2
Epesese siosi pa:ta: pi tapaeyekeeki
1 Mo Epesese siosina: enisolo pa:ta: dupa lae. Do pita: mo hande watake hata: hombulanka:manu ipika: popeke nane kikina: miniki hata: mo watake hata: koloma: wepiki ola:pake keo panka:la: ale anka:lopuna: pomina:la: somema: tapaasa:me.
2 Ika: peleme hau manuta: I̱ma: hone ulume. Ika: honkopu hao e pokelemeeki make ika: homu pea yu wia halemeeki make loa:me. Ikana:ma: mo hoke haliweki na handoma: tiake make mandane haliwekima: ikita: *aposolo haliwekie aleme tapaketa: hande hande pea dia:yaota: yayapiki pi alo lemeka:ta:me laa handa: wilimime. 3 Ikita: homu pea yu wia halememe. Kutupa ikita: yaka ekina: kone tanda nalo hata: na kiaalememe. 4 Koto pelemepate ameta: iki pa:ta: alo pita: dupa. Ikana:ma: amba: titina: I̱ puki kitolo pimi tupa: ameta: puki na kelememe. 5 Iki pua lopeleme tupa: hone wipee. Ika: hoke hau hoki walaa amba: titina: pimieki paa pipee. Ikana:ma: ika: hoke hau hoki na walemeka:na:ta: I̱ma: iki pa:ta: a:pa mo ika: ola:pake keo panka:la: ale ipika: u hala: ale mina:pa:laena: lolueke. 6 Pate I̱ ta:na: putiaaseme hauta: doe. I̱ma: mo *Nikoleitani tapakema: pu haleme haumanu kiaaso pitolo tupa: kone ikana:ma: make kiaasememe.
7 Haleke haemeka:na:ta: kota: mo Sipitidima: mo siosimanu pa:ta: lo hala:eki manuta: ota: opua:pa:peke ya:la:me. Ma:nda: epima: a:nda: pea bepolaeya:ka:na:ta: kota: I̱ma: mo Koda:na: e pa:ta: opa:la: da:ta:la: tina: kiliki nena: waleke halueke.
Semena siosi pa:ta: pi tapaeyekeeki
8 Mo Semena siosina: enisolo pa:ta: dupa lae. Do pita: mo hande titina: make wetepena: make hala: halima: ala:me. I̱ta: homaaka:na: paa da:taa halo somee ala:me.
9 Ika: ka:nda: manuta: I̱ma: hone ulume. Ikita: nate hali halemepate ikita: ota: hamoko halememe hone ulume. Diu wanda:hali dia:ya:la:pate kone ikita: Diu wanda:halie lo haleme wanda:halima: iki pa:ta: hoke pimanu lo haleme ekita: I̱ma: hone ulume. Koto wanda:halita: Sadanina: tapakee. 10 Mo mulu peleme tanda manuna: paala:ma: na homa:pa:peke. Opia:pe. Mo Sadanima:ta: iki la handolo hata: iki ma:nda: hondo dipula mea lopaalieke. Kutupa ika: ka:nda:ma: homelemeeki manuta: kiki yaapo natena: pua paelieke. Homa:la:eki epena: kone I̱ pa:ta: hone tulaa pelia hapa:peke. Kutu pimika:na:ta: ika: a:nda: pea bepolaaseme ekina: ta:na:ma: homolo peleme yenkita: da:ta:la:eki kulueke.
11 Haleke haemeka:na:ta: mo Sipitidima: siosimanu pa:ta: lo hala:eki manuta: ota: opua:pa:peke ya:la:me. Ma:nda: epima: a:nda: pea bepolaasa: halita: hande hoto yaapo peao homa:la: ekima:ta: hoeyaapeke na yelieke.
Pekamamo siosi pa:ta: pi tapaeyekeeki
12 Mo Pekamamo siosina: enisolo pa:ta: dupa lae. Do pita: mo hande yaapo hao ne wopu hake bainasi wia hala: halima: ala:me.
13 Ika: haleme pa:ta:ta: I̱ma: hone ulume. Mo Sadanima: ipika: kilu tombuao hala:eki ula: alena:e. Ikita: I̱ pa:ta: ota: hau pu halememe. Kutupa mo Sadani hala: alena: yaka hande hone tulao hao hata: e pokawao haya: hali A:ntipa:si lu homaeya: nate nina: kone I̱ pa:ta: hone tulao halemeeki hoki na walememe. 14 Koto pelemepate I̱ma:ta: iki pa:ta: alo pimanu dupa. Iki tukiki pa:ta:ta: mo *Beilame wala:la: pi tolu haleme wanda:hali taa haleme handa:e. Koto Beilame *Beileke walolota: Isulai wanda:hali mo *toopi ti wepia ula: ale pa:ta: halo haleme nemanu nena: alo make loke hoeyaasa: hau pina:yeke ipikana:ma: sutiaeyeke hauma: iki hoke hau pa:ta: hatuku pena:yeke waleekeme. 15 Homeke tupa: kone mo hande Nikoleitani tapakena: wala:la: ekimanu tolu haleme wanda:hali iki tukiki pa:ta: taa haleme handa:e. 16 Koto pa:la:me ameta: ika: hoke hau hoki wala:pe. Kotoeki na pimika:na:ta: I̱ta: iki pa:ta: koto kone a:pa koto wanda:hali ame̱le̱ yaka kake pa:ta: ipu hala: bainasima: a:nda: pulueke.
17 Haleke haemeka:na:ta: kota: mo Sipitidima: siosimanu pa:ta: lo hala:eki manuta: ota: opua:pa:peke ya:la:me. Ma:nda: epima: a:nda: pea bepolaeya:ka:na:ta: kota: I̱ma: ipiki pa:ta: mo a:mbao ula: mandane *ma:na halueke. Kutupa mo hake piki toopina: panake biki laala:eki make halueke. Mo bikita: ma:nda:ma: make hone na ula:pate mo milia: somema: homeke hone wilieke.
Daetaeda siosi pa:ta: pi tapaeyekeeki
18 Mo Daetaeda siosina: enisolo pa:ta: dupa lae. Do pita: mo Koda:na: Eiyeke ipika: leketa: mo hande we pupapeke ti haaleke ekima: handaa ipika: anketa: mo mulamula lialeke pa leke yale yale piki koloma: handeke ale batasima: handeke somema: ala:me.
19 Ika: pu haleme hau manuta: I̱ma: hone ulume. Ika: pukima: homelemeeki make kima: na homeke hone tulao halemeeki make ika: e pokelemeeki make ika: homu pea yu wia halemeeki make I̱ma: hone ulume. Ikana:ma: ameta: wopu pitelememe. Amba: hande pimi tupa: dia:me laa I̱ma: hone ulume. 20 Koto pelemepate I̱ma: iki pa:ta: alo pita: dupa. Ikana:ma:ta: mo wanda: *Diesibeleta: iki ame̱le̱ pa haena: kiaalememe. Koto wanda:ma:ta: ipikita: Koda:na: pi mea ipulu wanda:e lo hala:pate ipika: wala:la: ekima:ta: yaka e pa hameke pokaaseme tapakema: ika: loke hoeyaasa: hau pina: make mo hoke temoko pa:ta: hala:la: nemanu nena: hatuku pu hoeyao hala:me. 21 I̱ma:ta: ipika: hoke hau hoki walena: waleke haloa:pate ipika: loke hoeyaasa: hau pa:ta: hoki wala:peke ya:leke kiaasa:me. 22 Koto ekina:ta: I̱ma:ta: mo wanda: make mo wanda: ame̱le̱ loke hoeyaasa: hau pimi tapake ame̱le̱ ota: hoke tupa: tanda mulu peleme da panda: pa:ta: lopaa monealueke. Ikana:ma: mo wanda: ame̱le̱ loke hoeyaasa: haumanu pimikieki na kelepemeka:na:ta: kota: ameta: I̱ma: iki pa:ta: do aloeki pulueke. 23 Kutupa ipika: hoki nane tolu haleme tapake make lu homaalueke. Kutu pua:ka:na:ta: mo siosi paeyaoma: I̱ta: wanda:hali paeyaona: honemanu make hone u halemeeki manuna: hone ulu somee hone wilimikie. I̱ma:ta: iki paeyao ika: peleme ekina: homeke homeke lo ana:na: kone yenki kulueke.
24 Koto pa:la:pate Daetaeda haleme mandane wanda:halima:ta: mo hokeeki wala:la:eki na telia: mea pelememe. Koto wanda: ame̱le̱ haleme tapakema: alota: Sadanina: ota: onina: toluma: a:mbao ula: pi tekemanue lo haleme ekita: na moka:la handelememe. Iki pa:ta: mo ka:nda: pa:la:eki ma:nda: na atulao ulueke alome. 25 Koto ekina: ika: wia halemeeki manuta: I̱ epono honkopu hao miniki hapa:peke. 26 Ma:nda: epi amedama: a:nda: pea bepolaaso hata: yaka hone pa:la:eki pa putia pua mo honikina: paeyaeya:ka:na:ta: kota: yaka Apa:ma: I̱ma: handeteke hanoyeke ka:la: ekita: iki pa:ta: kulueke. I̱ma:ta: iki pa:ta: mo kenke honiki paeyao pa:ta: haleme tapake paeyao handeteke hamena: lolueke. 27 Mo ayenima: wepieke dopitama: handeteke hamena: laata: mo kenkema: wa:pa:la: kanakema: handaa yambolo sasape puemena: lolueke. 28 Kutupa mo da ka:la:paaso opa:la: hombulanka: make iki pa:ta: halueke.
29 Haleke haemeka:na:ta: kota: mo Sipitidima: siosimanu pa:ta: lo hala: pi manuta: ota: opua:pa:peke ya:la:me.