi a:nda: epeke some haeka:na:ta: kota: ota: epeke hau homeke pa pu hapeke. Kutupa epi a:nda: yakopiki some haeka:na:ta: kota: ota: yako piki hau homeke pa pu hapeke.
12 Yesuma: alota: Opie. I̱ta: teke pa:ta: ipulu hata: ika: yenkita: ika: homeke homeke peleme tupa: kone ana:na: haluekema: I̱ma: mo halo polo alemanu mea ipulume. 13 I̱ta: titina: make sale nane makee. Kini pitolo make paeyaaso makee laa lea:me.
14 Epi amedama: ika: aka:manu tanda:pa hake peaemeka:na:ta: ta:na:ma: homena:e. Ikita: mo hande da:ta:la:eki hala:la: tina: kiliki nena: make mo daonina: pota: kake pa:ta: yama: pena: make waleke halieke. 15 Pate mo ata:ka: peaaseme tapake make ti̱o̱ hau pu haleme tapake make pake nalo loke apa:taaseme tapake make honema: kone hali lu homaaseme tapake make toopi ti wepia: ula: ale pa:ta: yeni hau pu haleme tapake make yayapiki ekina: ta:na:ma: homa pu haleme tapake make paeyao sikita: mo daoni tea:na: hama: nane halememe. 16 I̱ta: Yesuma: do hau manuta: iki siosimanu haleme wanda:hali pa:ta: lawaena: yaka enisolo tapaalome. Deipidita: yaka apa:mei halie. I̱ta: mo hande da ka:la:paaso opa:la: pa̱a̱ tieke piki hombulanka:e laa lea:me.
17 Mo Sipitidi pita: mo hali panake pula: wanda: yaapoma: alota: Epoe ala:me. Do pi opilimi tapake paeyaoma: make Epoe lapa:peke ya:lieke. Ikali na:na:ma: homele some epita: do da:taapeke ya:la: ikalita: pa hameke kita:la:ekie laa mea:peke ya:la:me. Dota: ma:nda: epi hone pa:la: somena: loa:me lea:me.
18 I̱ta: Dionima: do la: ula: wetepena: pulu pa:la: pimanu opiteleme wanda:hali pa:ta: kinki pita:la: pi dupa alome. Ma:nda: epima: do pimanu pa:ta: pi ma:nda: apa:taeya:ka:na:ta: kota: Koda:ma: koto some ipika: panisi pa:ta:ta: do bukana: la:la: kemanu handa:pekeeki apa:taalieke. 19 Kutupa ma:nda: epima: do bukana: ula: wetepena: pulu pa:la: pimanu ma:nda: mea baeya:ka:na:ta: kota: koto some ipika: mo da:ta:la:eki hala:peke ya:la: tina: kiliki mulupa:la: yenkina: putupilikita: pao mea make mo hande yakopiki daoni pua hapeke ya:la:eki make Koda:ma: pao milieke. Do bukana: la:la: ekina: loa:me.
20 Do wape pa:la: pi manuta: ota: pie laa la: wita:la: somema: alota: Aowe. Ota: a:pa:la:me. I̱ta: teke pa:ta: ipulume lea:me. Koto ekina:ta: kutu pia:peke. Tekehali Yesuo. Epoe.
21 Tekehali Yesuna: a:ta:ma: homolo tamba: mina:la: ekita: iki paeyao pa:ta: wina:e.